ಭಾರತದ ಆತ್ಮ ಕೈಲಾಸ ಪರ್ವತ ಶಿವನ ನಿತ್ಯ ನಿವಾಸ

ಮರುದಿನ 500 ಕಿ.ಮೀ. ದೂರ ಪ್ರಯಾಣಿಸಬೇಕಾದ್ದರಿಂದ ಜೂ. 27ರಂದು ನಸುಕಿನಲ್ಲಿಯೇ ಎದ್ದು ಸ್ನಾನ ಪೂಜಾದಿಗಳನ್ನು ಪೂರೈಸಿ, ಪ್ರಸಾದ ಸ್ವೀಕರಿಸಿ ಸಾಗಾಕ್ಕೆ ಪ್ರಯಾಣ ಬೆಳೆಸಿದೆವು. ದಾರಿಯುದ್ದಕ್ಕೂ ಹಿಮ ಕರಗಿ ಕೆಳಗೆ ಧುಮುಕುವ ಜಲಪಾತಗಳು, ಅವುಗಳಿಂದ ಹರಿಯುವ ಝರಿಗಳು ಮತ್ತು ಚಿಕ್ಕ ನದಿಗಳು, ವಿಶಾಲವಾದ ಪರ್ವತಗಳು ಕಾಣುತ್ತಿದ್ದವು. ಸಂಜೆ 5ಕ್ಕೆ ಮಾನಸ ಸರೋವರದ ಪರಿಸರವನ್ನು ತಲುಪಿದೆವು. ಅಂದು ನಮ್ಮೆಲ್ಲರ ಪುಣ್ಯ ವಿಶೇಷವೆಂಬಂತೆ ಆಗಸದಲ್ಲಿ ಅಷ್ಟಾಗಿ ಮೋಡಗಳು ಕವಿಯದೇ ಇದ್ದುದರಿಂದ ಮಾನಸ ಸರೋವರದ ಪರಿಸರವನ್ನು ಪ್ರವೇಶಿಸುತ್ತಿದ್ದಂತೆ ದೂರದಲ್ಲಿ ಕೈಲಾಸ ಪರ್ವತವು ಕಣ್ಣಿಗೆ ಗೋಚರಿಸಿತು. ಅದನ್ನು ನೋಡುತ್ತಿದ್ದಂತೆಯೇ ಪ್ರಯಾಣದ ಆಯಾಸ, ಆರೋಗ್ಯದ ವ್ಯತ್ಯಾಸ ಎಲ್ಲವೂ ಕಣ್ಮರೆಯಾಗಿ ಅಪ್ರತಿಮ ಆನಂದವಾಯಿತು. ಕೈಲಾಸ ಪರ್ವತದ ಮೊದಲ ದರ್ಶನದ ಕ್ಷಣವನ್ನು ಎಲ್ಲರೂ ಮೊಬೈಲ್​ ಮೂಲಕ ಸೆರೆ ಹಿಡಿದುಕೊಂಡರು. ನಂತರ ವಾಹನದಲ್ಲಿ ಕುಳಿತು ಮಾನಸ ಸರೋವರದ ಪರಿಕ್ರಮವನ್ನು ಪ್ರಾರಂಭಿಸಿದೆವು. ಇದು 82 ಕಿಮೀ ಪರಿಧಿ ಹೊಂದಿರುವ ವಿಶಾಲ ಸರೋವರ.

