ಯಂತ್ರದ ಆಲೆಮನೆಯಲ್ಲಿ ಬಿಸಿ ಬಿಸಿ ಬೆಲ್ಲ ತಯಾರಿಕೆ- jaggery

ಬೆಂಗಳೂರು ಕೃಷಿ ವಿವಿ ಕ್ಯಾಂಪಸ್ ಜಿಕೆವಿಕೆ ಆವರಣದಲ್ಲಿನ ಕೃಷಿ ಪ್ರವಾಸೋದ್ಯಮ ವಿಭಾಗದಲ್ಲಿ ಪ್ರದರ್ಶನಕ್ಕಿಟ್ಟಿದ್ದ ಬೆಲ್ಲ ತಯಾರಿಸುವ ಯಂತ್ರೋಪಕರಣ ನೋಡುಗರ ಗಮನ ಸೆಳೆಯಿತು. ಬೆಲ್ಲ ತಯಾರಿಸುವ ದೃಶ್ಯವನ್ನು ರೈತರು, ಸಾರ್ವಜನಿಕರು ಕಣ್ತುಂಬಿಕೊಂಡು ಸ್ಥಳದಲ್ಲೇ ಬಿಸಿಬಿಸಿ ಬೆಲ್ಲ ಸವಿದು ಖುಷಿಪಟ್ಟರು. ಕಬ್ಬಿನಿಂದ ಯಾವ ರೀತಿ ಬೆಲ್ಲ ತಯಾರಿಸಬಹುದು ಎಂಬುದರ ಬಗ್ಗೆ ಸಾವಿರಾರು ಜನರು ಘಟಕಕ್ಕೆ ಭೇಟಿ ನೀಡಿ ಮಾಹಿತಿ ಪಡೆದರು.

ಹಿಂದೆಲ್ಲ ಬೆಲ್ಲ ತಯಾರಿಸುವ ಪ್ರಕ್ರಿಯೆಯಲ್ಲಿ ಮೊದಲಿಗೆ ಗಾಣದಲ್ಲಿ ಅರೆದು ರಸ ತೆಗೆಯಲಾಗುತ್ತಿತ್ತು, ಬಳಿಕ ದೊಡ್ಡ ಕೊಪ್ಪರಿಗೆಯಲ್ಲಿ (ಬಾಣಲೆ) ಕುದಿಸಲಾಗುತ್ತಿತ್ತು. ಪಾಕ ಗಟ್ಟಿಯಾದ ನಂತರ ಅಚ್ಚುಮಣೆ ಮೇಲೆ ಹಾಕಿದಾಗ ಬೆಲ್ಲ ರೆಡಿಯಾಗುತ್ತಿತ್ತು. ಬೆಲ್ಲ ತಯಾರಿಕೆಗೆ ರೈತರು ಆಲೆಮನೆಯನ್ನೇ ಹೆಚ್ಚು ಅವಲಂಬಿಸಿದ್ದರು. ಈ ಕಾರ್ಯಕ್ಕಾಗಿ ಕನಿಷ್ಠ 8-10 ಕೂಲಿ ಕಾರ್ಮಿಕರ ಅಗತ್ಯವಿರುತ್ತಿತ್ತು. ಸಾಕಷ್ಟು ಸಮಯವೂ ತಗುಲುತ್ತಿತ್ತು.

