ಚುನಾವಣಾ ಅಕ್ರಮ ತನಿಖೆಗೆ ಎನ್‌ಡಿಎ ಪಟ್ಟು

ಶಾಸಕರ ಕುಮ್ಮಕ್ಕಿನಿಂದ ಚುನಾವಣಾ ಅಕ್ರಮ ಎಸಗಿದ ಸಹಕಾರ ಸಂಘದ ಚುನಾವಣಾಧಿಕಾರಿ ಸುನೀಲ್ ವಿರುದ್ಧ ಕ್ರಮಕೈಗೊಳ್ಳದೆ ಮತಗಳ್ಳತನ ತಡೆದ ಜೆಡಿಎಸ್-ಬಿಜೆಪಿ ಮುಖಂಡರ ವಿರುದ್ಧವೇ ಎ್ಐಆರ್ ದಾಖಲಿಸಿ ವಿಪಕ್ಷಗಳ ಹೋರಾಟ ಹತ್ತಿಕ್ಕಲಾಗುತ್ತಿದೆ ಎಂದು ಪ್ರತಿಭಟನಾನಿರತರು ಆಕ್ರೋಶ ಹೊರಹಾಕಿದರು.

ಮಾ.15ರಂದು ನಡೆದ ಚುನಾವಣೆಯಲ್ಲಿ ಚುನಾವಣಾಧಿಕಾರಿ ಅಕ್ರಮ ಎಸಗಿರುವುದು ಮೇಲ್ನೋಟಕ್ಕೆ ಕಂಡುಬಂದಿದ್ದರೂ ಅಧಿಕಾರ ದುರ್ಬಳಕೆ ಮಾಡಿಕೊಂಡು ವಿಪಕ್ಷಗಳ ಮುಖಂಡರ ಮೇಲೆಯೇ ಪೊಲೀಸರು ಪ್ರಕರಣ ದಾಖಲಿಸಿದ್ದಾರೆ. ಈ ಕುತಂತ್ರಕ್ಕೆ ಕುಣಿಗಲ್ ತಾಲೂಕು ಬಗ್ಗುವುದಿಲ್ಲ ಎಂದು ಶಾಸಕ ರಂಗನಾಥ್ ವಿರುದ್ಧ ಪ್ರತಿಭಟನಾನಿರತರು ಧಿಕ್ಕಾರ ಕೂಗಿದರು.

ಸಹಸ್ರಾರು ಸಂಖ್ಯೆಯಲ್ಲಿ ಪ್ರತಿಭಟನೆಯಲ್ಲಿ ಭಾಗವಹಿಸಿದ್ದ ಕಾರ್ಯಕರ್ತರು ಹುಚ್ಚಮಾಸ್ತಿಗೌಡ ವೃತ್ತದಿಂದ ತಾಲೂಕು ಕಚೇರಿವರೆಗೆ ಶಾಸಕರು ಹಾಗೂ ಸರ್ಕಾರ ವಿರುದ್ಧ ೋಷಣೆ ಕೂಗುತ್ತಾ ಮೆರವಣಿಗೆಯಲ್ಲಿ ತೆರಳಿ, ತಪ್ಪಿತಸ್ಥರ ವಿರುದ್ಧ ಶಿಸ್ತು ಕ್ರಮ ಕೈಗೊಂಡು ನ್ಯಾಯ ನೀಡುವಂತೆ ಆಗ್ರಹಿಸಿದರು.

ತುಮುಲ್ ನಿರ್ದೇಶಕ, ಬಿಜೆಪಿ ಮುಖಂಡ ಡಿ.ಕೃಷ್ಣಕುಮಾರ್ ಮಾತನಾಡಿ, ಶಾಸಕ ರಂಗನಾಥ್‌ಗೆ ಸಹಕಾರ ಸಂಘದ ನಿಯಮದ ಅರಿವಿಲ್ಲ. ಕೇಸು ಹಾಕಿದರೆ ಹೆದರಲ್ಲ. ಮತಯಂತ್ರಗಳ ಬದಲು ಬ್ಯಾಲೆಟ್ ಪೇಪರ್ ಮೂಲಕ ಮತ ದಾನವು ನಡೆಯಲಿ ಎಂದು ವೋಟ್ ಚೋರಿ ಎಂದು ಬೊಬ್ಬೆ ಹೊಡೆಯುವ ರಾಹುಲ್ ಗಾಂಧಿಗೆ ಇವರ ಯೋಗ್ಯತೆ ತಿಳಿಯಲಿ. ಇಂತಹ ರಾಜಕಾರಣ ತಾಲೂಕಿನಲ್ಲಿ ನಡೆಯುವುದಿಲ್ಲ ಎಂದು ಗುಡುಗಿದರು.