ಕೈಲಾಸ ಪರ್ವತದ ಮೇಲಿನ ಹಿಮ ಕರಗಿ ಹರಿದು ಬಂದು ಈ ಸರೋವರವನ್ನು ಸೇರಿಕೊಳ್ಳುವುದರಿಂದ ಇದನ್ನು ಅಮೃತ ಸರೋವರ ಎಂದು ಕರೆಯಲಾಗುತ್ತದೆ. ಇದರಲ್ಲಿಯ ನೀರು ಅತ್ಯಂತ ಪವಿತ್ರ ಮತ್ತು ಪರಿಶುದ್ಧ. ಈ ನೀರಿನಲ್ಲಿ ತಿಲಮಾತ್ರವೂ ಕಲ್ಮಶವಿಲ್ಲದಿರುವುದರಿಂದ ಮೇಲಿನ ಆಕಾಶ ಪ್ರತಿಬಿಂಬಗೊಂಡು ನೀರು ನೀಲಿ ವರ್ಣದಂತೆ ಭಾಸವಾಗುತ್ತದೆ. ಪ್ರತಿದಿನ ನಸುಕಿನಲ್ಲಿ ಶಿವ ಪಾರ್ವತಿ ಇತರ ದೇವತೆಗಳೊಡಗೂಡಿ ನಕ್ಷತ್ರಗಳ ರೂಪದಲ್ಲಿ ಇಲ್ಲಿ ಸ್ನಾನ ಮಾಡುತ್ತಾರೆಂಬ ಪ್ರತೀತಿ ಉಂಟು. ಆ ಸಮಯದಲ್ಲಿ ಅದನ್ನು ನೋಡಲು ಅನೇಕರು ಸರೋವರದ ತಟದಲ್ಲಿ ಬಂದು ಕಾಯುತ್ತಾರೆ. ಬಹಳಷ್ಟು ಜನರು ಇದನ್ನು ಪ್ರತ್ಯಕ್ಷ ನೋಡಿದ್ದಾರೆ ಕೂಡ. ಇಂತಹ ಅದ್ಭುತ ರಮಣೀಯ ಸರೋವರದ ಪ್ರದಕ್ಷಿಣೆಯನ್ನು ಪ್ರಾರಂಭಿಸಿ ಅರ್ಧದವರೆಗೆ ಬಂದ ನಂತರ ಎಲ್ಲರೂ ಸರೋವರದ ಒಳಗೆ ಹೋಗಿ ಅದರಲ್ಲಿಯ ತೀರ್ಥವನ್ನು ಸೇವಿಸಿ ದೇಹದ ಮೇಲೆಲ್ಲಾ ಪ್ರೋಕ್ಷಣೆ ಮಾಡಿಕೊಂಡೆವು. ಮೊದಲು ಇಲ್ಲಿ ಸ್ನಾನ ಮಾಡಲು ಅವಕಾಶ ಇರುತ್ತಿತ್ತು. ಆದರೆ ಇತ್ತೀಚೆಗೆ ಸರೋವರದ ಸ್ವಚ್ಛತೆಗಾಗಿ ಸ್ನಾನ ಮಾಡಲು ಅವಕಾಶವಿಲ್ಲ. ಸರೋವರದ ಆ ದಿನದ ಪರಿಕ್ರಮವನ್ನು ಪೂರ್ಣಗೊಳಿಸಿ ಪಕ್ಕದಲ್ಲಿರುವ ರಾಸ ಸರೋವರಕ್ಕೆ ಬಂದೆವು. ಇದು ಮಾನಸ ಸರೋವರದಿಂದ ಅಷ್ಟೇನೂ ದೂರವಿಲ್ಲ. ಆದರೆ ಇಲ್ಲಿಯ ನೀರನ್ನು ವಿಷವೆಂದು ಭಾವಿಸಲಾಗುತ್ತದೆ. ಇದನ್ನು ಯಾರೂ ಸ್ಪರ್ಶ ಕೂಡ ಮಾಡುವುದಿಲ್ಲ. ಮಾನಸ ಸರೋವರದ ನೀರು ಅತ್ಯಂತ ಸಿಹಿಯಾದರೆ, ರಾಸ ಸರೋವರದ ನೀರು ಉಪ್ಪು. ಅಕ್ಕ ಪಕ್ಕದಲ್ಲೇ ಇರುವ ಎರಡು ಸರೋವರಗಳಲ್ಲಿ ಪರಸ್ಪರವಾಗಿ ಇಷ್ಟು ವಿರುದ್ಧ ಸ್ವಭಾವದ ಸಂಗತಿಗಳನ್ನು ನೋಡಿದರೆ ಇದೊಂದು ಪ್ರಾಕೃತಿಕ ಪವಾಡವೇ ಸರಿ ಎಂದೆನಿಸುತ್ತದೆ.

