ರಾಜ್ಯ

`ಮನರೇಗಾ ಉಳಿಸಿ' ಕಾಂಗ್ರೆಸ್‌ನಿ೦ದ ಆಂದೋಲನ

ಕಾಂಗ್ರೆಸ್ ವತಿಯಿಂದ `ಮನರೇಗಾ ಉಳಿಸಿ' ಆಂದೋಲನ
ಕಾಂಗ್ರೆಸ್ ವತಿಯಿಂದ `ಮನರೇಗಾ ಉಳಿಸಿ' ಆಂದೋಲನ
ಮಂಜುನಾಥ ಅಂಗಡಿ
Published on: 
ಧಾರವಾಡ: ಧಾರವಾಡ ಗ್ರಾಮೀಣ 71ರ ಬ್ಲಾಕ್ ಕಾಂಗ್ರೆಸ್ ವತಿಯಿಂದ ಜಿಲ್ಲಾಽಕಾರಿ ಕಚೇರಿ ಎದುರು ಮಂಗಳವಾರ `ಮನರೇಗಾ ಉಳಿಸಿ' ಆಂದೋಲನ ನಡೆಸಲಾಯಿತು.
ಕರ್ನಾಟಕ ನಗರ ನೀರು ಸರಬರಾಜು ಮತ್ತು ಒಳಚರಂಡಿ ಮಂಡಳಿ ಅಧ್ಯಕ್ಷೆ ಶಿವಲೀಲಾ ಕುಲಕರ್ಣಿ ಅವರ ಅಧ್ಯಕ್ಷತೆಯಲ್ಲಿ ಇಡೀ ದಿನ ಧರಣಿ ಕುಳಿತ ಕಾರ್ಯಕರ್ತರು, ಭಜನಾ ಮೇಳದೊಂದಿಗೆ ಕೇಂದ್ರ ಸರ್ಕಾರದ ನೀತಿಗಳನ್ನು ವಿಡಂಬನೆ ಮಾಡಿದರು.
ಗ್ರಾಮೀಣ ಭಾಗದ ಬಡವರಿಗೆ ಉದ್ಯೋಗ ಒದಗಿಸಿ ಹಸಿವು ನೀಗಿಸುವ ಉದ್ದೇಶದಿಂದ ಜಾರಿಗೆ ಬಂದಿದ್ದ ಮಹಾತ್ಮಾ ಗಾಂಧಿ ರಾಷ್ಟ್ರೀಯ ಗ್ರಾಮೀಣ ಉದ್ಯೋಗ ಖಾತರಿ ಯೋಜನೆಯನ್ನು ಕೇಂದ್ರ ಸರ್ಕಾರವು ಸಂಪೂರ್ಣವಾಗಿ ಹಳಿ ತಪ್ಪಿಸುತ್ತಿದೆ. ಬಡವರಿಗೆ ಉದ್ಯೋಗ ನೀಡುವ ಬದಲು, ಈ ಯೋಜನೆಯನ್ನು ಬಂಡವಾಳಶಾಹಿ ಮತ್ತು ಕಾಂಟ್ರಾಕ್ಟರ್‌ಗಳ ಲಾಭಕ್ಕಾಗಿ ಬಳಸಿಕೊಳ್ಳುತ್ತಿರುವುದು ಅತ್ಯಂತ ಆಘಾತಕಾರಿ ವಿಷಯವಾಗಿದೆ ಎಂದು ಪ್ರತಿಭಟನಾಕಾರರು ಆರೋಪಿಸಿದರು.
