Karnataka cross-voting; 'ನಮ್ಮ ಸಿಎಂ ದೆಹಲಿ ಬಿಜೆಪಿ ಮಾಡೆಲ್ ಅಳವಡಿಸಿಕೊಂಡಿದ್ದಾರೆ'; ಸತೀಶ್ ಜಾರಕಿಹೊಳಿ ಹೇಳಿದ್ದಿಷ್ಟು

ಬೆಂಗಳೂರು: 'ಎರಡೂ ಪಕ್ಷದಿಂದ ಕ್ರಾಸ್ ಓಟ್ ಆಗಿದೆ, ಈ ವಿಚಾರವನ್ನು ಪ್ರತಿಪಕ್ಷಗಳೂ ಕೂಡ ಒಪ್ಪಿಕೊಂಡಿದ್ದಾರೆ. ಬೇರೆಯವರು ಹಾಕಿದ್ದಕ್ಕೆ ನಮಗೆ 32 ಮತಗಳು ಸಿಕ್ಕಿದೆ. ಸಿಎಂ, ಅಧ್ಯಕ್ಷರು ಸುರ್ಜೇವಾಲ ಅವರ ಪ್ರಯತ್ನ ಇದೆ. ಅವರ ಜಂಟಿ ಪ್ರಯತ್ನದಿಂದಾಗಿ ಇಷ್ಟು ದೊಡ್ಡ ಮಟ್ಟದ ಮತಗಳನ್ನು ಪಡೆಯಲು ಸಾಧ್ಯವಾಗಿದೆ' ಎಂದು ವಿಧಾನ ಪರಿಷತ್ ಚುನಾವಣೆಯಲ್ಲಿ ಅಡ್ಡ ಮತದಾನ ಬಗ್ಗೆ ಸಚಿವ ಸತೀಶ್ ಜಾರಕಿಹೊಳಿ ಹೇಳಿದರು. 

ವಿಧಾನ ಪರಿಷತ್ ಚುನಾವಣೆಯಲ್ಲಿ ನಡೆದಿದೆ ಎನ್ನಲಾದ ಅಡ್ಡ ಮತದಾನ ಹಾಗೂ ರಾಜ್ಯದ ಗ್ಯಾರಂಟಿ ಯೋಜನೆಗಳ ಪರಿಷ್ಕರಣೆ ಕುರಿತು ಲೋಕೋಪಯೋಗಿ ಸಚಿವ ಸತೀಶ್ ಜಾರಕಿಹೊಳಿ ಅವರು ಮಾತನಾಡಿದ್ದಾರೆ. ದೆಹಲಿಯಲ್ಲಿ ಬಿಜೆಪಿ ಮಾಡುವ ರಾಜಕೀಯ ಮಾಡೆಲ್ ಅನ್ನೇ ಈಗ ರಾಜ್ಯದಲ್ಲಿ ನಮ್ಮ ಸಿಎಂ ಅಳವಡಿಸಿಕೊಂಡಿದ್ದಾರೆ ಎಂದು ಹೇಳುವ ಮೂಲಕ ಜಾರಕಿಹೊಳಿ ಅವರು ರಾಜಕೀಯ ವಲಯದಲ್ಲಿ ಸಂಚಲನ ಮೂಡಿಸಿದ್ದಾರೆ.

'ದೆಹಲಿಯಲ್ಲಿ ಯಾವ ರೀತಿ ರಾಜಕೀಯ ನಡೆಯುತ್ತಿದೆಯೋ ಅದು ಈಗಾಗಲೇ ಪೀಕ್‌ಗೆ ಹೋಗಿದೆ. ಅದೇ  ರೀತಿ ಕರ್ನಾಟಕದಲ್ಲಿ ನಡೆಯುತ್ತಿದೆ.  ಬಿಜೆಪಿಯ ಮಾಡೆಲ್‌ನ್ನ ನಮ್ಮ ಸಿಎಂ ಅಳವಡಿಕೆ ಮಾಡಿಕೊಂಡಿದ್ದಾರೆ. ಕಾಂಗ್ರೆಸ್ ಮೊದಲ ಬಾರಿ ಬಿಜೆಪಿ ಮಾಡೆಲ್‌ನ್ನ ಅಳವಡಿಕೆ ಮಾಡಿಕೊಳ್ಳಲಾಗಿದೆ' ಎಂದು ಸಚಿವ ಸತೀಶ್​ ಜಾರಕಿಹೊಳಿ ಸ್ಪಷ್ಟನೆ ಕೊಟ್ಟರು 

