5 ವರ್ಷದಲ್ಲಿ ಆರ್‌ಐಎಸ್‌ಎಂ ಕೌಶಲ ವಿವಿ: ಡಾ. ಎಂ.ಆರ್. ಜಯರಾಂ ಘೋಷಣೆ

ನಗರದ ಖಾಸಗಿ ಹೋಟೆಲ್‌ನಲ್ಲಿ ಗುರುವಾರ ಅಮೆರಿಕದ ಸಾರ್ವಜನಿಕ ಸಂಶೋಧನಾ ವಿಶ್ವವಿದ್ಯಾಲಯಗಳಲ್ಲಿ ಒಂದಾದ ಆಲ್ಬನಿಯ ‘ಸ್ಟೇಟ್ ಯೂನಿವರ್ಸಿಟಿ ಆಫ್ ನ್ಯೂಯಾರ್ಕ್’ ಜತೆಗೆ ರಾಮಯ್ಯ ಗ್ರೂಪ್ ಸಹಯೋಗದಲ್ಲಿ ಆರಂಭಿಸಿರುವ ಆರ್‌ಐಎಸ್‌ಎಂ ವಿಶ್ವವಿದ್ಯಾಲಯ ಉದ್ಘಾಟನಾ ಕಾರ್ಯಕ್ರಮದ ಸಮಾರೋಪದಲ್ಲಿ ಅವರು ಮಾತನಾಡಿದರು.

ಆರ್‌ಐಎಸ್‌ಎಂ ವಿಶ್ವವಿದ್ಯಾಲಯವನ್ನು ಸ್ಥಾಪಿಸಿ ಇತಿಹಾಸ ನಿರ್ಮಿಸಲಾಗಿದೆ. ಆದರೆ, ನಾಳೆ ಏನು ಎಂಬ ಅತಿ ದೊಡ್ಡ ಸವಾಲು ನಮ್ಮ ಮುಂದಿದೆ. ಯಾವ ಕಾರಣಕ್ಕಾಗಿ ಈ ವಿವಿಯನ್ನು ಸ್ಥಾಪಿಸಿದ್ದೇವೆ? ಎಂಬುದನ್ನು ಸಾಬೀತುಪಡಿಸಲಾಗುತ್ತದೆ ಎಂದು ಹೇಳಿದರು.

ಕೌಶಲ, ಯುವಜನತೆ ಮತ್ತು ಉದ್ಯಮವನ್ನು ಜತೆಯಾಗಿ ಕೊಂಡೊಯ್ಯಬೇಕಾದ ಜವಾಬ್ದಾರಿ ನಮ್ಮ ಮೇಲಿದೆ. ಕಲಿಕಾ ಸಂಸ್ಥೆ, ಕೌಶಲ ಸಂಸ್ಥೆಯನ್ನಾಗಿ ಮಾಡಬೇಕಿದೆ. ‘ರಾಮಯ್ಯ ಅಕಾಡೆಮಿ ಆಫ್ ಯೂನಿವರ್ಸಿಟಿ ಆಫ್ ಸ್ಕಿಲ್’ ಆಗಿ ರೂಪಿಸಲು ಬೇಕಾದ ಮೂಲಸೌಕರ್ಯವನ್ನು ಒದಗಿಸಲಾಗುತ್ತದೆ ಎಂದು ತಿಳಿಸಿದರು.

