ರಾಜ್ಯ

ಕೃಷಿ ಖುಷಿ ಪಸರಿಸಲಿ

ಕೃಷಿ
ಕೃಷಿ
ಮೋಹನ್​ ಶೆಟ್ಟಿ
Published on: 
ಬೆಂಗಳೂರು ಕೃಷಿ ​ವಿಶ್ವವಿದ್ಯಾಲಯದ ವತಿಯಿಂದ ನ.13ರಿಂದ 16ರವರೆಗೆ ನಾಲ್ಕು ದಿನಗಳ ಕೃಷಿ ಮೇಳ ನಡೆದು ಭರ್ಜರಿ ಯಶಸ್ಸು ಕಂಡಿತು. ಈ ಅವಧಿಯಲ್ಲಿ ಒಟ್ಟಾರೆ ಸುಮಾರು 51 ಲಕ್ಷ ಜನರು ಮೇಳಕ್ಕೆ ಭೇಟಿ ನೀಡಿದರು. ದೊಡ್ಡ ಸಂಖ್ಯೆಯ ರೈತರೂ ಈ ಕೃಷಿಜಾತ್ರೆಯತ್ತ ಹೆಜ್ಜೆಹಾಕಿದರು.
ಬೆಂಗಳೂರು ಕೃಷಿ ವಿವಿ ವಾರ್ಷಿಕವಾಗಿ ಕೃಷಿ ಮೇಳ ಹಮ್ಮಿಕೊಳ್ಳುತ್ತ ಬಂದಿದ್ದು, ನಗರ ಪ್ರದೇಶದಲ್ಲಿಯೂ ಕೃಷಿ ಸೊಗಡನ್ನು ಪಸರಿಸಲು ಇದರಿಂದ ಅನುಕೂಲವಾಗುತ್ತಿದೆ. ಬೆಂಗಳೂರಿನಲ್ಲಿ ಜನಸಂಖ್ಯೆ ಜಾಸ್ತಿ ಇರುವುದರಿಂದಾಗಿ ಕೃಷಿ ಮೇಳಕ್ಕೆ ಬರುವವರ ಸಂಖ್ಯೆ ಸಹಜವಾಗಿ ಹೆಚ್ಚಿರುತ್ತದೆ ಎಂಬುದನ್ನು ಒಂದು ಹಂತಕ್ಕೆ ಒಪ್ಪಬಹುದಾದರೂ, ಕೃಷಿಪ್ರೀತಿ ಇರುವವರ ಸಂಖ್ಯೆ ಕಡಿಮೆ ಏನಿಲ್ಲ ಎನ್ನುವುದನ್ನೂ ಗಮನಿಸಬೇಕಾಗುತ್ತದೆ. ಇಂಥ ಮೇಳಗಳು ಜನರಲ್ಲಿ ಕೃಷಿಖುಷಿಯನ್ನು ಪಸರಿಸುವ ಕೆಲಸವನ್ನೂ ಮಾಡುತ್ತವೆ.
ಕೃಷಿ ಸಂಬಂಧಿ ವಿಚಾರ ಸಂಕಿರಣಗಳು, ಪ್ರಾತ್ಯಕ್ಷಿಕೆ, ಆವಿಷ್ಕಾರಿ ಉತ್ಪನ್ನಗಳ ಪ್ರದರ್ಶನ, ತಜ್ಞರ ಜತೆ ಸಮಾಲೋಚನೆ- ಇವೆಲ್ಲ ನಡೆಯುವುದರಿಂದಾಗಿ ಇಂಥ ಮೇಳಗಳು ಮಾಹಿತಿ ವಿನಿಮಯಕ್ಕೂ ವೇದಿಕೆಯಾಗುತ್ತವೆ. ರೈತರು-ಗ್ರಾಹಕರ ಮುಖಾಮುಖಿ ಭೇಟಿಗೂ ಅವಕಾಶವಾಗುತ್ತದೆ. ಇವತ್ತಿನ ದಿನಮಾನದಲ್ಲಿ ಉತ್ಪಾದನೆ ವೆಚ್ಚ ಹೆಚ್ಚಳ, ಕೃಷಿ ಕಾರ್ವಿುಕರ ಕೊರತೆ, ಹವಾಮಾನ ವೈಪರೀತ್ಯದಿಂದಾಗುವ ನಷ್ಟ ಇತ್ಯಾದಿ ಕಾರಣದಿಂದ ಎಷ್ಟೋ ಜನರು ಕೃಷಿಯಿಂದ ವಿಮುಖವಾಗುತ್ತಿದ್ದಾರೆ. ಹೀಗಿರುವಾಗ, ಕೃಷಿಯಲ್ಲಿ ನವೀನ ವಿಧಾನಗಳು ಮತ್ತು ತಂತ್ರಜ್ಞಾನ ಬಳಕೆ ಅನಿವಾರ್ಯ.
