ರಾಜ್ಯ

ಆಷಾಢದ ಬಿರುಗಾಳಿಗೆ ತತ್ತರಗೊಂಡ ಜನ / VIJAYAPUR

ವಿಜಯಪುರ ಬಸವೇಶ್ವರನಗರದ ಉದ್ಯಾನವನದ ಬಳಿಯಿರುವ ಸುಮಾರು 20&25 ವರ್ಷಗಳ ಹಳೆಯದಾದ, 40 ಅಡಿ ಎತ್ತರದ ಸಿಲ್ವರ್​ ಟ್ರೀ ಮರ ಬುಡಸಮೇತ ವಾಲಿದ್ದುದನ್ನು ಅರಣ್ಯ ಇಲಾಖೆಯವರು ತೆರವುಗೊಳಿಸಿರುವುದು.
ವಿಜಯಪುರ ಬಸವೇಶ್ವರನಗರದ ಉದ್ಯಾನವನದ ಬಳಿಯಿರುವ ಸುಮಾರು 20&25 ವರ್ಷಗಳ ಹಳೆಯದಾದ, 40 ಅಡಿ ಎತ್ತರದ ಸಿಲ್ವರ್​ ಟ್ರೀ ಮರ ಬುಡಸಮೇತ ವಾಲಿದ್ದುದನ್ನು ಅರಣ್ಯ ಇಲಾಖೆಯವರು ತೆರವುಗೊಳಿಸಿರುವುದು.
Published on: 
ವಿಜಯಪುರ : ಆಷಾಢ ಮಾಸ ಆರಂಭಕ್ಕೂ ಮುನ್ನವೇ ಪಟ್ಟಣದಲ್ಲಿ ಬಿರುಗಾಳಿ, ಸುಂಟರಗಾಳಿ ಆರ್ಭಟ ಜೋರಾಗಿದೆ. ಬಿರುಗಾಳಿಯ ಹೊಡೆತಕ್ಕೆ ಮನೆಗಳ ಮೇಲಿನ ಸೀಟುಗಳು, ಶೆಡ್​ಗಳು ಹಾರುತ್ತಿದ್ದು, ಸಾರ್ವಜನಿಕರು ಆತಂಕಗೊಂಡಿದ್ದಾರೆ.
ಭಾನುವಾರ ಸಂಜೆ 6 ಬೀಸಿದ ಗಾಳಿಗೆ ಇಲ್ಲಿನ ಬಸವೇಶ್ವರನಗರದ ಉದ್ಯಾನವನದ ಬಳಿಯಿರುವ ಸುಮಾರು 25 ವರ್ಷಗಳ ಹಳೆಯದಾದ, 40 ಅಡಿ ಉದ್ದದ ಸಿಲ್ವರ್​ ಮರವೊಂದುಬುಡಸಮೇತ ವಾಲಿದೆ. ವಿದ್ಯುತ್​ ಕಂಬ, ರಸ್ತೆ ಹಾಗೂ ಮನೆಗಳ ಮೇಲೆ ಯಾವುದೇ ಕ್ಷಣದಲ್ಲಾದರೂ ಬಿದ್ದು ಅನಾಹುತ ಸೃಷ್ಟಿಸುವ ಭೀತಿ ಎದುರಾಗಿದೆ. ಆದರೆ, ಸಾರ್ವಜನಿಕರ ಪ್ರಾಣ ಮತ್ತು ಆಸ್ತಿ ರಸಬೇಕಾದ ಅರಣ್ಯ ಇಲಾಖೆ ಮಾತ್ರ ಈ ವಿಷಯದಲ್ಲಿ ಬೇಜವಾಬ್ದಾರಿತನ ಪ್ರದರ್ಶಿಸುತ್ತಿರುವುದು ಸಾರ್ವಜನಿಕರ ತೀವ್ರ ಆಕ್ರೋಶಕ್ಕೆ ಕಾರಣವಾಗಿದೆ.
ಹಣಕ್ಕೆ ಬೇಡಿಕೆ?: ಮರ ವಾಲುತ್ತಿರುವ ಬಗ್ಗೆ ಬಸವೇಶ್ವರನಗರದ ಸಾರ್ವಜನಿಕರು ತಕ್ಷಣವೇ ಅರಣ್ಯ ಇಲಾಖೆಗೆ ದೂರು ನೀಡಿದ್ದಾರೆ. ಸ್ಥಳಕ್ಕೆ ಆಗಮಿಸಿದ ಅರಣ್ಯ ಇಲಾಖೆಯ ಸಿಬ್ಬಂದಿ(ವೀಕ್ಷಕ) ಚರಣ್​ ಎಂಬುವವರು, ಮರ ತೆರವುಗೊಳಿಸಲು ಕ್ರೇನ್​ ಅವಶ್ಯಕತೆ ಇದೆ. ಸುತ್ತಮುತ್ತಲಿನ ಸಾರ್ವಜನಿಕರೆಲ್ಲರೂ ಹಣ ಸೇರಿಸಿ ಕೊಟ್ಟರೆ ಕ್ರೇನ್​ ತರಿಸಿ ಮರ ತೆರವುಗೊಳಿಸಿಕೊಡಲಾಗುವುದು ಎಂದು ಹೇಳಿದ್ದಾರೆ ಎನ್ನುವ ಆರೋಪ ಕೇಳಿಬಂದಿದೆ.
