ನಿವೃತ್ತ ಶಿಕ್ಷಕ ಸಿದ್ದಣ್ಣ ಅಂಬುಟಗಿ ದಾರುಣ ಕೊಲೆ

ಇಂಡಿ : ನಗರದ ಪಂಚಶೀಲ ನಗರದಲ್ಲಿ ಭಾನುವಾರ ನಿವೃತ್ತ ಶಿಕ್ಷಕ ಸಿದ್ದಣ್ಣ ಬಸಪ್ಪ ಅಂಬುಟಗಿ (62) ಎಂಬುವವರನ್ನು ದುಷ್ಕರ್ಮಿಗಳು ಕೊಲೆಮಾಡಿ, ಮತದೇಹವನ್ನು ಬೆಡ್‌ಶೀಟ್‌ನಲ್ಲಿ ಸುತ್ತಿ, ನಗರದ ಚವಡಿಹಾಳ ರಸ್ತೆಯ ಪಕ್ಕದಲ್ಲಿ ಬಿಸಾಡಿ ಹೋಗಿದ್ದಾರೆ.

ಕೊಲೆಗೆ ಸಂಬಂಧಿಸಿದಂತೆ ನಿವೃತ್ತ ಶಿಕ್ಷಕನ ಕಿರಿಯ ಮಗಳು ನಿಖಿತಾ ಅಂಜುಟಗಿ ಇಂಡಿ ಶಹರ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಿಸಿದ್ದಾರೆ.

ಶಿಕ್ಷಕರಾಗಿದ್ದ ಸಿದ್ದಪ್ಪ ಅಂಬುಟಗಿ ಎರಡು ವರ್ಷಗಳ ಹಿಂದೆ ನಿವೃತ್ತರಾಗಿ ಮನೆಯಲ್ಲಿಯೇ ಇರುತ್ತಿದ್ದರು. ಕುಟುಂಬ ವಿಚಾರವಾಗಿ ಹಲವು ಮನಸ್ಥಾಪಗಳಿದ್ದವು ಎಂದು ದೂರಿನಲ್ಲಿ ಉಲ್ಲೇಖವಾಗಿದೆ. ಆಗಸ್ಟ್ 15ರ ರಾತ್ರಿ 11 ಗಂಟೆಯಿಂದ 16ರ ಬೆಳಗಿನ 6 ಗಂಟೆ ನಡುವಿನ ಅವಧಿಯಲ್ಲಿ ಕೊಲೆ ಘಟನೆ ನಡೆದಿರುವ ಸಾಧ್ಯತೆ ಇದ್ದು, ಮತದೇಹದ ಜೊತೆಗೆ ಮನೆಯ ಬೆಡ್‌ಶೀಟ್ ಹಾಗೂ ತಲೆದಿಂಬಿನ ಕವರ್ ಇರುವುದೂ ಕಂಡುಬಂದಿದೆ. ತಲೆ, ಎದೆ ಸೇರಿ ದೇಹದ ವಿವಿಧ ಭಾಗಗಳಲ್ಲಿ ರಕ್ತಗಾಯಗಳಾಗಿದೆ ಎಂದು ದೂರಿನಲ್ಲಿ ಹೇಳಲಾಗಿದೆ.

ನಿವೃತ್ತ ಶಿಕ್ಷಕರನ್ನು ಅವರ ಹಿರಿಯ ಮಗಳು ಹಾಗೂ ಆಕೆಯೊಂದಿಗೆ ಅನೈತಿಕ ಸಂಬಂಧ ಹೊಂದಿರುವ ವ್ಯಕ್ತಿ, ಇತರರು ಸೇರಿ ಕೊಲೆ ಮಾಡಿದ್ದಾರೆ ಎಂಬ ಗಂಭೀರ ಆರೋಪ ದೂರಿನಲ್ಲಿದೆ. ಪೊಲೀಸರು ಆ. 16ರಂದು ಮಧ್ಯಾಹ್ನ ದೂರು ದಾಖಲಿಸಿಕೊಂಡು, ಘಟನೆಗೆ ನಿಖರ ಕಾರಣವೇನು? ಅವರ ಸಾವು ಹೇಗೆ ಸಂಭವಿಸಿತು ಹಾಗೂ ಮತದೇಹವನ್ನು ಸ್ಥಳಕ್ಕೆ ತಂದು ಬಿಸಾಡಿದವರು ಯಾರು? ಎಂಬುದನ್ನು ಪತ್ತೆ ಹಚ್ಚಲು ಪೊಲೀಸರು ತನಿಖೆ ಮುಂದುವರಿಸಿದ್ದಾರೆ.