ಆದರೆ, ಇದನ್ನು ಕುದುರೆ ವ್ಯಾಪಾರ ಅಂತ ಹೇಳೋಕೆ ಆಗಲ್ಲ. ಆದರೆ ಅವರು ಮತ ಹಾಕಿರೋದು ನಿಜ. ಸ್ನೇಹದ ಕಾರಣಕ್ಕಾಗಿ ಹಾಕಿರಬಹುದು ಅವರವರ ಬಾಂಧವ್ಯದ ಕಾರಣಕ್ಕಾಗಿ ಹಾಕಿರಬಹುದು ಮೂರ್ನಾಲ್ಕು ಕಾರಣಗಳಿಂದ ಮತ ಹಾಕಿರುತ್ತಾರೆ. ಬಿಜೆಪಿಯಿಂದ ಮತ ಹಾಕಿರೋದು ಅಲ್ಲಿನ ನಾಯಕತ್ವ, ವೈಮನಸ್ಸಿನ ವಿಚಾರಕ್ಕೆ ಆ ಕಾರಣದಿಂದ ಮತ ಹಾಕಿದ್ದಾರೆ ಎಂದು ಹೇಳಿದರು.

ನಮಗೆ ಜೆಡಿಎಸ್​ನಿಂದಲೂ ನಾಲ್ಕು ಮತ ಬಂದಿದೆ, ಬಿಜೆಪಿಯಿಂದಲೂ ಏಳು ಬಂದಿರಬಹುದು. ಎಲ್ಲಾ ಸ್ವಲ್ಪ ದಿನದ ಬಳಿಕ ಬಹಿರಂಗ ಆಗುತ್ತೆ. ಯಾಕೆ ನಮಗೆ ಮತ ಹಾಕಿದ್ರು, ಏನಕ್ಕೆ ಹಾಕಿದ್ರು ಎನ್ನುವ ವಿಚಾರ ಶೀಘ್ರವೇ ಗೊತ್ತಾಗುತ್ತೆ. ಪಿವಿ ಮೋಹನ್‌ಗೆ 29 ಮತಗಳೇ ಅಲಾಟ್ ಮಾಡಲಾಗಿತ್ತು. ಕಾಂಗ್ರೆಸ್​ನಿಂದ ಯವ ಮತ ಹೋಗಿಲ್ಲ. ಹೋಗಿದ್ರು ಕೂಡ ನಮ್ಮಲ್ಲೇ ಇದೆ ಹೊರಗಡೆಗೆ ಹೋಗಿಲ್ಲ ಎಂದರು. 