ರಾಕ್ಷಸ ಸರೋವರವನ್ನು ದೂರದಿಂದಲೇ ನೋಡಿ ಮಾನಸ ಸರೋವರದ ಪರಿಕ್ರಮವನ್ನು ಮುಂದುವರೆಸುತ್ತ ಆ ಸರೋವರದ ತಟದಲ್ಲಿರುವ ಭಾರತ ದೇಶದ ಒಬ್ಬ ಸಂತರ ಆಶ್ರಮಕ್ಕೆ ಬಂದು ಉಳಿದುಕೊಂಡೆವು. ಉತ್ತಮ ವ್ಯವಸ್ಥೆ ಹೊಂದಿದ ಒಂದೆರಡು ಹೋಟೆಲ್​ಗಳಿದ್ದರೂ ಅಲ್ಲಿ ಕೇವಲ ಚೀನೀಯರಿಗೆ ಮಾತ್ರ ಅವಕಾಶ ನೀಡುವ ಮೂಲಕ ಭಕ್ತರಲ್ಲಿ ತಾರತಮ್ಯ ಮಾಡುವ ಚೀನೀಯರ ನೀತಿ ಎಲ್ಲರಿಗೂ ಬೇಸರವನ್ನು ತರಿಸಿತು.

ಜೂ. 28ರಂದು ಮುಂಜಾನೆ ಸರೋವರದ ದಡದ ಸುತ್ತ ವಾಯುವಿಹಾರ ಮಾಡಿ ಒಂದೆಡೆ ಪ್ರಶಾಂತ ಸ್ಥಳದಲ್ಲಿ ಕುಳಿತು ಒಂದಿಷ್ಟು ಸಮಯ ಧ್ಯಾನ ಮಾಡಿ ಅಲ್ಲಿಯ ಪ್ರಾಕೃತಿಕ ಆಹ್ಲಾದದ ಜತೆಗೆ ಆಧ್ಯಾತ್ಮಿಕ ಆನಂದವನ್ನು ಕೂಡ ಸವಿದೆವು. ಧ್ಯಾನದಲ್ಲಿ ತಲ್ಲೀನರಾದಾಗ ಸ್ವಚ್ಛ ಶುಭ್ರ ವಿಶಾಲ ಸರೋವರದಲ್ಲಿ ಅದಕ್ಕಿಂತಲೂ ಸ್ವಚ್ಛ ಮತ್ತು ಶುಭ್ರರಾದ ಶಿವ ಪಾರ್ವತಿ ಬಂದು ಮುಳುಗೆದ್ದು ಕೈಲಾಸದ ಕಡೆಗೆ ತೆರಳಿದಂತೆ ಭಾಸವಾಯಿತು. ಅಲ್ಲಿಂದ ಬಂದು ಸ್ನಾನ ಪೂಜಾ ಪ್ರಸಾದವನ್ನು ಪೂರೈಸಿ ದಾರ್ಚಿನ್​ ನಗರದ ಕಡೆಗೆ ಪ್ರಯಾಣ ಬೆಳೆಸಿದೆವು. ಮಾನಸ ಸರೋವರದಿಂದ ಅತಿ ಸಮೀಪದಲ್ಲಿರುವ ದಾರ್ಚಿನ್​ಗೆ ಒಂದು ಗಂಟೆಯ ಒಳಗೇ ಬಂದು ತಲುಪಿದೆವು. ಇಲ್ಲಿ ಎಲ್ಲ ರೀತಿಯಿಂದಲೂ ವ್ಯವಸ್ಥೆ ಅಚ್ಚುಕಟ್ಟಾಗಿತ್ತು. ಕೈಲಾಸ ಪರ್ವತ ಅತ್ಯಂತ ಸಮೀಪದಿಂದ ಕಾಣುವ ಪ್ರದೇಶವಾದ ಅಷ್ಟಪಾದ, ನಂದಿಪರ್ವತದ ಸ್ಥಳಕ್ಕೆ ಹೋಗಿ ಅದನ್ನೂ ನೋಡಿಕೊಂಡು ಬರಲು