ಅ.11ಕ್ಕೆ ವಿಶ್ವವಿಖ್ಯಾತ ನಾಡಹಬ್ಬ ಮೈಸೂರು ದಸರಾ ಉದ್ಘಾಟನೆ: 2 ದಿನಗಳ ಕಂಬಳಕ್ಕೆ ಮನವಿ

ಬೆಂಗಳೂರು: ಅ.11ರಂದು ವಿಶ್ವವಿಖ್ಯಾತ ನಾಡಹಬ್ಬ ಮೈಸೂರು ದಸರಾ ಉದ್ಘಾಟನೆಗೆ ಸಿಎಂ ಡಿಕೆ ಶಿವಕುಮಾರ್​ ನೇತೃತ್ವದ ಸಭೆಯಲ್ಲಿ ಅಧಿಕೃತ ದಿನಾಂಕ ನಿಗದಿಪಡಿಸಲಾಗಿದೆ.

ಅಕ್ಟೋಬರ್​ 11ರ ಬೆಳಗ್ಗೆ 11ರಿಂದ 11.50ಕ್ಕೆ ಚಾಮುಂಡಿ ಬೆಟ್ಟದಲ್ಲಿ ದಸರಾ ಉದ್ಘಾಟನೆಗೊಳ್ಳಲಿದೆ. ಅ.21ರಂದು ದಸರಾ ಜಂಬೂಸವಾರಿ ನಡೆಯಲಿದ್ದು, ಮಧ್ಯಾಹ್ನ 4 ಗಂಟೆ 10 ನಿಮಿಷಕ್ಕೆ ಮೀನಾ ಲಗ್ನದಲ್ಲಿ ಜಂಬೂ ಸವಾರಿಗೆ ಸಿಎಂ ಮತ್ತು ಗಣ್ಯರು ಪುಷ್ಪಾರ್ಚನೆ ಸಲ್ಲಿಸಲಿದ್ದಾರೆ.

ಆಗಸ್ಟ್​​​ 26ರಂದು ಗಜಪಡೆಗೆ ಅರಮನೆಯಲ್ಲಿ ಪೂಜೆ ಸಲ್ಲಿಕೆ ನಡೆಯಲಿದ್ದು, ದಸರಾ ನಡುವೆಯೇ ಎರಡು ದಿನಗಳ ಕಾಲ ಕಂಬಳ ಆಯೋಜೆನೆಗೂ ಮನವಿ ಮಾಡಲಾಗಿದೆ. ಇದಕ್ಕೆ ಕಂಬಳ ಸಮಿತಿ ಪ್ರತ್ಯೇಕ ಅನುದಾನವನ್ನೂ ಕೋರಿದೆ. ಅಕ್ಟೋಬರ್​ 18 ಮತ್ತು 19ರಂದು ಕಂಬಳ ನಡೆಸಲು ನಿರ್ಧರಿಸಲಾಗಿದೆ.

2025-26ನೇ ಸಾಲಿನ ದಸರಾಗೆ 45 ಕೋಟಿ ರೂ. ಖರ್ಚು ತಗುಲಿತ್ತು. ಈ ನಿಟ್ಟಿನಲ್ಲಿ, 2026-27ನೇ ಸಾಲಿಗೆ 50 ಕೋಟಿ ರೂ. ಅನುದಾನ ಮೀಸಲಿಡುವಂತೆ ಬೇಡಿಕೆ ಇಡಲಾಗಿದೆ. ಪ್ರಸ್ತುತ, ಕನ್ನಡ ಮತ್ತು ಸಂಸ್ಕೃತಿ ಇಲಾಖೆಯಿಂದ 10 ಕೋಟಿ, ಮೈಸೂರು ಅಭಿವೃದ್ಧಿ ಪ್ರಾಧಿಕಾರದಿಂದ 10 ಕೋಟಿ ಮತ್ತು ಅರಮನೆ ಮಂಡಳಿಯಿಂದ 5 ಕೋಟಿ ರೂ. ವೆಚ್ಚ ನಿಗದಿಯಾಗಿದೆ. ಆದರೆ, ಪ್ರಸಕ್ತ ವರ್ಷದ ದಸರಾಗೆ ಭಾರಿ ಅನುದಾನ ಹೆಚ್ಚಳಕ್ಕೆ ಕೋರಲಾಗಿದೆ.