** ವಿಬಿ- ಜಿ ರಾಮ್‌ಜಿ ಹೆಸರಿನಲ್ಲಿ ದಿಕ್ಕು ತಪ್ಪಿಸುವಿಕೆ:
ಮನರೇಗಾ ನಿಯಮದ ಪ್ರಕಾರ ಯಾವುದೇ ಕಾಮಗಾರಿಯಲ್ಲಿ ಮಧ್ಯವರ್ತಿಗಳು ಅಥವಾ ಕಾಂಟ್ರಾಕ್ಟರ್‌ಗಳಿಗೆ ಅವಕಾಶವಿರಬಾರದು. ಆದರೆ, ಕೇಂದ್ರ ಸರ್ಕಾರವು ತರುತ್ತಿರುವ ಹೊಸ ನಿಯಮಗಳು ಮತ್ತು ಯಂತ್ತೋಪಕರಣಗಳ ಬಳಕೆಗೆ ನೀಡುತ್ತಿರುವ ಆದ್ಯತೆಯು ಪರೋಕ್ಷವಾಗಿ ಕಾಂಟ್ರಾಕ್ಟರ್‌ಗಳಿಗೆ ಮಣೆ ಹಾಕುತ್ತಿದೆ. ಇದರಿಂದ ಬಡ ಕಾರ್ಮಿಕರಿಗೆ ಸಿಗಬೇಕಾದ ಕೂಲಿ ಹಣ ಗುತ್ತಿಗೆದಾರರ ಪಾಲಾಗುತ್ತಿದೆ. ಯೋಜನೆಯ ಮೂಲ ಸ್ವರೂಪವನ್ನೇ ಬದಲಿಸಿ, ಅದನ್ನು ಕೇವಲ ತಾಂತ್ರಿಕತೆ ಮತ್ತು ಕಾಂಟ್ರಾಕ್ಟ್ ಆಧಾರಿತ ವ್ಯವಸ್ಥೆಯನ್ನಾಗಿ ಪರಿವರ್ತಿಸಲು ಸಂಚು ರೂಪಿಸಲಾಗಿದೆ. ಬಡವರ ಯೋಜನೆಯನ್ನು ಶ್ರೀಮಂತರ ಲಾಭದ ಯೋಜನೆಯನ್ನಾಗಿ ಮಾರ್ಪಡಿಸಲಾಗಾಂಧಿಗುತ್ತಿದೆ. ಯೋಜನೆಯಲ್ಲಿ ಕಾಂಟ್ರಾಕ್ಟರ್‌ಗಳು ಮತ್ತು ಮಧ್ಯವರ್ತಿಗಳ ಪ್ರವೇಶವನ್ನು ಸಂಪೂರ್ಣ ನಿಷೇಧಿಸಬೇಕು. ಯಂತ್ರೋಪಕರಣಗಳ ಬದಲಿಗೆ ಕೇವಲ ಮಾನವ ಶ್ರಮಕ್ಕೆ ಆದ್ಯತೆ ನೀಡಬೇಕು ಎಂದು ಒತ್ತಾಯಿಸಿದರು.
ಕಾಂಟ್ರಾಕ್ಟರ್‌ಗಳಿಗೆ ಮಣೆ ಹಾಕುವ ಕೇಂದ್ರ ಸರ್ಕಾರದ ಜನವಿರೋಧಿ ನೀತಿಯನ್ನು ಕೈಬಿಡಬೇಕು. ಬಡವರ ಉದ್ಯೋಗದ ಹಕ್ಕನ್ನು ಕಸಿದು ಗುತ್ತಿಗೆದಾರರ ಜೇಬು ತುಂಬಿಸುವ ಕೇಂದ್ರ ಸರ್ಕಾರದ ನಡೆಯನ್ನು ತಡೆಹಿಡಿಯಬೇಕು ಎಂದು ಜಿಲ್ಲಾಡಳಿತದ ಮೂಲಕ ರಾಜ್ಯಪಾಲರಿಗೆ ಮನವಿ ರವಾನಿಸಿದರು.
ಪ್ರತಿಭಟನೆಯಲ್ಲಿ ಬ್ಲಾಕ್ ಅಧ್ಯಕ್ಷರಾದ ಅರವಿಂದ ಏಗನಗೌಡರ, ಈಶ್ವರ ಶಿವಳ್ಳಿ, ಮುಖಂಡರಾದ ಸಿದ್ದಪ್ಪ ಪ್ಯಾಟಿ, ಚನ್ನಬಸಪ್ಪ ಮಟ್ಟಿ, ಮಂಜುನಾಥ ಭೀಮಕ್ಕನವರ, ಬಸವರಾಜ ಜಾಧವ, ರಾಜಶೇಖರ ಕಮತಿ, ಭೀಮಪ್ಪ ಕಾಸಾಯಿ, ಗೌರಮ್ಮ ಬಲೋಗಿ, ಸೂರವ್ವ ಪಾಟೀಲ, ದೀಪಾ ನೀರಲಕಟ್ಟಿ, ಪರಮೇಶ್ವರ ಕಾಳೆ, ಬಸವರಾಜ ಹೆಬ್ಬಳ್ಳಿ, ನವೀನ ಕದಂ, ಬಾಪುಗೌಡ ಪಾಟೀಲ, ಇತರರಿದ್ದರು.
Congress
MGNREGA
ವಿಜಯವಾಣಿ ನಂ.1 ದಿನ ಪತ್ರಿಕೆ | Vijayavani | Kannada News
www.vijayavani.net