ಸಾವಯವ ಕೃಷಿಯಿಂದ ನೆಮ್ಮದಿ ಬದುಕು

ತಾಲೂಕಿನ ಬೇಟೋಳಿ ಗ್ರಾಮದ ತಂಗಳಮಕ್ಕಿ ನಿವಾಸಿ ಬಿ.ಕೆ.ವಿಶ್ವನಾಥ್ ಕೃಷಿಯೊಂದಿಗೆ ಜೇನು ಸಾಕಣೆ, ಭತ್ತದ ಬೆಳೆ, ತೋಟದ ಬದಿಯಲ್ಲಿ ವಿವಿಧ ರೀತಿಯ ಹಣ್ಣಿನ ಗಿಡಗಳನ್ನು ಬೆಳೆಸುವುದರೊಂದಿಗೆ ಸಾವಯವ ಗೊಬ್ಬರ ಬಳಸಿ ತೋಟ, ಗದ್ದೆಯ ಫಲವತ್ತತೆಯನ್ನು ಹೆಚ್ಚಿಸಿಕೊಳ್ಳುವ ಮೂಲಕ ಸಮೃದ್ಧ ಜೀವನ ನಡೆಸುತ್ತಿದ್ದಾರೆ.

ಪ್ರಮುಖ ವಾಣಿಜ್ಯ ಬೆಳೆಯಾಗಿ ರೋಬಸ್ಟಾ ಕಾಫಿ ಬೆಳೆದಿದ್ದು ಇದರೊಂದಿಗೆ ತೋಟದೊಳಗಿನ ರಸ್ತೆ ಬದಿಯಲ್ಲಿ ಅರೇಬಿಕಾ ಕಾಫಿ ಗಿಡಗಳನ್ನು ಬೆಳೆಸಿದ್ದಾರೆ. ಇದು ಇವರ ಮೂಲ ಆದಾಯವಾಗಿದೆ. ಗಡಿಗಳ ಬೆಳವಣಿಗೆಗೆ ವಾರ್ಷಿಕವಾಗಿ ಸಗಣಿ ಗೊಬ್ಬರ ಒದಗಿಸುತ್ತಿರುವುದರಿಂದ ಗಿಡಗಳು ಉತ್ತಮವಾಗಿ ಬೆಳವಣಿಗೆ ಕಾಣುವುದರೊಂದಿಗೆ ಫಸಲಿನ ಗುಣಮಟ್ಟ ಉತ್ತಮವಾಗುತ್ತದೆ ಎಂಬುದು ವಿಶ್ವನಾಥ ಅವರ ಅಭಿಪ್ರಾಯ. ಇದರೊಂದಿಗೆ ತೋಟದಲ್ಲಿ ಶೇ.60ರಷ್ಟು ಬಿಸಿಲು, 40ರಷ್ಟು ನೆರಳನ್ನು ಕಾಪಾಡಬೇಕು. ಇದರಿಂದ ಫಸಲು ಹಾಗೂ ಗಿಡದ ಬೆಳವಣಿಗೆ ಸಮರ್ಪಕವಾಗಿ ನಡೆಯುತ್ತದೆ. ಇದರೊಂದಿಗೆ ತೋಟದಲ್ಲಿ ಪ್ರಮುಖ ಉಪಬೆಳೆಯಾಗಿ ಕಾಳುಮೆಣಸನ್ನು ಬೆಳೆಯಲಾಗಿದ್ದು, ಇದರ ಮೂಲಕವು ಆದಾಯ ಕಂಡುಕೊಂಡಿದ್ದಾರೆ.

ತೋಟದಲ್ಲಿ ವಿವಿಧ ತಳಿಯ ಕರಿಮೆಣಸನ್ನು ಬೆಳೆಯಲಾಗಿದ್ದು, ಹೆಚ್ಚಿನ ಭಾಗದ ಮರಗಳಲ್ಲಿ ಕರಿಮೆಣಸನ್ನು ಬೆಳೆಸುವುದರೊಂದಿಗೆ ಪ್ರತಿ ವರ್ಷ ಮಳೆಗಾಲದಲ್ಲಿ ಹೊಸ ಬಳ್ಳಿಗಳನ್ನು ನಾಟಿ ಮಾಡುತ್ತಾರೆ. ಸುಮಾರು ಅರ್ಧ ಎಕರೆಯಷ್ಟು ಜಾಗದಲ್ಲಿ ಅಡಕೆ ಬೆಳೆ ಬೆಳೆಯಲಾಗಿದ್ದು ಎಲ್ಲ ಗಿಡಗಳು ಉತ್ತಮ ಫಸಲು ನೀಡುವ ಸ್ಥಿತಿಯಲ್ಲಿದೆ. ಹಸಿ ಅಡಕೆಯನ್ನು ಕೊಯ್ಲು ಮಾಡಿ ಮಾರುಕಟ್ಟೆಗೆ ಮಾರಾಟ ಮಾಡುತ್ತಾರೆ. ಅಲ್ಲದೆ ಮನೆ ಸಮೀಪ ಹಾಗೂ ತೋಟದ ಬದಿಯಲ್ಲಿ ಕೆಲವು ತೆಂಗಿನ ಮರಗಳನ್ನು ಬೆಳೆಸಿದ್ದು ಮನೆ ಬಳಕೆಗೆ ಬೇಕಾದಷ್ಟು ಉಳಿಸಿಕೊಂಡು ಉಳಿದಿದ್ದನ್ನು ಗ್ರಾಹಕರಿಗೆ ನೇರವಾಗಿ ಮಾರುವ ಮೂಲಕ ಆದಾಯ ಬರುವಂತೆ ಮಾಡಿಕೊಂಡಿದ್ದಾರೆ.