ಹೊರಡಲು ತಯಾರಾದೆವು. ಒರಟಾದ ಚಿಕ್ಕ ದಾರಿಗಳ ಮೂಲಕ ಸಾಗುವ ಆ ಮಾರ್ಗದಲ್ಲಿ ಒಂದೆಡೆ ನಿಲ್ಲಿಸಿ ಅಲ್ಲಿಂದಲೇ ಕೈಲಾಸವನ್ನು ನೋಡಿರಿ ಎಂದು ನಮ್ಮನ್ನೆಲ್ಲ ಇಳಿಸಿದರು. ಮತ್ತೊಂದು ವಾಹನ ಬಹಳ ಮುಂದೆ ಹೋಯಿತು. "ನಮ್ಮನ್ನೇಕೆ ಇಲ್ಲಿಯೇ ಇಳಿಸಿದಿರಿ?' ಎಂದು ಕೇಳಿದೆವು. ಅಲ್ಲಿಯೂ "ಚೀನಾ ದೇಶದವರಿಗೆ ಮಾತ್ರ ಮೇಲಿನವರೆಗೆ ಹೋಗಲು ಅವಕಾಶವಿದೆ' ಎಂದು ಹೇಳಿದರು. ಈ ಉತ್ತರ ಕೇಳಿ ಚೀನಾ ದೇಶದ ಬಗ್ಗೆ ಆಕ್ರೋಶ, ಅಸಹ್ಯ ಭಾವ ಮೂಡಿತು.

ಕೈಲಾಸ ಪರ್ವತ ಮತ್ತೆ ಭಾರತದ ವಶವಾಗಬೇಕು: ಒಂದು ಕಾಲಕ್ಕೆ ಭಾರತದ ಧಾರ್ಮಿಕ ಕೇಂದ್ರವಾಗಿ ಕಂಗೊಳಿಸಿದ ಕೈಲಾಸವು, ಇಂದು ಚೀನಾದ ಕೈವಶವಾಗಿರುವುದರಿಂದ ಭಾರತೀಯರು ಚೀನೀಯರಿಂದ ಇಂತಹ ನಿಕೃಷ್ಟತೆಯನ್ನು ಎದುರಿಸುವ ಪರಿಸ್ಥಿತಿ ನಿರ್ಮಾಣವಾಗಿದೆ. ಭಾರತೀಯರ ಗೌರವಕ್ಕೆ ಧಕ್ಕೆ ಉಂಟಾಗುವಂತೆ ನಿಯಮಗಳನ್ನು ಮಾಡಿ, ಅವಮಾನಿಸುತ್ತಿರುವುದು ಮನಸ್ಸಿಗೆ ಬಹಳ ನೋವು ಉಂಟುಮಾಡಿತು. ಅವರು ಮಾಡುವ ಪಾಪಕೃತ್ಯ ಆಘಾತವನ್ನುಂಟು ಮಾಡಿತು. ದೇಶವನ್ನು ಮುನ್ನಡೆಸುವ ಹಿಂದಿನ ರಾಜಕೀಯ ಪ್ರಮುಖರು ಚೀನಾಗೆ ಹೆದರಿ ಕೈಲಾಸದ ಭಾಗವನ್ನು ಅವರ ವಶಕ್ಕೆ ಬಿಟ್ಟುಕೊಟ್ಟು ಕ್ಷಮಿಸಲಾಗದ ಅಪರಾಧ ಮಾಡಿದ್ದಾರೆ. ಈ ವಿಷಯದಲ್ಲಿ ಅಂಥವರನ್ನು ಎಂದೂ ಕ್ಷಮಿಸಲು ಸಾಧ್ಯವಿಲ್ಲ. ಈ ಸಮಸ್ಯೆಗೆ ಅಗತ್ಯವಿರುವ ರಾಜತಾಂತ್ರಿಕ ಯುಕ್ತಿಗಳನ್ನು ಬಳಸಿ ಶತಾಯಗತಾಯ ಕೈಲಾಸವನ್ನು ಭಾರತ ಮರಳಿ ಪಡೆದುಕೊಳ್ಳಬೇಕು. ದೇಶದ ನಾಯಕತ್ವ ವಹಿಸಿದ ಪ್ರಧಾನಮಂತ್ರಿಗಳಾದ ನರೇಂದ್ರ ಮೋದಿಯವರಿಗೂ ಈ ಕುರಿತು ಪತ್ರವನ್ನು ಬರೆದಿದ್ದೇವೆ. ಶಿವನ ವಾಸಸ್ಥಾನವಾದ ಕೈಲಾಸವು ಭಾರತದ ಆತ್ಮವಿದ್ದಂತೆ. ಅದು ಮರಳಿ ಬಂದಾಗಲೇ ಭಾರತವು ಎಲ್ಲ ದೃಷ್ಟಿಯಿಂದಲೂ ವಿಶ್ವಗುರುವಾಗಲು ಸಾಧ್ಯ ಎಂಬುದು ನಮ್ಮ ಭಾವನೆ.

ನಾವು ಉಳಿದುಕೊಂಡಿದ್ದ ಹೋಟೆಲ್​ ಕೊಠಡಿಯ ಕಾರಿಡಾರ್​ನಲ್ಲಿದ್ದ ವಿಶಾಲವಾದ ಕಿಟಕಿಯ ಮೂಲಕ ಕೈಲಾಸ ಪರ್ವತದ ತುದಿಯ ಭಾಗ ಅತ್ಯಂತ ಸುಂದರವಾಗಿ ಕಾಣಿಸಿತು. ಇಲ್ಲಿನ ಕಟ್ಟಳೆಗಳನ್ನು ಕಳಚಿಕೊಂಡು ಭಾರತಕ್ಕೆ ಸೇರಲು ನಾನು ಸಿದ್ಧನಿದ್ದೇನೆ ಎಂದು ಕೈಲಾಸವೇ ನಾವಿದ್ದಲ್ಲಿಗೆ ಬಂದು ದರ್ಶನ ನೀಡಿದಂತೆ ಭಾಸವಾಯಿತು.

ಪರ್ವತದ ಪರಿಕ್ರಮ & ಪರಮಾತ್ಮನ ಪ್ರದಕ್ಷಿಣೆ: ಕೈಲಾಸ ಪರ್ವತದ ಆರೋಹಣ ಅಸಾಧ್ಯ. ಆದ್ದರಿಂದ ಪರ್ವತದ ಪರಿಕ್ರಮಕ್ಕೆ ಬಹಳ ಪ್ರಾಮುಖ್ಯತೆ ಇದೆ. ಸಾಕ್ಷಾತ್​ ಶಿವನ ಆವಾಸ ಸ್ಥಾನವಾಗಿರುವ ಕೈಲಾಸ ಪರ್ವತದ ಪರಿಕ್ರಮವು ಭಗವಂತನ ಪ್ರದಕ್ಷಿಣೆಗೆ ಸರಿಸಮವಾಗಿದೆ. ನಡೆದುಕೊಂಡು ಹೋಗುವುದು ಕಷ್ಟವೆನಿಸುವವರು ಕುದುರೆಯ ಮೇಲೆ ಕುಳಿತುಕೊಂಡು ಹೋಗಲು ಅವಕಾಶವಿರುತ್ತದೆ. ಆದರೆ ಒಂದು ಕುದುರೆಗೆ 56 ಸಾವಿರ ರೂ. ನೀಡಬೇಕಾಗುತ್ತದೆ. ಪರಿಕ್ರಮಕ್ಕೆ ಬರುವವರ ಸಂಖ್ಯೆ ಅಧಿಕವಿದ್ದ ಸಮಯದಲ್ಲಿ ಎರಡು-ಮೂರು ದಿನ ಮೊದಲೇ ಕುದುರೆಗಳನ್ನು ಕಾಯ್ದಿರಿಸಿಕೊಳ್ಳಬೇಕಾಗುತ್ತದೆ.

