ಬಾರದ ಮಳೆ ಬರಿದಾದ ಕೆರೆಗಳು rain

ಮುಂಗಾರು ಹಾಗೂ ಹಿಂಗಾರು ಎರಡೂ ಮಳೆಗಳು ಸಂಪೂರ್ಣ ಕೈಕೊಟ್ಟಿದ್ದರಿಂದ ಕೆರೆಗಳು ಒಣಗಿ ನಿಂತಿದ್ದು, ಇದು ತಾಲೂಕಿನ ರೈತಾಪಿ ವರ್ಗದ ಆತಂಕಕ್ಕೆ ಕಾರಣವಾಗಿದೆ. ಉಳಿದ ಕೆರೆಗಳಲ್ಲೂ ಶೇ.70 ನೀರು ಖಾಲಿಯಾಗಿದೆ. ಇನ್ನು ತಾಲೂಕಿನಲ್ಲಿ ಅಂತರ್ಜಲಮಟ್ಟ ತೀವ್ರವಾಗಿ ಕುಸಿದು ಕೊಳವೆಬಾವಿಗಳು ಬತ್ತುತ್ತಿದ್ದು, ಮುಂದಿನ ದಿನಗಳಲ್ಲಿ ಜನ ಮತ್ತು ಜಾನುವಾರುಗಳಿಗೆ ಕುಡಿಯುವ ನೀರಿನ ಅಭಾವ ಎದುರಾಗುವ ಭೀತಿ ವ್ಯಕ್ತವಾಗಿದೆ.

ಚಿಕ್ಕನಾಯಕನಹಳ್ಳಿ ತಾಲೂಕಿಗೆ 12 ವರ್ಷಗಳ ಹಿಂದೆಯೇ ಹೇಮಾವತಿ ನದಿ ನೀರು ಹರಿಸುವ ಯೋಜನೆ ಮಂಜೂರಾಗಿದ್ದರೂ ಕಾಮಗಾರಿ ಇಂದಿಗೂ ಪೂರ್ಣಗೊಂಡಿಲ್ಲ. 26 ಕೆರೆಗಳಿಗೆ ಹರಿಯಬೇಕಿದ್ದ ಹೇಮಾವತಿ ನದಿ ನೀರು ಕೇವಲ ಶೆಟ್ಟಿಕೆರೆ, ಸಾಸಲು ಮತ್ತು ತಿಮ್ಮಾಪುರ ಕೆರೆಗಳಿಗೆ ಮಾತ್ರ ಸೀಮಿತವಾಗಿದೆ. ಇನ್ನೊಂದೆಡೆ ಭದ್ರಾ ಮೇಲ್ದಂಡೆ ಹಾಗೂ ಎತ್ತಿನಹೊಳೆ ಯೋಜನೆಗಳು ಕುಂಟುತ್ತ ಸಾಗುತ್ತಿರುವುದರಿಂದ ತಾಲೂಕಿನ ಕೆರೆಗಳು ಇಂದಿಗೂ ಮಳೆಯನ್ನೇ ನೆಚ್ಚಿಕೊಳ್ಳುವಂತಾಗಿದೆ.

ತಾಲೂಕಿನಲ್ಲಿಯೇ ಅತಿ ಹೆಚ್ಚು ಅಂದರೆ 305.10 ಹೆಕ್ಟೇರ್​ ಅಚ್ಚುಕಟ್ಟು ಹೊಂದಿರುವ ಸಿದ್ಧನಕಟ್ಟೆ ಕೆರೆ ಸೇರಿ ಬಾವನಹಳ್ಳಿ ದುರ್ಗದ ಕೆರೆ (183.46 ಹೆಕ್ಟೇರ್​), ಬಾವನಹಳ್ಳಿ ಹೊಸಕೆರೆ (182.60 ಹೆಕ್ಟೇರ್​), ನವಿಲೆಕೆರೆ (147.29 ಹೆಕ್ಟೇರ್​) ಹಾಗೂ ಕಂದಿಕೆರೆ ನೊಣವಿನ ಕೆರೆಗಳು ಸಂಪೂರ್ಣ ಬರಿದಾಗಿವೆ. ಇದರಿಂದಾಗಿ ಸಾವಿರಾರು ಎಕರೆ ಪ್ರದೇಶದಲ್ಲಿದ್ದ ತೆಂಗು, ಅಡಿಕೆ ಹಾಗೂ ದಿನನಿತ್ಯದ ಬೆಳೆಗಳು ಒಣಗಿ ರೈತರು ಬೆಳೆ ನಷ್ಟದ ಜತೆಗೆ ತೀವ್ರ ಅರ್ಥಿಕ ನಷ್ಟ ಅನುಭವಿಸುವಂತಾಗಿದೆ. ಕೆರೆಗಳಲ್ಲಿ ಹನಿ ನೀರಿಲ್ಲದೆ ಜಾನುವಾರುಗಳು, ಪಕ್ಷಿಗಳು ಹಾಗೂ ಕಾಡುಪ್ರಾಣಿಗಳು ಅಲೆಯುವಂತಾಗಿದ್ದು, ರೈತರು ಮೇವಿಗಾಗಿ ಪರದಾಡುತ್ತಿದ್ದಾರೆ. ಇನ್ನು ತಾಲೂಕಿನಲ್ಲಿ ಮೇವಿನ ಬಿತ್ತನೆ ಬೀಜಗಳನ್ನು ರೈತರಿಗೆ ಸಮರ್ಪಕವಾಗಿ ವಿತರಣೆ ಮಾಡದ ಕಾರಣ ಮೇವು ಬೆಳೆಯುವ ಪ್ರಮಾಣವೂ ಕುಂಟಿತವಾಗಿದ್ದು, ಹಸಿ ಮೇವು ಸಿಗದಂತಹ ಸ್ಥಿತಿ ನಿರ್ಮಾಣವಾಗಿದೆ.