ತೋಟದಲ್ಲಿ ವಿವಿಧ ತಳಿಯ ಬಾಳೆ ಗಿಡಗಳಿದ್ದು ಸ್ಥಳೀಯ ಮಾರುಕಟ್ಟೆಗೆ ಅದನ್ನು ಮಾರುತ್ತಾರೆ. ಅಷ್ಟೇ ಅಲ್ಲದೆ ಸಫೋಟ, ಸೀಬೆಕಾಯಿ, ನಕ್ಷತ್ರ ಹಣ್ಣು, ಬಟರ್ ಫ್ರೂಟ್, ಕೈಹುಳಿ, ನಿಂಬೆಹಣ್ಣು ಬೆಳೆದಿದ್ದಾರೆ. ಗಿಡ-ಬಳ್ಳಿಗಳ ಪೋಷಣೆಗಾಗಿ ಕೊಟ್ಟಿಗೆ ಗೊಬ್ಬರವನ್ನು ಬಳಸುತ್ತಿದ್ದು, ಪ್ರತಿ ಎರಡು ವರ್ಷಗಳಿಗೊಮ್ಮೆ ತೋಟ ಹಾಗೂ ಗದ್ದೆಗಳಿಗೆ ಸುಣ್ಣ ಹಾಕುತ್ತಾರೆ. ತೋಟ ಹಾಗೂ ಗದ್ದೆಗೆ ನೀರನ್ನು ಒದಗಿಸಲು ಕೆರೆ ನೀರಾವರಿ ಪದ್ಧತಿ ಅನುಸರಿಸುತ್ತಿರುವುದು ಇಲ್ಲಿನ ವಿಶೇಷ.

ಕಟಾವಿನ ನಂತರ ಗದ್ದೆಗಳಲ್ಲಿ ಬದನೆ, ಮೆಣಸು, ಮೂಲಂಗಿ, ನೂಕೋಲು , ಸೋರೆಕಾಯಿ, ಸೌತೆಕಾಯಿ, ಅಲಸಂದೆ, ಬೀನ್ಸ್, ಬಸಳೆ , ಸಿಹಿ ಕುಂಬಳ, ಬೂದಿ ಕುಂಬಳ, ಮಂಗಳೂರು ಸೌತೆ , ತೊಂಡೆಕಾಯಿ ಬೆಳೆಯಲಾಗುತ್ತದೆ. ಇತ್ತೀಚಿನ ವರ್ಷಗಳಲ್ಲಿ ತರಕಾರಿ ಬೆಳೆಯುವ ಪ್ರಮಾಣ ಅಲ್ಪಮಟ್ಟಿಗೆ ಕಡಿಮೆಯಾಗಿದ್ದು ಉತ್ತಮ ಮಾರುಕಟ್ಟೆ ಬೆಲೆ ದೊರಕದಿರುವುದು ಹಾಗೂ ಕೀಟಬಾಧೆಯಿಂದ ಉತ್ತಮ ಫಸಲು ದೊರೆಯುತ್ತಿಲ್ಲ. ಬೆಳೆದಂತಹ ತರಕಾರಿಗಳನ್ನು ಗ್ರಾಹಕರಿಗೆ ನೇರವಾಗಿ ಮಾರುತ್ತಾರೆ. ಉಳಿದಿದ್ದನ್ನು ವಿರಾಜಪೇಟೆ ತರಕಾರಿ ಮಾರುಕಟ್ಟೆಗೆ ಮಾರಾಟ ಮಾಡುವ ಮೂಲಕ ಆದಾಯ ಕಂಡುಕೊಂಡಿದ್ದಾರೆ.

ಕೃಷಿ ಚಟುವಟಿಕೆಗಳಿಗೆ ಕೆರೆಯನ್ನು ಆಶ್ರಯಿಸಿದ್ದು ತರಕಾರಿ ಗಿಡಗಳನ್ನು ಬೆಳೆಸಲು ಸಗಣಿ ಗೊಬ್ಬರ ಹಾಗೂ ಕೊಟ್ಟಿಗೆಯನ್ನು ತೊಳೆದ ನೀರಿನ ತ್ಯಾಜ್ಯವನ್ನೂ ಸಹ ಬಳಸಲಾಗುತ್ತಿದೆ. ಹವ್ಯಾಸಕ್ಕಾಗಿ ಜೇನು ಸಾಕಣೆ ಆರಂಭ ಮಾಡಿದ್ದು ಕೃಷಿ ಚಟುವಟಿಕೆಯಲ್ಲಿ ಉತ್ತಮ ಪರಾಗಸ್ಪರ್ಶ ನಡೆಯಲಿ ಎಂಬ ಉದ್ದೇಶದಿಂದ ಹತ್ತು ತುಡುವೆ ಜೇನಿನ ಕುಟುಂಬಗಳನ್ನು ಸಾಕುತ್ತಿದ್ದಾರೆ.