ಮನೆ ನಿರ್ಮಾಣಕ್ಕೆ ಅನುಮತಿ ಪಡೆದು ಮಸೀದಿ ನಿರ್ಮಾಣ

ಸಂಬಂಧಿತ ವ್ಯಕ್ತಿ ಪುರಸಭೆಯಿಂದ ಮನೆ ನಿರ್ಮಾಣಕ್ಕೆ ಅನುಮತಿ ಪಡೆದಿದ್ದರೂ, ಮಸೀದಿ ನಿರ್ಮಾಣ ಕಾರ್ಯ ನಡೆಸುತ್ತಿದ್ದಾರೆ ಎಂದು ಆರೋಪಿಸಲಾಗಿದೆ. ಈ ಸಂಬಂಧ ದೇಣಿಗೆ ಸಂಗ್ರಹಣೆ ನಡೆಯುತ್ತಿರುವ ಮಾಹಿತಿಯೂ ಲಭ್ಯವಾಗಿದೆ. ಲೇಔಟ್ ನಿವಾಸಿಗಳು, ಮಾಲೀಕರು ಹಾಗೂ ಪುರಸಭೆ ಸಿಬ್ಬಂದಿ ಸ್ಥಳಕ್ಕೆ ಭೇಟಿ ನೀಡಿ ಪ್ರಶ್ನಿಸಿದಾಗ, ಮನೆಯಾದರೂ ಕಟ್ಟುತ್ತೇನೆ, ಮಸೀದಿಯಾದರೂ ಕಟ್ಟುತ್ತೇನೆ ಎಂದು ಹಾರಿಕೆ ಉತ್ತರ ನೀಡಿರುವುದಾಗಿ ಸ್ಥಳೀಯ ನಿವಾಸಿಗಳು ಆರೋಪಿಸಿದ್ದಾರೆ.

ವಜ್ರಹನುಮಾನ ನಗರ, ರಾಧಾಕೃಷ್ಣ ನಗರ, ಗಬ್ಬೂರ ಬಡಾವಣೆ, ಗಣೇಶ ನಗರ ಹಾಗೂ ನಂದಿ ಬಡಾವಣೆಯ ಸಾವಿರಾರು ನಿವಾಸಿಗಳಿಗೆ ಅದರಿಂದ ತೊಂದರೆ ಉಂಟಾಗುವ ಸಾಧ್ಯತೆ ಇದೆ. ಹೀಗಾಗಿ ಕಟ್ಟಡ ಕಾಮಗಾರಿಯನ್ನು ತಕ್ಷಣ ನಿಲ್ಲಿಸಿ, ಯಾವುದೇ ಧಾರ್ಮಿಕ ಅಥವಾ ಕೋಮು ಸೌಹಾರ್ದಕ್ಕೆ ಧಕ್ಕೆ ತರುವ ಚಟುವಟಿಕೆಗಳು ನಡೆಯದಂತೆ ಪುರಸಭೆ ಕ್ರಮ ಕೈಗೊಳ್ಳಬೇಕು ಎಂದು ಮನವಿ ಮಾಡಿದರು.

ಕರವೇ ಮುಖಂಡ ಅಶೋಕ ಹಾರಿವಾಳ, ನಿವಾಸಿಗಳಾದ ಪಾರೀಶ ಹೊಸಮನಿ, ಜಗದೀಶ ಬಾಗೇವಾಡಿ, ಎಸ್.ಬಿ. ಪಟ್ಟಣದ, ಎಂ.ಆರ್. ಹುಮನಾಬಾದ್, ಎಸ್.ಪಿ. ಅಗಸರ, ಆರ್.ಕೆ. ಕಮತಿಕರ್, ಸುರೇಶ ಸಜ್ಜನ, ಎಸ್.ಎಸ್. ಅಂಗಡಿ, ಸಂಗಪ್ಪ ಕಡ್ಲಿಮಟ್ಟಿ, ಕೆ.ಸಿ. ಅವಟಿ, ಕಿರಣ್ ದೇಸಾಯಿ, ಎಸ್.ಎಸ್. ಗೊಳಸಂಗಿ, ಶ್ರೀನಿವಾಸ ಜಾಲಗೇರಿ ಇತರರಿದ್ದರು.