ತಾಲೂಕುಮಟ್ಟದಲ್ಲಿ ತಕ್ಷಣವೇ ಟಾಸ್ಕ್​ ಫೋರ್ಸ್​ ಸಭೆ ನಡೆಸಿ, ಕುಡಿಯುವ ನೀರಿನ ಅಭಾವವಿರುವ ಗ್ರಾಮಗಳಿಗೆ ಪರ್ಯಾಯ ನೀರು ಪೂರೈಕೆ ಮಾಡಬೇಕು. ಹೈನುಗಾರರ ನೆರವಿಗೆ ತಾಲೂಕಿನಾದ್ಯಂತ ಉಚಿತ ಮೇವು ಬ್ಯಾಂಕ್​ ಸ್ಥಾಪಿಸಬೇಕು. ಹೇಮಾವತಿ ಯೋಜನೆಯ ಬಾಕಿ ಕಾಮಗಾರಿಗಳನ್ನು ತ್ವರಿತವಾಗಿ ಮುಗಿಸಿ, ತಕ್ಷಣವೇ ಕೆರೆಗಳಿಗೆ ನೀರು ಹರಿಸಲು ಕ್ರಮ ಕೈಗೊಳ್ಳಬೇಕು ಎಂಬುದು ತಾಲೂಕಿನ ಜನತೆಯ ಆಗ್ರಹವಾಗಿದೆ.

ಬಾವನಹಳ್ಳಿ ದುರ್ಗದ ಕೆರೆ, ಬಾವನಹಳ್ಳಿ ಹೊಸಕೆರೆ, ನವಿಲೆ ಕೆರೆ, ನಾಗತಿಹಳ್ಳಿ ಕೆರೆ, ಮುದ್ದೇನಹಳ್ಳಿ ಊರಮುಂದಿನ ಕೆರೆ, ಮುದ್ದೇನಹಳ್ಳಿ ಮೇಲಿನ ಕೆರೆ, ಮಾದಿಹಳ್ಳಿ, ಗೋಪಾಲನಹಳ್ಳಿ, ಪಂಕಜನಹಳ್ಳಿ, ಕಂದಿಕೆರೆ ನೊಣವಿನ ಕೆರೆ, ಕಂದಿಕೆರೆ ಹಿರೇಕೆರೆ, ಸಾದರಹಳ್ಳಿ ರಂಗನಕೆರೆ, ಸಿದ್ದನಕಟ್ಟೆ ಕೆರೆ, ಬೆಳವಾಡಿಕೆರೆ, ಅತ್ರಿಹಾಳ್​, ಶಿಡ್ಯಾ ಅಕ್ಕನವರ ಕೆರೆ, ಬಂಗಾರಕೆರೆ, ಸೊರಲಮಾವು, ಹೊಸಕೆರೆ, ಯಳ್ಳೇನಹಳ್ಳಿ, ಬೆಳಗುಲಿ, ಸೋಮನಹಳ್ಳಿ ಮತ್ತು ದಗ್ಗೇನಹಳ್ಳಿ ಕೆರೆಗಳಲ್ಲಿ ನೀರಿಲ್ಲದೆ ಅಂತರ್ಜಲ ತಳ ಕಂಡಿದೆ.