ವಿದೇಶಿ ವಿಶ್ವವಿದ್ಯಾಲಯಗಳಲ್ಲಿ ಸೂಕ್ಷ್ಮ ಎಲೆಕ್ಟ್ರಾನಿಕ್ಸ್ ಮತ್ತು ಕೃತಕ ಬುದ್ಧಿಮತ್ತೆಗೆ ಸಾವಿರಾರು ಕೋಟಿ ರೂ.ಗಳನ್ನು ನೀಡಲಾಗುತ್ತಿದೆ. ಆಶ್ಚಯಪಡುವ ರೀತಿಯಲ್ಲಿ ಅಭಿವೃದ್ಧಿಪಡಿಸಲಾಗಿದೆ. ಎಐ ಪ್ರಬಂಧ ಮಂಡನೆಯಲ್ಲಿ 160ಕ್ಕೂ ಹೆಚ್ಚು ವಿವಿಗಳು ಸೃಜನಾತ್ಮಕತೆಯನ್ನು ಹೊಂದಿವೆ. ಇತ್ತೀಚೆಗೆ ಎಐ ಆಯ್ಕೆ ಮಾಡಿಕೊಂಡ 3,500 ಪ್ರಬಂಧಗಳಲ್ಲಿ ಚೀನಾದಿಂದಲೇ 1,500 ಪ್ರಬಂಧಗಳಿವೆ. ಅಮೆರಿಕದಿಂದ 500 ಪ್ರಬಂಧಗಳಿದ್ದರೆ, ಭಾರತದ ಪಾಲು ಕೇವಲ 14ರಿಂದ 15 ಅಷ್ಟೇ. ಇದನ್ನು ಗಮನಿಸಿದರೆ, ನಮ್ಮ ಸ್ಥಾನಮಾನವೇನು ಎಂಬುದರ ಅರಿವಾಗಲಿದೆ ಎಂದರು.

ಹಿಂದೆಲ್ಲ ವಿದೇಶಿ ವಿಶ್ವವಿದ್ಯಾಲಯಗಳು ಭಾರತಕ್ಕೆ ಬರಲು ಸಾಕಷ್ಟು ಅಡೆತಡೆಗಳಿದ್ದವು. ಆದರೆ, ರಾಷ್ಟ್ರೀಯ ಶಿಕ್ಷಣ ನೀತಿ (ಎನ್‌ಇಪಿ) ಮತ್ತು ಹಲವು ಶಿಕ್ಷಣ ನೀತಿಗಳು ಜಾರಿಗೆ ಬಂದ ನಂತರ ವಿದೇಶಿ ವಿವಿಗಳಿಗೆ ಅನುಮತಿ ನೀಡಿದರೂ ಜ್ಞಾನದ ಪಾಲುದಾರಿಕೆಗೆ ಹೆಚ್ಚು ಆದ್ಯತೆ ನೀಡಿರಲಿಲ್ಲ. ಆದರೆ, ಈಗ ಕೇಂದ್ರ ಸರ್ಕಾರ ಸೇರಿ ಎಲ್ಲ ಸರ್ಕಾರಗಳು ಕೌಶಲ ಶಿಕ್ಷಣ ಮತ್ತು ಜ್ಞಾನದ ಶಿಕ್ಷಣಕ್ಕೆ ಆದ್ಯತೆ ನೀಡುತ್ತಿದ್ದು, ಈಗ ಕಾಲ ಕೂಡಿ ಬಂದಿದೆ ಎಂದು ಹೇಳಿದರು.

ಆಲ್ಬನಿ ಯೂನಿವರ್ಸಿಟಿ ಅಧ್ಯಕ್ಷ ಡಾ. ಹವಿದ್ದಾನ್ ರೋಡ್ರಿಗಸ್ ಮಾತನಾಡಿ, ಈ ಪಾಲುದಾರಿಕೆಯು ಕೇವಲ ವಿದ್ಯಾರ್ಥೀಗಳಿಗೆ ಮಾತ್ರವಲ್ಲ,ಸಮುದಾಯಗಳಿಗೂ ಅನುಕೂಲವಾಗಲಿದೆ. ಅಂತಾರಾಷ್ಟ್ರೀಯ ಪಾಲುದಾರಿಕೆಯು ಹೊಸ ಆಲೋಚನೆಗಳನ್ನು ಯೋಜನೆಯಾಗಿ ಕಾರ್ಯರೂಪಕ್ಕೆ ತರಲಿದೆ ಎಂದರು.

