ಗ್ರಾಮೀಣರಿಗೂ ಗುಣಮಟ್ಟದ ಶಿಕ್ಷಣ ಸಿಗಲಿ

ಶಿರಾ ತಾಲೂಕಿನ ತಾವರೆಕರೆ ಗ್ರಾಮದಲ್ಲಿ ವಿಧಾನ ಪರಿಷತ್​ ಸ್ಥಳಿಯ ಪ್ರದೇಶಾಭಿವೃದ್ಧಿ ಅನುದಾನ 50 ಲಕ್ಷ ರೂ. ಹಾಗೂ ಚಿದಾನಂದ್​ ಎಂ.ಗೌಡ ಅವರ ವೈಯಕ್ತಿಕ 50 ಲಕ್ಷ ರೂ. ಸೇರಿ ಒಟ್ಟು 1 ಕೋಟಿ ವೆಚ್ಚದಲ್ಲಿ ನೂತನವಾಗಿ ನಿಮಾರ್ಣವಾಗಿರುವ ಸರ್ಕಾರಿ ಮಾದರಿ ಹಿರಿಯ ಪ್ರಾಥಮಿಕ ಪಾಠಶಾಲೆಯ ಹೈಟೆಕ್​ ಕಟ್ಟಡವನ್ನು ಉದ್ಘಾಟಿಸಿ ಮಾತನಾಡಿ, ಗ್ರಾಮೀಣ ಭಾಗದ ವಿದ್ಯಾರ್ಥಿಗಳಿಗೆ ನಗರ ಪ್ರದೇಶಗಳ ರೀತಿಯಲ್ಲಿ ಗುಣಮಟ್ಟದ ಶೈಕ್ಷಣಿಕ ಸೌಲಭ್ಯ ಒದಗಿಸುವ ಉದ್ದೇಶದಿಂದ ತಾವರೆಕೆರೆ ಗ್ರಾಮದಲ್ಲಿ ಹೈಟೆಕ್​ ಶಾಲಾ ಕಟ್ಟಡ ನಿರ್ಮಿಸಲಾಗಿದೆ ಎಂದರು.

ಶಿರಾ ತಾಲೂಕನ್ನು ಶಿಕ್ಷಣ ಕಾಶಿಯನ್ನಾಗಿ ಮಾಡಬೇಕೆಂಬ ಪರಿಕಲ್ಪನೆ ಹೊಂದಿದ್ದು, ಈ ನಿಟ್ಟಿನಲ್ಲಿ ಕಳೆದ 6 ವರ್ಷಗಳಿಂದ 6 ಸರ್ಕಾರಿ ಶಾಲೆಗಳನ್ನು ಹೈಟೆಕ್​ ಮಾದರಿಯಲ್ಲಿ ನಿರ್ಮಿಸಿದ್ದೇನೆ. ಅದೇ ರೀತಿ ನನಗೆ ತಾಲೂಕಿನ ಜನ ಒಮ್ಮೆ ಅಧಿಕಾರ ನೀಡಿದರೆ ತಾಲೂಕಿನ 250 ಗ್ರಾಮಗಳಲ್ಲೂ ಹೈಟೆಕ್​ ಮಾದರಿಯ ಶಾಲೆಗಳನ್ನು ನಿರ್ಮಿಸುತ್ತೇನೆ. ಯಾವುದೇ ಕಾರಣಕ್ಕೂ ಸರ್ಕಾರಿ ಶಾಲೆಗಳು ಮುಚ್ಚಲು ಖಾಸಗಿ ಶಾಲೆಗಳು ಕಾರಣವಲ್ಲ. ಸರ್ಕಾರಿ ಶಾಲೆಗಳಲ್ಲಿ ಶೇ.40 ಶಾಲೆ ಶಿಥಿಲಗೊಂಡಿವೆ. ಇದರಿಂದ ದಾಖಲಾತಿ ಕಡಿಮೆಯಾಗಿದೆ. ಇದರಿಂದ ಸರ್ಕಾರ 6000 ಕೆಪಿಎಸ್​ ಶಾಲೆ ಸ್ಥಾಪಿಸುವ ಮೂಲಕ 40 ಸಾವಿರ ಶಾಲೆ ಮುಚ್ಚುವ ಹುನ್ನಾರ ಮಾಡಿದ್ದಾರೆ ಎಂದು ದೂರಿದರು.

