ಮಾತಿಗೆ ಬದ್ಧರಾಮಯ್ಯ ನವ ನಾಯಕತ್ವಕ್ಕೆ ನಾಂದಿ

ಸಿದ್ದರಾಮನಹುಂಡಿ ಎಂಬ ಸಣ್ಣ ಹಳ್ಳಿಯಿಂದ ಬಂದು, 2 ಬಾರಿ ರಾಜ್ಯ ರಾಜಕಾರಣದ ಅತ್ಯುನ್ನತ ಸ್ಥಾನ ಅಲಂಕರಿಸಿದ 77 ವರ್ಷದ ಈ ಹಿರಿಯ ಮುತ್ಸದ್ದಿಯ ನಿರ್ಗಮನ ಕಾಂಗ್ರೆಸ್ ವಲಯದಲ್ಲಷ್ಟೇ ಅಲ್ಲ ಇಡೀ ರಾಜ್ಯ ರಾಜಕಾರಣದಲ್ಲಿ ಸಂಚಲನ ಮೂಡಿಸಿದೆ. ಗುರುವಾರ ಮಧ್ಯಾಹ್ನ ಅವರು ರಾಜಭವನಕ್ಕೆ ತೆರಳಿ ರಾಜ್ಯಪಾಲರಿಗೆ ರಾಜೀನಾಮೆ ಪತ್ರ ಸಲ್ಲಿಸುತ್ತಿದ್ದಂತೆ ಹೊಸ ನಾಯಕತ್ವದ ಆಯ್ಕೆಗಾಗಿ ಕಾಂಗ್ರೆಸ್‌ನಲ್ಲಿ ಹೈಡ್ರಾಮಾ ಮತ್ತು ಕಸರತ್ತುಗಳು ಅಧಿಕೃತವಾಗಿ ಚಾಲನೆ ಪಡೆದುಕೊಳ್ಳಲಿವೆ. ದಿನದ ಬೆಳವಣಿಗೆಯಲ್ಲಿ ಬುಧವಾರ ಸಿದ್ದರಾಮಯ್ಯ ಅವರನ್ನು ಸುತ್ತುವರಿದಿದ್ದ ಆಪ್ತ ಸಚಿವರು, ಶಾಸಕರು ರಾಜೀನಾಮೆ ನೀಡುವ ನಿರ್ಧಾರದಿಂದ ಹಿಂದೆ ಸರಿಯುವಂತೆ ಒತ್ತಾಯಿಸಿದ್ದರು. ಆದರೆ, ಸಿದ್ದರಾಮಯ್ಯ ಮಾತ್ರ ನಿಸ್ತೇಜರಾಗಿ ಕಾಣಿಸಿ ಯಾವುದಕ್ಕೂ ಪ್ರತಿಕ್ರಿಯಿಸಲೇ ಇಲ್ಲ. ಮುಖ್ಯಮಂತ್ರಿಯಾಗಿ ತಮ್ಮ ಕೊನೆಯ ಕರ್ತವ್ಯ ಎಂಬಂತೆ ಬುಧವಾರ ಸಂಜೆ ವಿಧಾನಸೌಧಕ್ಕೆ ಆಗಮಿಸಿ ಹಿಂದುಳಿದ ವರ್ಗಗಳ ಆಯೋಗ ಸಿದ್ಧಪಡಿಸಿದ್ದ ಜಾತಿ ಗಣತಿ ವರದಿ ಸ್ವೀಕರಿಸಿದರು. ಈ ಸಂದರ್ಭದಲ್ಲೂ ಸಿಎಂ ಮುಖದಲ್ಲಿ ಖುಷಿ ಕಾಣಲಿಲ್ಲ.

