ಮದುವೆ ನಿರಾಕರಿಸಿದ್ದಕ್ಕೆ ಪ್ರಿಯಕರನಿಂದ ಪ್ರೇಯಸಿ ಕೊಲೆ

ಆರೋಪಿ ರಾಜೀವ್ (25) ಬಂಧಿತ ಪ್ರಿಯಕರ. ಅಂಜಲಿ (23) ಹತ್ಯೆಯಾದ ಯುವತಿ. ಈ ಸಂಬಂಧ ಮಹಾಲಕ್ಷ್ಮಿ ಲೇಔಟ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ. ಮಹಾಲಕ್ಷ್ಮಿ ಲೇಔಟ್‌ನ ಪೈಪ್ ಲೈನ್ ರಸ್ತೆಯಲ್ಲಿ ಭಾನುವಾರ ರಾತ್ರಿ ಕೃತ್ಯ ನಡೆದಿದೆ.

ಅಂಜಲಿ ಮತ್ತು ರಾಜೀವ್ ಒಂದೇ ಕಡೆ ಕೆಲಸ ಮಾಡುತ್ತಿದ್ದಾಗ ಇಬ್ಬರ ನಡುವೆ ಪ್ರೀತಿ ಉಂಟಾಗಿ ಮೂರ್ನಾಲ್ಕು ವರ್ಷಗಳಿಂದ ಒಬ್ಬರನ್ನೊಬ್ಬರು ಪರಸ್ಪರ ಪ್ರೀತಿಸುತ್ತಿದ್ದರು. ಇಬ್ಬರ ಕುಟುಂಬಸ್ಥರಿಗೂ ಈ ವಿಚಾರ ತಿಳಿದಿತ್ತು.

ಯುವತಿಯ ಕುಟುಂಬಸ್ಥರು, ರಾಜೀವ್‌ನ ಹಿನ್ನೆಲೆ ವಿಚಾರಿಸಲು ಪ್ರಾರಂಭಿಸಿದಾಗ ಆತ ಅಪರಾಧ ಚಟುವಟಿಕೆಯಲ್ಲಿ ಭಾಗಿಯಾಗಿರುವುದು ಗೊತ್ತಾಗಿದೆ. ಆದ್ದರಿಂದ ಅಂಜಲಿಯ ಕುಟುಂಬಸ್ಥರು ಅವರ ಮದುವೆಗೆ ಒಪ್ಪಿರಲಿಲ್ಲ. ಆಗ ಯುವತಿಯೂ ಸಹ ತನ್ನ ಪಾಲಕರ ಮಾತಿಗೆ ತಲೆಭಾಗಿ ಮದುವೆ ತಿರಸ್ಕರಿಸಿದ್ದಳು ಎಂದು ಪೊಲೀಸರು ತಿಳಿಸಿದ್ದಾರೆ.

ಮದುವೆಯಾಗುವಂತೆ ಪೀಡಿಸಿದ್ದ: ಮನೆಯಲ್ಲಿ ಅಪ್ಪ-ಅಮ್ಮ ಮದುವೆಗೆ ಒಪ್ಪುತ್ತಿಲ್ಲ. ಹಾಗಾಗಿ ಮದುವೆ ಆಗುವುದು ಬೇಡವೆಂದು ಪ್ರಿಯಕರನಿಗೆ ಅಂಜಲಿ ತಿಳಿಸಿದ್ದಳು. ಕಾಲ ಕ್ರಮೇಣ ರಾಜೀವ್‌ನಿಂದ ಅಂತರ ಕಾಪಾಡಿಕೊಳ್ಳುತ್ತಿದ್ದಳು. ಆದರೂ ಸುಮ್ಮನಾಗದ ಪ್ರಿಯಕರ ರಾಜೀವ್ ಮದುವೆ ಆಗಲೇ ಬೇಕು ಒತ್ತಾಯಿಸುತ್ತಿದ್ದ ಎಂದು ಪೊಲೀಸರು ತಿಳಿಸಿದ್ದಾರೆ.

ಆರೋಪಿ ರಾಜೀವ್, ಅಂಜಲಿಯನ್ನು ಊಟಕ್ಕೆಂದು ಪೈಪ್‌ಲೈನ್ ರಸ್ತೆಗೆ ಕರೆದಿದ್ದ. ಆ ವೇಳೆ ಮತ್ತೆ ಮದುವೆ ಬಗ್ಗೆ ಇಬ್ಬರ ನಡುವೆ ವಾಗ್ವಾದ ನಡೆದಿದೆ. ಆದರೆ, ಅಂಜಲಿ ಮದುವೆಗೆ ಆಗುವುದಿಲ್ಲ ಎಂದು ಖಡಕ್ ಉತ್ತರ ಕೊಟ್ಟಿದ್ದಕ್ಕೆ ತಾಳ್ಮೆ ಕಳೆದುಕೊಂಡ ರಾಜೀವ್, ಚಾಕುವಿನಿಂದ ಆಕೆಯ ಕುತ್ತಿಗೆಗೆ ಇರಿದಿದ್ದಾನೆ. ತಕ್ಷಣವೇ ಸ್ಥಳೀಯರು ಅಂಜಲಿಯನ್ನು ಆಸ್ಪತ್ರೆಗೆ ದಾಖಲಿಸಿದ್ದಾರೆ. ಚಿಕಿತ್ಸೆ ಫಲಕಾರಿಯಾಗದೇ ಯುವತಿ ಮೃತಪಟ್ಟಿದ್ದಾಳೆ.