ಸಹೋದರತೆ ಭಾವ ಬೆಳೆಸುತ್ತಿರುವ ಪಂಚಪೀಠ

ಅಫಜಲಪುರ: ಪಂಚಪೀಠಗಳು ಮಾನವ ಧರ್ಮಕ್ಕೆ ಜಯವಾಗಲಿ, ಧರ್ಮದಿಂದಲೇ ವಿಶ್ವಕ್ಕೆ ಶಾಂತಿ ಎಂಬ ಸಂದೇಶ ಸಾರುವ ಮೂಲಕ ದೇಶದಲ್ಲಿ ಸಹೋದರತೆಯ ಭಾವವನ್ನು ಬೆಸೆಯುತ್ತಿವೆ ಎಂದು ಕಾಶಿ ಜಗದ್ಗುರು ಶ್ರೀ ಡಾ.ಮಲ್ಲಿಕಾರ್ಜುನ ವಿಶ್ವಾರಾಧ್ಯ ಶಿವಾಚಾರ್ಯರು ಹೇಳಿದರು.

ಜಹಾಗಿರದಾರ್​ ಫಂನ್​ ಹಾಲ್​ನಲ್ಲಿ ಹಜರತ್​ ಮಲ್ಲಿಕಾರ್ಜುನ ದಾವಲ್​ಮಲೀಕ್​ ಮುತ್ಯಾ ಅವರಿಂದ ಬುಧವಾರ ಹಮ್ಮಿಕೊಂಡಿದ್ದ ಉಚಿತ ಸಾಮೂಹಿಕ ವಿವಾಹ ಸಮಾರಂಭ ಉದ್ಘಾಟಿಸಿ ಮಾತನಾಡಿದ ಅವರು, ಸಾಮೂಹಿಕ ವಿವಾಹಗಳಿಂದ ಎರಡು ಜೋಡಿಗಳನ್ನು ಒಂದು ಮಾಡುವುದರ ಜತೆಗೆ ಸಮಾಜದಲ್ಲಿ ಸೌಹಾರ್ದತೆ ಬೆಳೆಸಿದಂತಾಗುತ್ತದೆ. 84 ಲ ಕೋಟಿ ಜೀವರಾಶಿಗಳ ನಂತರ ಭಗವಂತನು ಕರುಣಿಸಿರುವ ಶ್ರೇಷ್ಠ ಮಾನವ ಜೀವನವನ್ನು ಪರೋಪಕಾರಿ ಕಾರ್ಯಕ್ಕೆ ತೊಡಗಿಸಿದಾಗ ಬದುಕು ಸಾರ್ಥಕವಾಗುತ್ತದೆ ಎಂದರು.

ಶಾಂತಿ ಮಂತ್ರದಿಂದ ಎಲ್ಲವನ್ನು ಗೆಲ್ಲಬಹುದಾಗಿದೆ. ಯುದ್ಧದಿಂದ ಏನನ್ನು ಸಾಧಿಸಲು ಸಾಧ್ಯವಿಲ್ಲ. ನಮ್ಮ ದೇಶದಲ್ಲಿರುವ ವಿವಿಧ ಧರ್ಮಗಳ ಆಚರಣೆ, ತತ್ವ, ಸಿದ್ಧಾಂತ ಬೇರೆ&ಬೇರೆಯಾಗಿದ್ದರೂ ಸಾರುವ ಸಂದೇಶ ಒಂದೆ. ದಾಂಪತ್ಯ ಜೀವನಕ್ಕೆ ಕಾಲಿಡುತ್ತಿರುವ ನವ ದಂಪತಿಗಳು ದೇಹ ಎರಡಾದರೂ ಆತ್ಮ ಒಂದಾಗಿ ಆದರ್ಶಪ್ರಾಯವಾದ ಜೀವನ ಸಾಗಿಸಬೇಕು. ತಂದೆ&ತಾಯಿಯರ ಸೇವೆ ಮಾಡಬೇಕು. ಮಕ್ಕಳಿಗೆ ಒಳ್ಳೆಯ ಸಂಸ್ಕಾರ ನೀಡುವ ಮೂಲಕ ಉತ್ತಮ ನಾಗರಿಕರನ್ನಾಗಿ ರೂಪಿಸಬೇಕು ಎಂದು ಸಲಹೆ ನೀಡಿದರು.

ಶ್ರೀ ವಿಶ್ವಾರಾಧ್ಯ ಮಳೇಂದ್ರ ಶಿವಾಚಾರ್ಯ, ಹಜರತ್​ ದಾವಲ್​ಮಲೀಕ್​ ಮಲ್ಲಿಕಾರ್ಜುನ ಮುತ್ಯಾ, ಶ್ರೀ ಶ್ರೀಕಂಠ ಶಿವಾಚಾರ್ಯ, ಶ್ರೀ ಕೈಲಾಸಲಿಂಗ ಶಿವಾಚಾರ್ಯ, ಶ್ರೀ ಮರುಳಾರಾಧ್ಯ ಶಿವಾಚಾರ್ಯ, ಮಾಜಿ ಸಚಿವ ಮಾಲೀಕಯ್ಯ ಗುತ್ತೇದಾರ್​, ಪ್ರಮುಖರಾದ ಚಂದ್ರಶೇಖರ ಕರಜಗಿ, ಜ್ಯೋತಿ ಪಾಟೀಲ್​, ಮಕ್ಬುಲ್​ ಪಟೇಲ್​, ಮಳೇಂದ್ರ ಡಾಂಗೆ, ಲಚ್ಚಪ್ಪ ಜಮಾದಾರ, ಶಂಕರ ಮ್ಯಾಕೇರಿ, ಪ್ರಭಾವತಿ ಮೇತ್ರಿ, ಶ್ರೀಮಂತ ನಾಗೂರ, ಕೆ.ಜಿ.ಪೂಜಾರಿ, ಎಂ.ಎಲ್​.ಪಟೇಲ್​, ಮಹಾಂತೇಶ ಪಾಟೀಲ್​, ಬಾಬುಮಿಯಾ ಫುಲಾರಿ, ಪ್ರಕಾಶ ಟೊಣ್ಣೆ ಇತರರಿದ್ದರು.

ನಾಲ್ಕು ಜೋಡಿ ವೈವಾಹಿಕ ಜೀವನಕ್ಕೆ ಪದಾರ್ಪಣೆ ಮಾಡಿದವು.