ಇನ್ನು ಸಿದ್ದರಾಮಯ್ಯ ರಾಜೀನಾಮೆ ನೀಡಿದ ಬಳಿಕ ಕಾಂಗ್ರೆಸ್ ಶಾಸಕಾಂಗ ಪಕ್ಷದ (ಸಿಎಲ್‌ಪಿ) ನೂತನ ನಾಯಕನ ಆಯ್ಕೆ ಪ್ರಕ್ರಿಯೆ ತೀವ್ರಗೊಳ್ಳಲಿದೆ. ಹೈಕಮಾಂಡ್ ಸೂಚನೆಯಂತೆ ದೆಹಲಿಯಿಂದ ಬರುವವಿಶೇಷ ವೀಕ್ಷಕರ ಸಮ್ಮುಖದಲ್ಲಿ ಶಾಸಕರ ಸಭೆ ನಡೆಯಲಿದ್ದು, ಮುಂದಿನ ಮುಖ್ಯಮಂತ್ರಿ ಯಾರೆಂಬ ಯಕ್ಷಪ್ರಶ್ನೆಕ್ಕೆ ಉತ್ತರ ನೀಡುವ ಅಧಿಕೃತ ಪ್ರಕ್ರಿಯೆ ಆರಂಭವಾಗಲಿದೆ. ಸದ್ಯದ ಪರಿಸ್ಥಿತಿಯಲ್ಲಿ ಪಕ್ಷ ಮುನ್ನಡೆಸಬಲ್ಲ, ಎಲ್ಲ ಬಣಗಳನ್ನು ಸಮಾನವಾಗಿ ಕೊಂಡೊಯ್ಯಬಲ್ಲ ಮತ್ತು ಮುಂಬರುವ ಸವಾಲು ಎದುರಿಸಬಲ್ಲ ಸಮರ್ಥ ನಾಯಕನಾಗಿ ಡಿ.ಕೆ. ಶಿವಕುಮಾರ್ ಹೆಸರು ಮುಂಚೂಣಿಯಲ್ಲಿದೆ. ಇವರನ್ನು ಹೊರತುಪಡಿಸಿ ಗೃಹ ಸಚಿವ ಪರಮೇಶ್ವರ ಹೆಸರು ಕೇಳಿಬಂದಿದೆಯಾದರೂ ಸ್ಪಷ್ಟ ರೂಪ ಪಡೆದುಕೊಂಡಿಲ್ಲ.

ಈ ನಡುವೆ ಶಾಸಕರ ಅಭಿಪ್ರಾಯ ಪಡೆದೇ ಹೈಕಮಾಂಡ್ ಮುಂದುವರಿಯಬೇಕೆಂಬ ಕೂಗು ಸಿಎಂ ಆಪ್ತ ಶಾಸಕರು, ಸಚಿವರಲ್ಲಿದೆ. ಹಾಗೆಯೇ ನೀವೇಕೆ ಹೈಕಮಾಂಡ್ ಮಾತು ಒಪ್ಪಿ ಬಂದಿರಿ, ನಮ್ಮ ಅಭಿಪ್ರಾಯ ಪಡೆದು ನೀವು ಮುಂದುವರಿಯಬೇಕಿತ್ತು ಎಂದು ಕೆಲವು ಶಾಸಕರು ವಾದ ಮಂಡಿಸಿದರೂ ಸಿದ್ದರಾಮಯ್ಯ ಮಾತ್ರ ಯಾವುದಕ್ಕೂ ಪ್ರತಿಕ್ರಿಯೆ ನೀಡಲಿಲ್ಲ.

ಮುಸ್ಲಿಂ, ದಲಿತ, ಲಿಂಗಾಯತ ಅಥವಾ ಒಬಿಸಿ ಸಮುದಾಯಕ್ಕೆ ಸೇರಿದವರು ಡಿಸಿಎಂ ಆಗಬಹುದು.

ಸಿದ್ದರಾಮಯ್ಯ ಸಂಪುಟದಲ್ಲಿರುವ ನಾಲ್ವರು ಹಿರಿಯ ಸಚಿವರು ಹೊಸ ಸಂಪುಟ ಸೇರದಿರಲು ನಿರ್ಧರಿಸಿದ್ದಾರೆ.

