ರಾಯಚೂರು ಜಿಲ್ಲಾ ಉತ್ಸವ; ಕವಿತೆ ಕೇಳುವವರಿಗಿಂತ ವಾಚಕರೇ ಹೆಚ್ಚು

ನಗರದ ಮಹಿಳಾ ಸಮಾಜದ ಆವರಣದಲ್ಲಿ ರಾಯಚೂರು ಜಿಲ್ಲಾ ಉತ್ಸವ ನಿಮಿತ್ತ ಶನಿವಾರ ಆಯೋಜಿಸಿದ್ದ ಯುವಕವಿಗೋಷ್ಠಿಯಲ್ಲಿ ಯುವಮನಸ್ಸುಗಳು, ಸಾಹಿತ್ಯಾಸಕ್ತರ ಕೊರತೆ ಎದ್ದುಕಂಡಿತು. ಕೇಳುಗರಿಗಿಂತ ಕವನ, ಕವಿತೆ ವಾಚನ ಮಾಡುವ ಕವಿಗಳು ಮತ್ತು ಅತಿಥಿಗಳ ಸಂಖ್ಯೆ ಅಧಿಕವಿತ್ತು.

ವಾಚಕರು, ಯುವಕವಿಗಳು, ಪ್ರೋತ್ಸಾಹಿಸುವ ಸಾಹಿತಿಗಳನ್ನು ಹೊರತುಪಡಿಸಿದರೆ ಕವಿಗೋಷ್ಠಿ ಆಯೋಜಿಸಿದ್ದ ಆವರಣದಲ್ಲಿ ಖಾಲಿ ಕುರ್ಚಿಗಳೇ ಪ್ರೇಕ್ಷಕರಂತಿದ್ದವು. ಯುವಕವಿಗಳು ಒಡಲಾಳದ ನೋವು, ತೊಳಲಾಟ, ಜಿಲ್ಲೆಯ ಸಂಪತ್ತು, ದೌರ್ಜನ್ಯ, ದಬ್ಬಾಳಿಕೆ, ಸ್ತ್ರೀ ಸಂವೇದನೆ ಸೇರಿ ವಿವಿಧ ವಿಷಯದ ಕುರಿತು ವಿಭಿನ್ನವಾಗಿ ಕವಿತೆ ವಾಚನವನ್ನೇನೂ ಮಾಡಿದರು. ಆದರೆ, ಕೇಳುವ ಯುವಕರು, ಆಸಕ್ತರ ಅಭಾವ ಯುವಕರಲ್ಲಿನ ಕ್ರಿಯಾಶೀಲತೆ ಕುಂಟಿತಕ್ಕೆ ಕನ್ನಡಿಯಂತಿತ್ತು.

ಗೋಷ್ಠಿಗೆ ಚಾಲನೆ ನೀಡಿದ ದಲಿತ ಸಾಹಿತ್ಯ ಪರಿಷತ್ ಜಿಲ್ಲಾಧ್ಯಕ್ಷ ತಾಯರಾಜ್ ಮರ್ಚೆಟ್ಹಾಳ ಮಾತನಾಡಿ, ಪದ್ಯ ರೂಪದಲ್ಲಿ ಬರದಿದ್ದೆಲ್ಲ ಕವಿತೆ ಎಂಬ ಭ್ರಮೆಯಲ್ಲಿರಬಾರದು. ಕವಿಗೆ ಸಮಾಜದಲ್ಲಿನ ಸಮಗ್ರತೆಯ ಅರಿವಿರಬೇಕು. ಯುವಕರು ತಾಳ್ಮೆ, ವೈಚಾರಿಕತೆ ಮರೆತ್ತಿರುವುದು ನೋವಿನ ಸಂಗತಿ. ಕವಿತೆ ಸಾಮಾಜಿಕ ಸಂವೇದನೆ, ವರ್ತಮಾನದ ತಲ್ಲಣಗಳಿಗೆ ಸ್ಪಂದಿಸುವಂತಿರಬೇಕು ಎಂದರು.

ಯುವಕವಿಗಳಾದ ಸುರೇಶ ಜಿ.ಗುರುಗುಂಟಾ, ಅಯ್ಯಣ್ಣ ನಾಯಕ, ಶ್ರೀಧರ್, ದೇವರಾಜ ಭಂಡಾರಿ ಸೇರಿ ಹಲವರು ಕವನವಾಚನ ಮಾಡಿದರು. ಆಕಾಶವಾಣಿ ಮುಖ್ಯಸ್ಥ ವೆಂಕಟೇಶ ಬೇವಿನಬೆಂಚಿ, ವಾರ್ತಾಧಿಕಾರಿ ಗವಿಸಿದ್ದಪ್ಪ ಹೊಸಮನಿ, ಕಸಾಪ ಮಾನ್ವಿ ತಾಲೂಕು ಅಧ್ಯಕ್ಷ ಶರಣಬಸವ ನೀರಮಾನ್ವಿ, ತಹಸೀಲ್ದಾರ್ ಪರಶುರಾಮ, ಸಾಹಿತಿ ಚನ್ನಬಸಯ್ಯ ಹಿರೇಮಠ ಇತರರಿದ್ದರು.