ಬಹುಪಯೋಗಿ ಮನೆಯಂಗಳ

ಹಿಂದೆಲ್ಲ ಗ್ರಾಮೀಣ ಪ್ರದೇಶಗಳಲ್ಲಿ ಕೃಷಿ ಉತ್ಪನ್ನಗಳನ್ನು ಹರಡಲು, ಒಣಗಿಸಲು ಬಳಕೆಯಾಗುತ್ತಿದ್ದ ಅಂಗಳ ಇಂದಿಗೂ ಪ್ರಾಮುಖ್ಯತೆ ಉಳಿಸಿಕೊಂಡಿದೆ. ಹಬ್ಬ ಹರಿದಿನಗಳಲ್ಲಿ ಅಂಗಳ ತುಂಬ ರಂಗೋಲಿ ಹಾಕಿದರೆ ನೋಡಲು ಮತ್ತಷ್ಟು ಚೆಂದ. ಹಾಗಾಗಿ ಹಳ್ಳಿಯಾಗಲಿ, ನಗರವಾಗಲಿ ಅಂಗಳ ಹೊಂದಿರಬೇಕು ಎನ್ನುತ್ತಾರೆ ಹಿರಿಯರು. ಇಷ್ಟು ಪ್ರಾಧಾನ್ಯ ಹೊಂದಿರುವ ಅಂಗಳದ ವಿಷಯದಲ್ಲಿ ಒಂದಷ್ಟು ಎಚ್ಚರಿಕೆ ವಹಿಸಿದರೆ ಆಕರ್ಷಕವಾಗಿಸುವುದರ ಜತೆಗೆ ಬಹುಪಯೋಗಿ ತಾಣವಾಗಿಯೂ ಬಳಕೆಯಾಗಲಿದೆ.

ಮನೆ ಕಟ್ಟುವಾಗಲೇ ಅಂಗಳ ಹೀಗಿರಬೇಕು ಎನ್ನುವ ಕಲ್ಪನೆ ನಿಮ್ಮಲ್ಲಿರಲಿ. ಅದರಲ್ಲೂ ಮನೆಗೆ ಸಕಾರಾತ್ಮಕ ಶಕ್ತಿ ನೀಡುವ ತುಳಸಿ ಗಿಡಕ್ಕೆ ಅಂಗಳದಲ್ಲಿ ಪ್ರಧಾನ ಸ್ಥಾನ ನೀಡಲಾಗಿದೆ. ಜತೆಗೆ ಮನೆಯ ಮುಂದೆ ನಿತ್ಯ ಅಕರ್ಷಕ ರಂಗೋಲಿ ಹಾಕಲು ಸಾಕಷ್ಟು ಜಾಗವಿರುವಂತೆ ನೋಡಿಕೊಳ್ಳಿ. ಇದರಿಂದ ಮನೆಯ ಸೊಬಗನ್ನು ಮತ್ತಷ್ಟು ಹೆಚ್ಚಲಿದೆ.

ಮನೆ ಅಂಗಳಕ್ಕೆ ಸಾಕಷ್ಟು ಜಾಗ ಇದೆ ಎಂದಾದರೆ ಪುಟ್ಟ ಉದ್ಯಾನ ನಿರ್ಮಿಸಬಹುದು. ಹೂವಿನ ಗಿಡ, ಅಲಂಕಾರಿಕ ಸಸ್ಯಗಳ ಜತೆಗೆ ಔಷಧೀಯ ಗಿಡಗಳು, ಹಣ್ಣಿನ ಗಿಡಗಳನ್ನು ಹಾಕಿರಿ. ಸಾಧ್ಯವಾದರೆ ಒಂದು ತೆಂಗಿನ ಗಿಡ ನೆಡುವುದನ್ನು ಮರೆಯಬೇಡಿ. ಹೀಗೆ ಪುಟ್ಟ ಉದ್ಯಾನದ ರೀತಿಯಲ್ಲಿ ಕೈತೋಟ ನಿರ್ಮಿಸಿಕೊಂಡರೆ ಅಂಗಳದ ಅಂದದೊಂದಿಗೆ ಮನೆಗೂ ಉಪಯೋಗವಾಗಲಿದೆ. ಉದ್ಯಾನ ನಿರ್ಮಿಸುವಷ್ಟು ಅಂಗಳದಲ್ಲಿ ಜಾಗ ಇಲ್ಲ ಎಂದಾದರೆ ಚಿಂತೆ ಬೇಡ. ಕೆಲವು ಸಣ್ಣಪುಟ್ಟ ಗಿಡಗಳನ್ನು ಪಾಟ್‌ಗಳಲ್ಲೂ ಬೆಳೆಸಬಹುದು. ತೂಗು ಪಾಟ್‌ಗಳಲ್ಲೂ ಗಿಡಗಳನ್ನು ಬೆಳೆಸಬಹುದು.