ಡಿಸಿಎಂ ಹುದ್ದೆ, ಕೆಪಿಸಿಸಿ ಅಧ್ಯಕ್ಷ, ಕಾರ್ಯಾಧ್ಯಕ್ಷರ ನೇಮಕದಲ್ಲಿ ಜಾತಿ ಸಮೀಕರಣಕ್ಕೆ ಪ್ರಾಧಾನ್ಯತೆ ನಿರೀಕ್ಷೆ.

ಮುಖ್ಯಮಂತ್ರಿ ಸ್ಥಾನಕ್ಕೆ ಸಿದ್ದರಾಮಯ್ಯ ರಾಜೀನಾಮೆಯೊಂದಿಗೆ ಇಡೀ ಸಂಪುಟವೇ ವಿಸರ್ಜನೆಗೊಳ್ಳುವುದರಿಂದ, ಹೊಸದಾಗಿ ಅಧಿಕಾರ ವಹಿಸಿಕೊಳ್ಳುವ ಸಿಎಂ ಜತೆ ಯಾರೆಲ್ಲ ಸಚಿವರಾಗಿ ಪ್ರಮಾಣ ವಚನ ಸ್ವೀಕರಿಸಲಿದ್ದಾರೆ ಎಂಬ ಕುತೂಹಲ ಹೆಚ್ಚಾಗಿದೆ. ಪ್ರಾದೇಶಿಕ ಸಮತೋಲನ, ಜಾತಿ ಸಮೀಕರಣ ಮತ್ತು ಹಿರಿಯ-ಕಿರಿಯ ಶಾಸಕರ ನಡುವಿನ ಸಮನ್ವಯತೆ ಕಾಯ್ದುಕೊಂಡು ಹೊಸ ತಂಡ ಕಟ್ಟುವುದು ಕಾಂಗ್ರೆಸ್ ಪಾಲಿಗೆ ಕತ್ತಿಯ ಮೇಲಿನ ನಡಿಗೆಯಾಗಲಿದೆ. ಹೈಕಮಾಂಡ್ ಅಂಗಳದಲ್ಲಿ ಈಗಾಗಲೇ ಸಚಿವ ಸ್ಥಾನದ ಆಕಾಂಕ್ಷಿಗಳ ಪಟ್ಟಿ ಸಿದ್ಧವಾಗಿದೆ.

ಎಐಸಿಸಿ ನಿರ್ದೇಶನದ ಮೇರೆಗೆ ಬೆಂಗಳೂರಿನಲ್ಲಿ ಕಾಂಗ್ರೆಸ್ ಶಾಸಕಾಂಗ ಪಕ್ಷದ ತುರ್ತು ಸಭೆ ಕರೆಯಲಾಗುತ್ತದೆ. ಸಭೆಗೆ ಪಕ್ಷದ ಎಲ್ಲ ವಿಧಾನಸಭಾ ಮತ್ತು ಪರಿಷತ್ ಸದಸ್ಯರಿಗೂ ಆಹ್ವಾನ.

ಪಕ್ಷದ ಶಿಷ್ಟಾಚಾರದಂತೆ ನಡೆಯುವುದಾದರೆ ವೀಕ್ಷಕರು ಪ್ರತಿ ಶಾಸಕರನ್ನು ವೈಯಕ್ತಿಕವಾಗಿ ಭೇಟಿ ಮಾಡಿ, ಮುಂದಿನ ಸಿಎಂ ಯಾರಾಗಬೇಕು ಎಂಬ ಬಗ್ಗೆ ವೈಯಕ್ತಿಕ ಅಭಿಪ್ರಾಯ ಪಡೆಯಲಿದ್ದಾರೆ.