ಈ ಕುರಿತಂತೆ ಉಪವಲಯ ಅರಣ್ಯಾಧಿಕಾರಿ ರಮೇಶ್​ ಅವರನ್ನು ದೂರವಾಣಿ ಮೂಲಕ ಸಂಪರ್ಕಿಸಿದಾಗ ಅವರೂ ಕೊಟ್ಟ ಬೇಜವಾಬ್ದಾರಿಯುತ ಉತ್ತರ ಸಾರ್ವಜನಿಕರನ್ನು ಮತ್ತಷ್ಟು ಕೆರಳಿಸಿದೆ. ಪ್ರಾಕೃತಿಕ ವಿಕೋಪಗಳಿಂದ ಸಂಭವಿಸುವ ಹಾಗೂ ಸಂಭವಿಸಲಿರುವ ಸಮಸ್ಯೆಗಳಿಗೆ ಅರಣ್ಯ ಇಲಾಖೆ ಜವಾಬ್ದಾರಿಯಾಗಲು ಸಾಧ್ಯವಿಲ್ಲ. ಯಾರಿಗೆ ಸಮಸ್ಯೆ ಆಗುತ್ತದೆಯೋ ಅವರೇ ಹಣ ವೆಚ್ಚ ಮಾಡಿ ಸಮಸ್ಯೆ ಪರಿಹರಿಸಿಕೊಳ್ಳಬೇಕು. ಮುಂಚೆಯೇ ನಮಗೆ ವಿಷಯ ಹೀಗಾಗುತ್ತದೆ ಎಂದು ತಿಳಿದಿದ್ದರೆ, ನಾವು ಹರಾಜು ಪ್ರಕ್ರಿಯೆ ಮೂಲಕ ಮರ ತೆರವುಗೊಳಿಸಲು ಕ್ರಮ ಕೈಗೊಳ್ಳುತ್ತಿದ್ದೆವು ಎಂಬ ಬೇಜವಾಬ್ದಾರಿ ಉತ್ತರ ನೀಡಿ ನುಣುಚಿಕೊಳ್ಳಲು ಯತ್ನಿಸಿದ್ದಾರೆ.
ಸಂಕಷ್ಟದ ಸಮಯದಲ್ಲಿ ನೆರವಾಗಬೇಕಾದವರು ಹಣ ಮಾಡಿಕೊಳ್ಳುವ ಕೆಟ್ಟ ಬುದ್ಧಿ ಪ್ರದರ್ಶಿಸುತ್ತಿರುವುದು ನಾಚಿಕೆಗೇಡು ಎಂದು ಸಾರ್ವಜನಿಕರು ಅರಣ್ಯ ಇಲಾಖೆ ಅಧಿಕಾರಿಗಳ ವಿರುದ್ಧ ತೀವ್ರ ಆಕ್ರೋಶ ವ್ಯಕ್ತಪಡಿಸಿದ ಬಳಿಕ ಎಚ್ಚೆತ್ತುಕೊಂಡ ಅರಣ್ಯ ಇಲಾಖೆ ಅಧಿಕಾರಿಗಳು ಕ್ರೇನ್​ ತರಿಸಿ ಮರವನ್ನು ರಾತ್ರಿಯೇ ತೆರವುಗೊಳಿಸಿದರು.
ಶಿಸ್ತುಕ್ರಮ ಆಗಲಿ : ಯಾವುದೇ ಅನಾಹುತ ಸಂಭವಿಸುವ ಮುನ್ನವೇ ಎಚ್ಚೆತ್ತುಕೊಳ್ಳುವುದು ಆಡಳಿತದ ಕರ್ತವ್ಯ. ಅನಾಹುತ ನಡೆದ ನಂತರ ಪರಿಹಾರ ನೀಡುವುದಕ್ಕಿಂತ, ಅನಾಹುತ ತಡೆಗೆಮೊದಲ ಆದ್ಯತೆ ನೀಡಬೇಕು. ಉನ್ನತ ಅಧಿಕಾರಿಗಳು ಹಾಗೂ ಸರ್ಕಾರ ತಕ್ಷಣವೇ ಈ ವಿಷಯದಲ್ಲಿ ಮಧ್ಯಪ್ರವೇಶಿಸಿ, ಸಾರ್ವಜನಿಕರಿಂದ ಹಣ ವಸೂಲಿ ಮಾಡಲು ಯತ್ನಿಸಿದ ಅಧಿಕಾರಿಗಳ ವಿರುದ್ಧ ಶಿಸ್ತುಕ್ರಮವಾಗಬೇಕು ಎಂದು ಸಾರ್ವಜನಿಕರು ಆಗ್ರಹಿಸಿದ್ದಾರೆ.
ವಿಜಯವಾಣಿ ನಂ.1 ದಿನ ಪತ್ರಿಕೆ | Vijayavani | Kannada News
www.vijayavani.net