ಬೆಂಗಳೂರು : ಭಾರತ ಸರ್ಕಾರದ ರಕ್ಷಣಾ ಸಚಿವಾಲಯದ ರಕ್ಷಣಾ ಖಾತೆಗಳ ನಿಯಂತ್ರಕ ಜನರಲ್ ಅವರ ಆಶ್ರಯದಲ್ಲಿ, ಬೆಂಗಳೂರಿನ ರಕ್ಷಣಾ ಖಾತೆಗಳ ಪ್ರಧಾನ ನಿಯಂತ್ರಕರ ಕಚೇರಿಯು, ರಕ್ಷಣಾ ಪಿಂಚಣಿದಾರರು ಮತ್ತು ಕುಟುಂಬ ಪಿಂಚಣಿದಾರರಿಗೆ ರಕ್ಷಣಾ ಪಿಂಚಣಿ ಎಸ್‌ಪಿಎಆರ್‌ಎಸ್‌ಎಚ್ (ಸ್ಪರ್ಶ್) ಸಂಬಂಧಿತ ಕುಂದುಕೊರತೆಗಳನ್ನು ಪರಿಹರಿಸುವಲ್ಲಿ ಮತ್ತು ಡಿಜಿಟಲ್ ಲೈಫ್ ಸರ್ಟಿಫಿಕೇಟ್ (ಡಿಎಲ್ಸಿ) ಸಲ್ಲಿಸಲು ಅನುಕೂಲವಾಗುವಂತೆ ನ.4 ಮತ್ತು 5 ರಂದು ಸ್ಪರ್ಶ್ ಜನಸಂಪರ್ಕ ಕಾರ್ಯಕ್ರಮ ಆಯೋಜಿಸಿದೆ.
ಡಿಎಲ್ಸಿ ಅಭಿಯಾನ 5.0 ನವೆಂಬರ್ ತಿಂಗಳು ಪೂರ್ತಿ ಮುಂದುವರಿಯಲಿದ್ದು, ಪಿಂಚಣಿದಾರರು ಎಲ್ಲಾ ಸ್ಪರ್ಶ್ ಸೇವಾ ಕೇಂದ್ರಗಳಲ್ಲಿ ಡಿಎಲ್ಸಿ ಸೌಲಭ್ಯವನ್ನು ಪಡೆಯಬಹುದು. ರಕ್ಷಣಾ ಪಿಂಚಣಿದಾರರು ಮತ್ತು ಕುಟುಂಬ ಪಿಂಚಣಿದಾರರು ತಮ್ಮ ರಕ್ಷಣಾ ಪಿಂಚಣಿ ಸ್ಪರ್ಶ್ ಸಂಬಂಧಿತ ಕುಂದುಕೊರತೆಗಳನ್ನು ಗುರುತಿಸಲು ಮತ್ತು ಪರಿಹರಿಸಲು ಸಹಾಯವನ್ನು ಪಡೆಯಲು ಮತ್ತು ಸ್ಥಳದಲ್ಲೇ ತಮ್ಮ ಡಿಜಿಟಲ್ ಜೀವಂತ ಪ್ರಮಾಣಪತ್ರಗಳನ್ನು ಸಲ್ಲಿಸಲು ಅವಕಾಶವಿರುತ್ತದೆ. ಸ್ಪರ್ಶ್ ಮತ್ತು ಪಿಂಚಣಿ ಸಂಬಂಧಿತ ಎಲ್ಲಾ ಪ್ರಶ್ನೆಗಳಿಗೆ ಸ್ಥಳದಲ್ಲೇ ಸಹಾಯ, ಮಾರ್ಗದರ್ಶನ ಮತ್ತು ಬೆಂಬಲವನ್ನು ಒದಗಿಸಲು ನುರಿತ ತಂಡ ಲಭ್ಯವಿರುತ್ತದೆ.
ನ.4 ಮತ್ತು 5ರಂದು ಬೆಳಗ್ಗೆ 10 ರಿಂದ ಸಂಜೆ 5ರವರೆಗೆ, ಲೋವರ್ ಅಗರಂ ರಸ್ತೆಯಲ್ಲಿರುವ ಮಲ್ಟಿ ಪರ್ಪಸ್ ಹಾಲ್ನಲ್ಲಿ ಕಾರ್ಯಕ್ರಮ ನಡೆಯಲಿದೆ. ಸಭೆಯಲ್ಲಿ ಪಾಲ್ಗೊಳ್ಳುವವರು ಮೂಲ ಪಿಂಚಣಿ ಪುಸ್ತಕ ಅಥವಾ ಡಿಸ್‌ಚಾರ್ಜ್ ದಾಖಲೆ, ಮಾಜಿ ಸೈನಿಕರ ಗುರುತಿನ ಚೀಟಿ, ಬ್ಯಾಂಕ್ ಪಾಸ್‌ಬುಕ್ ಮತ್ತು ಪಿಂಚಣಿ ಪಾವತಿ ಆದೇಶ, ಆಧಾರ್ ಕಾರ್ಡ್ ಮತ್ತು ಆಧಾರ್‌ಗೆ ಲಿಂಕ್ ಮಾಡಲಾದ ಮೊಬೈಲ್ ಫೋನ್, ಪ್ಯಾನ್ ಕಾರ್ಡ್, ಹಿಂದಿನ ಯಾವುದೇ ಕುಂದುಕೊರತೆ-ಸಂಬಂಧಿತ ದಾಖಲೆಗಳು ಅಥವಾ ಪತ್ರವ್ಯವಹಾರದ ವಿವರಗಳನ್ನು ತರಬೇಕು.