ಜಿಪಂ ಮಾಜಿ ಅಧ್ಯಕ್ಷ ಡಾ. ರವಿನಾಗರಾಜಯ್ಯ ಮಾತನಾಡಿ, ಚುನಾವಣಾ ಅಧಿಕಾರಿಯೇ ಕಾಂಗ್ರೆಸ್ ಅಭ್ಯರ್ಥಿಗಳ ಪರ ನಿಂತಿದ್ದಲ್ಲದೆ, ಮತ ಪತ್ರಗಳನ್ನು ಕೈ ಕಾರ್ಯಕರ್ತರಿಗೆ ನೀಡಿ ಅದನ್ನು ಮತಪೆಟ್ಟಿಗೆಗೆ ಹಾಕಿಸುವಾಗ ಸಿಕ್ಕಿಬಿದ್ದಿದ್ದು ಇದನ್ನು ವಿರೋಧಿಸಿ ಪೊಲೀಸರಿಗೆ ಹಿಡಿದು ಕೊಟ್ಟರೂ ಸಹ ಅಂತವರ ಮೇಲೆ ಶಿಸ್ತು ಕ್ರಮ ಕೈಗೊಳ್ಳಲಿಲ್ಲ. ಅದರ ಬದಲು ಹಿಡಿದು ಕೊಟ್ಟವರ ಮೇಲೆಯೇ ಪೊಲೀಸರು ಪ್ರಕರಣ ದಾಖಲಿಸಿದ್ದಾರೆ ಎಂದು ದೂರಿದರು.

ಮನವಿ ಸ್ವೀಕರಿಸಿ ಮಾತನಾಡಿದ ಕರಿಯ ನಾಯಕ್ ಕೂಡಲೇ ಜಿಲ್ಲಾಧಿಕಾರಿಗಳ ಗಮನಕ್ಕೆ ತಂದು ಶೀಘ್ರವಾಗಿ ಈ ಸಹಕಾರ ಸಂಘದ ಚುನಾವಣೆಯ ಸಮಸ್ಯೆ ಬಗೆಹರಿಸುವ ಬಗ್ಗೆ ಭರವಸೆಯಿತ್ತರು.

ಜೆಡಿಎಸ್ ಹಿರಿಯ ಮುಖಂಡ ಕಲ್ಲನಾಯಕನಹಳ್ಳಿ ಶಿವಣ್ಣ, ವರದರಾಜು, ತಾಲೂಕು ಬಿಜೆಪಿ ಪಕ್ಷದ ಅಧ್ಯಕ್ಷ ದಿನೇಶ್ ಕುಮಾರ್, ಮಾಜಿ ಅಧ್ಯಕ್ಷ ಬಲರಾಮ್, ತಾಪಂ ಮಾಜಿ ಅಧ್ಯಕ್ಷ ಹರೀಶ್ ನಾಯ್ಕ , ಪುರಸಭೆ ಮಾಜಿ ಅಧ್ಯಕ್ಷ ಹರೀಶ್, ಎನ್‌ಡಿಎ ಪಕ್ಷದ ಮುಖಂಡರಾದ ದಿಲೀಪ್ ಕುಮಾರ್, ಸುರೇಶ್, ದೀಪು, ಪ್ರೆಸ್ ರಂಗಸ್ವಾಮಿ, ಜೆ.ಟಿ.ಜಗದೀಶ್.ಮಾರುತಿನಾಗಣ್ಣ ಇದ್ದರು.

18 ಕುಣಿಗಲ್ 03