ಸಾಮಾನ್ಯವಾಗಿ ಶಾಸಕಾಂಗ ಪಕ್ಷದ ಸಭೆಯಲ್ಲಿ ಮುಂದಿನ ನಾಯಕನನ್ನು ಆಯ್ಕೆ ಮಾಡುವ ಅಂತಿಮ ನಿರ್ಧಾರವನ್ನು ಕಾಂಗ್ರೆಸ್ ಹೈಕಮಾಂಡ್ ತನ್ನ ವಿವೇಚನೆಯಂತೆ ಪ್ರಕಟಿಸಲಿದೆ.

ಬಳಿಕ ಶಾಸಕಾಂಗ ಪಕ್ಷದ ನಾಯಕ ಮುಖ್ಯಮಂತ್ರಿಯಾಗಿ ಪ್ರಮಾಣ ವಚನ ಸ್ವೀಕರಿಸಲು ರಾಜ್ಯಪಾಲರನ್ನು ಭೇಟಿ ಮಾಡಿ ಹಕ್ಕೊತ್ತಾಯ ಮಂಡಿಸಲಿದ್ದು, ರಾಜಭವನ ಅನುಮತಿ ನೀಡಲಿದೆ.

ಬೆಳಗ್ಗೆ ಕಾವೇರಿ ನಿವಾಸದಲ್ಲಿ ಸಿಎಂ ಸಿದ್ದರಾಮಯ್ಯ ಆಪ್ತರ ಸಭೆ

ಸಿಎಂ ಪರ ನಿಂತ ನಾಯಕರು, ರಾಜೀನಾಮೆ ನೀಡದಂತೆ ಒತ್ತಾಯ

ವಿಧಾನಸೌಧಕ್ಕೆ ತೆರಳಿ ನೆಹರು ಪುಣ್ಯಸ್ಮರಣೆಯಲ್ಲಿ ಭಾಗಿಯಾದ ಸಿಎಂ

ಮತ್ತೆ ಕಾವೇರಿಯಲ್ಲಿ ಆಪ್ತರ ಜತೆ ಸಭೆ, ಸಹಿ ಸಂಗ್ರಹ ಬೇಡವೆಂದ ಸಿಎಂ

ತಮ್ಮ ಪರ ನಿಲ್ಲದ ರಾಹುಲ್ ಗಾಂಧಿ ಬಗ್ಗೆ ಸಿದ್ದರಾಮಯ್ಯ ಬೇಸರ

ಸಿದ್ದರಾಮಯ್ಯ ಭೇಟಿಯಾದ ಸುರ್ಜೆವಾಲ, ಯಾವುದೇ ಚರ್ಚೆಯಿಲ್ಲ

ಯಾವುದೂ ನಿಜವಲ್ಲ, ಎಲ್ಲವೂ ಊಹಾಪೋಹವೆಂದ ಸುರ್ಜೆವಾಲ

ಪಕ್ಷಕ್ಕಾಗಿ ಸಿದ್ದರಾಮಯ್ಯ ಅವರು ದುಡಿದಿದ್ದಾರೆ ಎಂದ ಸುರ್ಜೆವಾಲ

ವಿಧಾನಸೌಧಕ್ಕೆ ಆಗಮಿಸಿದ ಸಿಎಂ, ಜಾತಿಗಣತಿ ವರದಿ ಸ್ವೀಕಾರ

ತಮ್ಮ ಕಚೇರಿ ಸಿಬ್ಬಂದಿಗೆ ಧನ್ಯವಾದ ತಿಳಿಸಿದ ಸಿದ್ದರಾಮಯ್ಯ

ಮತ್ತೆ ಆಪ್ತ ಸಚಿವರಿಂದ ಸಿಎಂ ಭೇಟಿ, ನಾಳಿನ ಕಾರ್ಯತಂತ್ರ ಚರ್ಚೆ

ದೆಹಲಿಯಿಂದ ಬೆಂಗಳೂರಿಗೆ ಆಗಮಿಸಿದ ಡಿಸಿಎಂ ಡಿ.ಕೆ. ಶಿವಕುಮಾರ್