ಮಂಡ್ಯ ಸೇರಿ ರಾಜ್ಯದ ಇತರ ಜಿಲ್ಲೆಗಳಲ್ಲಿ ಈಗಲೂ ಆಲೆಮನೆಗಳಲ್ಲಿ ಬೆಲ್ಲ ತಯಾರಿಸಲಾಗುತ್ತದೆ. ಆದರೆ, ಇತ್ತೀಚಿನ ದಿನಮಾನಗಳಲ್ಲಿ ಇದಕ್ಕೆ ಯಂತ್ರಸ್ಪರ್ಶ ನೀಡಲಾಗಿದೆ. ಅರ್ಧ ಗಂಟೆಯಲ್ಲೇ ಸಾವಯವ ಬೆಲ್ಲ ತಯಾರಿಸಬಹುದು. ಸಿರಿ ಆಗ್ರೋ ಇಂಜಿನಿಯರಿಂಗ್ ವರ್ಕ್ಸ್, ಈ ಯಂತ್ರವನ್ನು ಅಭಿವೃದ್ಧಿಪಡಿಸಿದೆ. ರಾಸಾಯನಿಕಗಳನ್ನು ಬಳಸದೆ ನೈಸರ್ಗಿಕವಾಗಿ ತಯಾರಿಸುವ ಬೆಲ್ಲಕ್ಕೆ ಸಾಕಷ್ಟು ಬೇಡಿಕೆ ಬರಲಾರಂಭಿಸಿದೆ. ಕೂಲಿ ಕಾರ್ಮಿಕರ ಕೊರತೆಯೂ ನೀಗಿಸಲಿದೆ.

5 ಎಚ್‌ಪಿ ಕ್ರೆಸರ್, ಬ್ಲೋವರ್ ಪಂಪ್, ಸ್ವಯಂಚಾಲಿತ ಯಂತ್ರ, 3 ಗಾಳಿಯಂತ್ರ, ಕೊಪ್ಪರಿಗೆ ಸೇರಿ ಇತರ ಯಂತ್ರಗಳು ಘಟಕದಲ್ಲಿ ಇರಲಿವೆ. ವಿವಿಧ ಆಕಾರಗಳಲ್ಲಿ ಬೆಲ್ಲ ತಯಾರಿಸಬಹುದು. 100 ಕೆ.ಜಿ.ಯಿಂದ 5 ಸಾವಿರ ಕೆ.ಜಿ.ವರೆಗೆ ಬೆಲ್ಲ ತಯಾರಿಸಬಹುದು. 15 ಮಂದಿ ಮಾಡುವ ಕೆಲಸವನ್ನು 3-4 ಕಾರ್ಮಿಕರ ನೆರವಿನಿಂದ ಇದೊಂದೇ ಯಂತ್ರ ಮಾಡಬಲ್ಲದು. ಈ ಘಟಕ ಸ್ಥಾಪಿಸಲು 30 ಲಕ್ಷ ರೂ. ವೆಚ್ಚವಾಗಲಿದೆ.

ಮಂಡ್ಯ ಬೆಲ್ಲ ಗಾಣ ಉತ್ಪಾದಕ ಸಂಘ ಹಾಗೂ ಮಂಡ್ಯ ಕೃಷಿ ಇಲಾಖೆಯ ಅಧಿಕಾರಿ ಸಹಕಾರದಿಂದ ಕೃಷಿ ಮೇಳದಲ್ಲಿ ಘಟಕ ಪ್ರತಿಷ್ಠಾಪಿಸಿದ್ದೇನೆ. ರಾಜ್ಯ ಕೃಷಿ ಉತ್ಪನ್ನಗಳ ಸಂಸ್ಕರಣೆ ಹಾಗೂ ರ್ತು ನಿಗಮ (ಕೆಪೆಕ್), ರೈತ ಉತ್ಪಾದಕ ಸಂಸ್ಥೆಗಳಿಗೆ ಪಿಎಂಎಫ್​​​ಎಂಇ ಯೋಜನೆಯಡಿ ಘಟಕ ಸ್ಥಾಪಿಸಲು 15 ಲಕ್ಷ ರೂ. ವರೆಗೆ ಸಬ್ಸಿಡಿ ನೀಡಲಿದೆ. 2ರಿಂದ 10 ಎಕರೆ ಹೊಂದಿರುವ ರೈತರಿಗೆ ಈ ಘಟಕ ವರದಾನವಾಗಿದೆ.