ಸಂಸದ ಗೋವಿಂದ ಎಂ ಕಾರಜೋಳ ಮಾತನಾಡಿ, ಭಗವಂತ ಚಿದಾನಂದ್​ ಎಂ.ಗೌಡ ಅವರಿಗೆ 100 ವರ್ಷ ಆಯುಸ್ಸು ಕೊಡಲಿ, ಅವರು ತನ್ನ ಜೀವಿತಾವಧಿಯಲ್ಲಿ 100 ಶಾಲೆ ನಿರ್ಮಿಸಲಿ. ದುಡಿದ ಒಂದು ಭಾಗ ಸಮಾಜಕ್ಕೆ ಕೊಡಲಿ. ಇನ್ನು ಹೆಚ್ಚು ಶಾಲೆ ನಿಮಾರ್ಣ ಮಾಡಲಿ. ಎಲ್ಲ ದಾನಗಳಿಗಿಂತ ಶ್ರೇಷ್ಠ ದಾನ ವಿದ್ಯಾದಾನ. ನಿರಂತರವಾಗಿ ಸರ್ಕಾರಿ ಶಾಲೆ ಅಭಿವೃದ್ಧಿಗೊಳ್ಳಲಿ. ಶಿಕ್ಷಕರು ಸಮಾಜಮುಖಿ ಕೆಲಸ ಮಾಡಬೇಕು. ಸಾಮಾಜಿಕ ಕಳಕಳಿಯಿಂದ ಕೆಲಸ ಮಾಡಬೇಕು ಎಂದ ಅವರು, ಸರ್ಕಾರಿ ಶಾಲೆಗಳಲ್ಲಿ ಮೂಲ ಸೌಲಭ್ಯಗಳ ಕೊರತೆಯಿಂದ ರಾಜ್ಯದಲ್ಲಿ 3000 ಕನ್ನಡ ಮಧ್ಯಮ ಶಾಲೆ ಮುಚ್ಚಿದ್ದಾರೆ. ಈ ಕುರಿತು ಮುಖ್ಯಮಂತ್ರಿ ಡಿ.ಕೆ.ಶಿವಕುಮಾರ್​ ಗಮನಹರಿಸಬೇಕು ಎಂದರು.

ತಾಪಂ ಇಒ ಆರ್​.ಹರೀಶ್​ ಮಾತನಾಡಿದರು. ಶಾಲಾ ಶಿಕ್ಷಣ ಇಲಾಖೆಯ ಉಪನಿರ್ದೇಶಕ ಮಾಧವರೆಡ್ಡಿ, ತಹಸೀಲ್ದಾರ್​ ಆನಂದ್​ ಕುಮಾರ್​, ಬಿಇಒ ಕೃಷ್ಣಪ್ಪ, ತಾರೇಗೌಡ, ಕಾಡುಗೊಲ್ಲ ನಿಗಮದ ಮಾಜಿ ಅಧ್ಯಕ್ಷ ಚಂಗಾವರ ಮಾರಣ್ಣ, ದಿಶಾ ಸಮಿತಿ ಸದಸ್ಯ ಮದಲೂರು ಮೂರ್ತಿ ಮಾಸ್ಟರ್​, ಮುಖ್ಯಶಿಕ್ಷಕಿ ದ್ರಾಕ್ಷಾಯಿಣಿ, ಪ್ರಾಥಮಿಕ ಶಾಲಾ ಶಿಕ್ಷಕರ ಸಂಘದ ಜಿಲ್ಲಾಧ್ಯಕ್ಷ ದೇವರಾಜು, ತಾಲೂಕು ಅಧ್ಯಕ್ಷ ಹನುಮಂತರಾಜು, ಕೃಷಿ ಸಂಶೋಧಕ ಡಾ. ಆದರ್ಶ್​, ತಾಪಂ ಮಾಜಿ ಸದಸ್ಯ ಹೊನ್ನಗೊಂಡನಹಳ್ಳಿ ಚಿಕ್ಕಣ್ಣ ಮತ್ತಿತರರು ಇದ್ದರು.