ಅಂಗಳ ಎಷ್ಟು ಸ್ವಚ್ಛವಾಗಿರುತ್ತದೋ ಇಡೀ ಮನೆಯ ವಾತಾವರಣವೂ ಅಷ್ಟೇ ಚೆಂದವಾಗಿರುತ್ತದೆ. ಹಾಗಾಗಿ ಮನೆಯ ಬಾಗಿಲಲ್ಲಿ ಚಪ್ಪಲಿ, ಶೂ ಎಲ್ಲೆಂದರಲ್ಲಿ ಕಳಚಿಬಿಡಬೇಡಿ. ಪ್ರತ್ಯೇಕ ಸ್ಥಳದಲ್ಲಿ ಚಪ್ಪಲಿ ಸ್ಟಾಂಡ್ ಅಳವಡಿಸಿ. ಹಾಗೆಯೇ ಮನೆ ಅಂಗಳದಲ್ಲಿ ಮೆಟ್ಟಿಲು ನಿರ್ಮಿಸಿದ್ದರೆ ಅವು ಇನ್ನಷ್ಟು ಅಕರ್ಷಕವಾಗಿ ಕಾಣಲು ಎರಡೂ ಬದಿಯಲ್ಲಿ ಅಲಂಕಾರಿಕ ಗಿಡಗಳ ಪಾಟ್‌ಗಳನ್ನು ಇರಿಸಿ. ಆ ಪಾಟ್‌ಗಳಿಗೆ ಹಾಕುವ ನೀರು ಅಂಗಳದಲ್ಲಿ ಹರಿಯದಂತೆ ಎಚ್ಚರವಹಿಸಿ.

ಅಂಗಳದಲ್ಲಿ ಹೆಚ್ಚಿನ ಜಾಗವಿದ್ದರೆ ನೆಲಹಾಸುಗಳ ನಡುವೆ ಇಂಟರ್‌ಲಾಕ್ ಅಳವಡಿಸಿ. ಇದರಿಂದ ಮಳೆಗಾಲದಲ್ಲಿ ಅದರ ಮಧ್ಯದಲ್ಲಿ ಹುಲ್ಲು- ಗಿಡಗಂಟಿಗಳು ಹುಟ್ಟಿಕೊಳ್ಳುತ್ತವೆ. ಇದು ಅಂಗಳಕ್ಕೆ ಅಕರ್ಷಕ ಲುಕ್ ನೀಡಲಿದೆ. ನೆಲಹಾಸುಗಳಲ್ಲಿ ಪಾಚಿ ಬೀಳದಂತೆ ಎಚ್ಚರವಹಿಸಿ. ಹಾಗೆಯೇ ಉದ್ಯಾನದಲ್ಲಿನ ಗಿಡಗಳನ್ನು ಆಗಾಗ್ಗೆ ಕತ್ತರಿಸಿ ಸುಂದರ ರೂಪ ಕೊಟ್ಟರೆ ನೋಡಲು ಚೆಂದವಾಗಿರುತ್ತದೆ.