ಸಯ್ಯದ್ ಮುಷ್ತಾಕ್ ಅಲಿ ಟ್ರೋಫಿ: ಕರ್ನಾಟಕ ಶುಭಾರಂಭ, ಕೊನೇ ಎಸೆತದಲ್ಲಿ ಗೆದ್ದ ಮಯಾಂಕ್ ಪಡೆ

ರವಿಚಂದ್ರನ್ ಸ್ಮರಣ್

Published on:

26 Nov 2025, 4:51 pm

ಅಹಮದಾಬಾದ್: ರೆಡ್‌ಬಾಲ್ ಟೂರ್ನಿಯ ಅದ್ಭುತ ´ಫಾರ್ಮ್ ಮುಂದುವರಿಸಿರುವ ಎಡಗೈ ಬ್ಯಾಟರ್ ರವಿಚಂದ್ರನ್ ಸ್ಮರಣ್ (67 ರನ್, 41 ಎಸೆತ, 7 ಬೌಂಡರಿ, 2 ಸಿಕ್ಸರ್) ಅರ್ಧಶತಕ ಹಾಗೂ ಅಂತಿಮ ಓವರ್‌ನಲ್ಲಿ ಪ್ರವೀಣ್ ದುಬೆ (38 *ರನ್, 24 ಎಸೆತ, 4 ಬೌಂಡರಿ, 1 ಸಿಕ್ಸರ್) ಸಾಹಸದ ನೆರವಿನಿಂದ ಕರ್ನಾಟಕ ತಂಡ ಸಯ್ಯದ್ ಮುಷ್ತಾಕ್ ಅಲಿ ಟ್ರೋಫಿ ದೇಶೀಯ ಟಿ20 ಟೂರ್ನಿಯಲ್ಲಿ ಉತ್ತರಾಖಂಡ ಎದುರು 5 ವಿಕೆಟ್‌ಗಳ ರೋಚಕ ಗೆಲುವು ದಾಖಲಿಸಿ, ಶುಭಾರಂಭ ಕಂಡಿದೆ.

ನಮೋ ಕ್ರೀಡಾಂಗಣದ ಬಿ ಗ್ರೌಂಡ್‌ನಲ್ಲಿ ಬುಧವಾರ ನಡೆದ ಡಿ ಗುಂಪಿನ ಪಂದ್ಯದಲ್ಲಿ ಟಾಸ್ ಸೋತು ಬ್ಯಾಟಿಂಗ್‌ಗೆ ಇಳಿದ ಉತ್ತರಾಖಂಡ, ವೇಗಿ ವಿದ್ವತ್ ಕಾವೇರಪ್ಪ (37ಕ್ಕೆ 3) ದಾಳಿಗೆ 32 ರನ್‌ಗಳಿಗೆ 3 ವಿಕೆಟ್ ಕೈಚೆಲ್ಲಿತು. ನಂತರ ನಾಯಕ ಕುನಾಲ್ ಚಾಂಡೇಲಾ (88 ರನ್, 49 ಎಸೆತ, 7 ಬೌಂಡರಿ, 5 ಸಿಕ್ಸರ್) ಹಾಗೂ ಆಂಜನೇಯ ಸೂರ್ಯವಂಶಿ (54) ನಡೆಸಿದ ಶತಕದ ಜತೆಯಾಟದ ನೆರವಿನಿಂದ ಉತ್ತರಾಖಂಡ 5 ವಿಕೆಟ್‌ಗೆ 197 ರನ್‌ಗಳ ಬೃಹತ್ ಮೊತ್ತ ಪೇರಿಸಿತು.

ಪ್ರತಿಯಾಗಿ 15 ರನ್‌ಗಳಿಗೆ ಕೆಎಲ್ ಶ್ರೀಜಿತ್ (7), ಅನುಭವಿ ಕರುಣ್ ನಾಯರ್ (4) ವಿಕೆಟ್ ಕಳೆದುಕೊಂಡ ಕರ್ನಾಟಕ ಆರಂಭಿಕ ಆಘಾತ ಎದುರಿಸಿತು. ಆಗ ಮಯಾಂಕ್ ಅಗರ್ವಾಲ್ (29) ಹಾಗೂ ಆರ್.ಸ್ಮರಣ್ 47 ಎಸೆತಗಳಲ್ಲಿ 84 ರನ್‌ಗಳಿಸಿ ಚೇಸಿಂಗ್‌ಗೆ ಬಲ ತುಂಬಿದರು. 30 ರನ್ ಅಂತರದಲ್ಲಿ ಇವರಿಬ್ಬರ ಸಹಿತ ಅಭಿನವ್ ಮನೋಹರ್ (10) ವಿಕೆಟ್ ಕಳೆದುಕೊಂಡ ಕರ್ನಾಟಕ ಕುಸಿತ ಕಂಡಿತು. ಆಗ ಪ್ರವೀಣ್ ದುಬೆ ಹಾಗೂ ಶುಭಾಂಗ್ ಹೆಗ್ಡೆ (29) ಮುರಿಯದ 6ನೇ ವಿಕೆಟ್‌ಗೆ 40 ಎಸೆತಗಳಲ್ಲಿ 70 ರನ್‌ಗಳಿಸಿ ದಡ ಸೇರಿಸಿದರು. ಇದರೊಂದಿಗೆ ಭರ್ತಿ 20 ಓವರ್‌ಗಳಲ್ಲಿ 5 ವಿಕೆಟ್‌ಗೆ 198 ರನ್‌ಗಳಿಸಿದ ಮಯಾಂಕ್ ಪಡೆ ಜಯದ ಸಂಭ್ರಮ ಕಂಡಿತು. ಅಂತಿಮ ಎರಡು ಎಸೆತದಲ್ಲಿ ರಾಜ್ಯ ತಂಡಕ್ಕೆ 7 ರನ್ ಅವಶ್ಯವಿತ್ತು.

ಉತ್ತರಾಖಂಡ: 5 ವಿಕೆಟ್‌ಗೆ 197 (ಅವನೀಶ್ 9, ಪಿಎಸ್ ಚೋಪ್ರಾ 12, ಆಂಜನೇಯ 24, ಕುನಾಲ್ 88, ಶಾಶ್ವತ್ 27*, ವಿದ್ವತ್ 37ಕ್ಕೆ 3, ವೈಶಾಕ್ 32ಕ್ಕೆ 1).

ಕರ್ನಾಟಕ: 5 ವಿಕೆಟ್‌ಗೆ 198 (ಶ್ರೀಜಿತ್ 7, ಮಯಾಂಕ್ 29, ಕರುಣ್ 4, ಸ್ಮರಣ್ 67, ಅಭಿನವ್ 10, ಪ್ರವೀಣ್ ದುಬೆ 38*, ಶುಭಾಂಗ್ 29*, ರಜನ್ 24ಕ್ಕೆ 3, ಹಿಮಾಂಶು 43ಕ್ಕೆ 2). ಪಂದ್ಯಶ್ರೇಷ್ಠ: ಆರ್.ಸ್ಮರಣ್.

ಕರ್ನಾಟಕ್ಕೆ ಮುಂದಿನ ಪಂದ್ಯ

ಎದುರಾಳಿ: ಜಾರ್ಖಂಡ್

ಯಾವಾಗ:ಶುಕ್ರವಾರ

ಎಲ್ಲಿ: ಅಹಮದಾಬಾದ್

ಆರಂಭ: ಸಂಜೆ 4.30

Karnataka