ಇಂದು ಬೆಂಗಳೂರು ಕೇವಲ ಒಂದು ನಗರವಾಗಿ ಸೀಮಿತವಾಗಿಲ್ಲ. ಇಡೀ ಭಾರತದ ಜತೆಗೆ ಜಾಗತಿಕವಾಗಿ ಗುರುತಿಸಿಕೊಂಡಿದೆ. ಆದ್ದರಿಂದ ಈ ಪಾಲುದಾರಿಕೆಯನ್ನು ಹೊಂದಲು ಉತ್ಸಾಹ ಹೊಂದಿದ್ದೇವೆ ಎಮದು ಸಂತಸ ವ್ಯಕ್ತಪಡಿಸಿದರು.

ವಿದ್ಯಾರ್ಥಿಗಳಿಗೆ ತರಗತಿಗಳಲ್ಲಿನ ಉನ್ನತ ಶಿಕ್ಷಣವು ಸವಾಲಿನಿಂದ ಕೂಡಿರಲಿದೆ. ವಾಸ್ತವ ಜಗತ್ತನ್ನು ತೆರೆದಿಡುವ, ಪರಿವರ್ತನೆ ಮಾಡುವ ಕೆಲಸವಾಗಲಿದೆ. ಆರ್‌ಐಎಸ್‌ಎಂನಲ್ಲಿ ಜಾಗತಿಕ ಸಮಾಜವನ್ನು ನೋಡುವ ಹಾಗೂ ಕೃತಕ ಬುದ್ಧಿಮತ್ತೆಗೆ ಆದ್ಯತೆ ನೀಡಲಾಗುತ್ತದೆ. ಸೈಬರ್ ಭದ್ರತೆ, ಹವಾಮಾನ ಬದಲಾವಣೆ, ಹವಾಮಾನ ವೈಪರೀತ್ಯ ಸೇರಿ ಹಲವು ಕ್ಷೇತ್ರಗಳ ಮೇಲೆ ಆರ್‌ಐಎಸ್‌ಎಂ ಅಧ್ಯಯನ, ವ್ಯಾಸಂಗ ಮತ್ತು ಸಂಶೋಧನಾ ಚಟುವಟಿಕೆಗಳನ್ನು ನಡೆಸಲಿದೆ. ಸಂಶೋಧನೆ, ಪಠ್ಯಕ್ರಮ, ಬೋಧಕ ಸಿಬ್ಬಂದಿ ಮತ್ತು ತರಬೇತಿ ವಿಚಾರದಲ್ಲಿ ಜ್ಞಾನ ವಿನಿಯಮವಾಗಲಿದೆ. ವಿಜ್ಞಾನ, ತಂತ್ರಜ್ಞಾನ, ಇಂಜಿನಿಯರಿಂಗ್ ಮತ್ತು ಗಣಿತ (ಸ್ಟೆಮ್) ಶಿಕ್ಷಣಕ್ಕೆ ಒತ್ತು ನೀಡಲಾಗಿದೆ ಎಂದು ಹೇಳಿದರು.

ಕಾರ್ಯಕ್ರಮದಲ್ಲಿ ಆರ್‌ಐಎಸ್‌ಎಂ ಕಾರ್ಯಪಡೆ ಅಧ್ಯಕ್ಷ ಪ್ರೊ. ಬಿ.ಎನ್. ರಘುನಂದನ್, ಆಡಳಿತ ಮಂಡಳಿಯ ಡಾ. ಎನ್.ಡಿ. ಗಂಗಾಧರ್. ಗುರುಚರಣ್ ಗೊಲ್ಲೇರ್‌ಕೇರಿ ಮತ್ತು ಡಾ. ಜೆ.ಡಿ. ದೇಸಾಯಿ ಉಪಸ್ಥಿತರಿದ್ದರು.