ಜೂ. 29ರಂದು ದಾರ್ಚಿನ್​ನಿಂದ ಕೇವಲ ಆರು-ಏಳು ಕಿಮೀ ದೂರದಲ್ಲಿರುವ ಯಮದ್ವಾರಕ್ಕೆ ವಾಹನದ ಮೂಲಕ ಬಂದು, ಅಲ್ಲಿಂದ ಪಾದಯಾತ್ರೆಯ ಮೂಲಕ ಪರಿಕ್ರಮ ಪ್ರಾರಂಭಿಸಿದೆವು. ಕೈಲಾಸ ಪರ್ವತದ ಮೊದಲನೇ ದಿನದ ಪರಿಕ್ರಮವನ್ನು ಪಾದಯಾತ್ರೆ ಮೂಲಕವೇ ಪೂರ್ಣಗೊಳಿಸಲಾಯಿತು. ಇದು ಯಮದ್ವಾರದಿಂದ ಜಡಿಪುಕದವರೆಗೆ 12 ಕಿಮೀ ಇರುತ್ತದೆ. ದಕ್ಷಿಣ ದಿಕ್ಕಿನಿಂದ ಪರಿಕ್ರಮ ಪ್ರಾರಂಭವಾಗಿ ಉತ್ತರ ದಿಕ್ಕಿನವರೆಗೆ ಬರಲಾಗುತ್ತದೆ. ಈ ಸಂದರ್ಭದಲ್ಲಿ ವಿಭಿನ್ನ ಭಾಗಗಳಿಂದ ಕೈಲಾಸ ಪರ್ವತದ ಹಾಗೂ ಅದರ ಅಕ್ಕಪಕ್ಕದಲ್ಲಿರುವ ನಂದೀಪರ್ವತ ಮುಂತಾದ ಅತ್ಯಂತ ಅಪರೂಪದ ಬೇರೆ ಬೇರೆ ಪರ್ವತಗಳನ್ನು ವೀಕ್ಷಿಸುತ್ತ ಜಡಿಪುಕವನ್ನು ತಲುಪಿದೆವು. ಅಲ್ಲಿಗೆ ಬರುತ್ತಿದ್ದಂತೆಯೇ ಕೈಲಾಸ ಪರ್ವತವು ಅತ್ಯಂತ ನಿಖರವಾಗಿ ಸಮೀಪದಿಂದ ಕಾಣುತ್ತದೆ. ನೋಡಿದಷ್ಟೂ ಮತ್ತೆ ಮತ್ತೆ ಆ ಕೈಲಾಸವನ್ನು ನೋಡುತ್ತಲೇ ಇರಬೇಕೆಂಬ ಮಹದಾಸೆ ಮನದಲ್ಲಿ ಹುಟ್ಟಿಕೊಳ್ಳುತ್ತದೆ. ಇಲ್ಲಿ ಮೈನಸ್​ ಡಿಗ್ರಿ ಆಸುಪಾಸಿನ ತಾಪಮಾನವಿರುತ್ತದೆ. ಇಲ್ಲಿಯವರೆಗೆ ಬಂದು ಮರಳಿ ಯಮದ್ವಾರದ ಕಡೆಗೆ ಹೋದರೆ ಅದನ್ನು ಅರ್ಧ ಪರಿಕ್ರಮವೆಂದು ಕರೆಯುತ್ತಾರೆ. ಮರಳಿ ಹೋಗುವವರು ಮರುದಿನ ಪಾದಯಾತ್ರೆಯ ಮೂಲಕವಾದರೂ ಹೋಗಬಹುದು. ಹೆಚ್ಚು ತೊಂದರೆ ಇದ್ದರೆ ವಾಹನದ ಮೂಲಕವೂ ಮರಳಿ ಹೋಗಬಹುದು.