ಈ ಬೆಳವಣಿಗೆ ಕಾಂಗ್ರೆಸ್ ಮುಂದೆ ಹೋಗಲು ಒಂದು ಅವಕಾಶ ಸಿಕ್ಕ ಹಾಗೆ ಆಗಿದೆ. ಆದರೆ, ಇನ್ನೂ ಅನೇಕ ಸವಾಲುಗಳಿದ್ದಾವೆ ಅವನ್ನೆಲ್ಲವೂ ಕೂಡ ಟ್ಯಾಕಲ್ ಮಾಡಬೇಕು. ಬೇರೆ ಬೇರೆ ರೀತಿಯಿಂದಲೂ ಸವಾಲುಗಳು ಬರುತ್ತವೆ ಆ ಸಮಸ್ಯೆಗಳನ್ನು ಬಗೆಹರಿಸಬೇಕು ಅನ್ನೋದನ್ನ ಸಂದರ್ಭದಲ್ಲಿ ತಕ್ಕಂತೆ ನಡೆದುಕೊಳ್ಳಬೇಕು  ಇದರಿಂದ ಮೈಮರೆಯುವಂತ ಪ್ರಶ್ನೆ ಇಲ್ಲ ಇದು ಇಷ್ಟಲ್ಲೆ ಸೀಮಿತ. ಬೇರೆ ಚುನಾವಣೆಗಳು ಬೇರೆ ರೀತಿ ಆಗುತ್ತೆ. ಆ ಹಂತಕ್ಕೆ ನಾವು ತಯಾರು ಆಗಬೇಕು ಸಂದರ್ಭಕ್ಕೆ ತಕ್ಕಂತೆ ತಯಾರಿ ಆಗಬೇಕು ಎಂದರು. 

ಗ್ಯಾರಂಟಿ ಪರಿಷ್ಕರಣೆಗೆ ಇಂದು ಸಭೆ ಬಗ್ಗೆ ಮಾತನಾಡಿದ ಅವರು, ಈಗಾಗಲೇ ನಾವು ಹೇಳಿದ್ದೇವೆ ಗ್ಯಾರಂಟಿ ಯೋಜನೆಯಲ್ಲಿ‌ ಪರಿಷ್ಕರಣೆ ಮಾಡಬೇಕು. ಬಹಳ ಸೀರಿಯಸ್ಸಾಗಿ ಮಾಡಬೇಕು. ನಮ್ಮ ರಾಜ್ಯದವರಿಗೆ ಮಾತ್ರ ಗ್ಯಾರಂಟಿ ಸಿಗಬೇಕು. ಹೊರಗಿನವರು ಬಂದಿದ್ದರೆ ಅವರನ್ನೆಲ್ಲ ಹೊರಗೆ ಇಡಬೇಕು. ಇದೆಲ್ಲವನ್ನು ಕೂಡ ಪರಿಷ್ಕರಣೆ ಮಾಡಬೇಕು ಅಂತ ಹೇಳಿದ್ದೇವೆ ಎಂದು ಗ್ಯಾರಂಟಿ ಸಭೆ ಬಗ್ಗೆ ಸತೀಶ್​ ಜಾರಕಿಹೊಳಿ ಸ್ಪಷ್ಟನೆ ಕೊಟ್ಟರು. 

ಬಿಡದಿ ಟೌನ್‌ಶಿಪ್ ವಿರೋಧಿಸಿ ಪಾದಯಾತ್ರೆ ನಡೆಸುತ್ತಿರುವ ವಿಚಾರದ ಬಗ್ಗೆ ಮಾತನಾಡಿದ ಅವರು ಮುಖ್ಯಮಂತ್ರಿಗಳು ಸಮರ್ಥರಿದ್ದಾರೆ, ಹಿರಿಯರು ನಮ್ಮ ಪಕ್ಷದಲ್ಲಿದ್ದಾರೆ. ಎಲ್ಲರೂ ಸೇರಿ ಬಿಡದಿ ಟೌನ್​ ಶಿಪ್​ ಬಗ್ಗೆ   ಚರ್ಚೆ ಮಾಡುತ್ತಾರೆ. ಬಿಡದಿ ಟೌನ್‌ಶಿಪ್ ಆಗುತ್ತೋ ಬಿಡುತ್ತೋ ಗೊತ್ತಿಲ್ಲ. ಆದರೆ ಅದರಿಂದ ನಮಗೆ ಡ್ಯಾಮೇಜ್ ಆಗಬಾರದು. ನಾವು ಈಗ ಉತ್ಸಾಹದಲ್ಲಿ ಇದ್ದೇವೆ 2028ರ ತನಕ ಈ ಉತ್ಸಾಹ ಹಾಗೇ ಹೋಗಬೇಕು ಎಂದು ಹೇಳಿದರು,( ಏಜೆನ್ಸೀಸ್)