ಬಹು ಬೆಳೆಗಳ ಬಿತ್ತನೆ ಮತ್ತು ರಸಗೊಬ್ಬರ ಹಾಕುವ ಕೆಲಸವನ್ನು ಮಾಡುವ ಕೃಷಿ ಬಾಟ್ ಯಂತ್ರ, ಕೃಷಿ ವಸ್ತುಗಳ ಸಾಗಣೆ ಜತೆಗೆ ಔಷಧ ಸಿಂಪಡಣೆ, ಕಳೆ ಕೀಳುವ ಕೆಲಸಕ್ಕಾಗಿಯೂ ಬಳಸಬಹುದಾದ ವಿನೂತನ ಬೈಕ್ ಮಾದರಿ ಟ್ರಾಲಿ, ಕೃಷಿ ಜಮೀನಿನ ಸಮೀಕ್ಷೆ ಮಾಡಿ ಹಾನಿಯಾದ ಭಾಗಕ್ಕೆ ಮಾತ್ರ ಔಷಧ ಸಿಂಪಡಿಸುವ ಡ್ರೋನ್, ಒಂದೇ ಸಮಯದಲ್ಲಿ ನಾಲ್ಕು ಸಾಲಿನಲ್ಲಿ ಬಿತ್ತನೆ ಮಾಡಬಲ್ಲ ರೋವರ್ ಯಂತ್ರ- ಇತ್ಯಾದಿ ನವೀನ ಉಪಕರಣಗಳನ್ನು ಬೆಂಗಳೂರು ಮೇಳದಲ್ಲಿ ಪ್ರದರ್ಶಿಸಲಾಯಿತು. ಕಾಲವು ಒಡ್ಡುವ ಸವಾಲನ್ನು ಎದುರಿಸಿ ನಿಲ್ಲಬೇಕು ಎಂದಾದಲ್ಲಿ ಕೃಷಿ ಮಾತ್ರವಲ್ಲ ಎಲ್ಲ ರಂಗಗಳೂ ಹೊಸತನಕ್ಕೆ ತುಡಿಯಲೇಬೇಕಾಗುತ್ತದೆ.
ಹಳೆಯದು ಮತ್ತು ಹೊಸದರ ಹದವಾದ ಮಿಶ್ರಣ ಸೂತ್ರವನ್ನು ಕಂಡುಕೊಂಡು ಅನುಸರಿಸಬೇಕಾಗುತ್ತದೆ. ಒಟ್ಟಾರೆ ರೈತರ ಸಂಖ್ಯೆಯನ್ನು ತೆಗೆದುಕೊಂಡರೆ ಜಮೀನು ಪ್ರಮಾಣ ಕಡಿಮೆ ಇರುವುದು, ನೀರಾವರಿ ವ್ಯವಸ್ಥೆ ಇರದೆ ಮಳೆ ಮೇಲೇ ಅವಲಂಬನೆ ಹೆಚ್ಚಿಗೆಯಿರುವುದು, ಬೆಲೆ ಏರಿಳಿತ, ಕೃಷಿ ಉತ್ಪನ್ನಗಳ ಸುರಕ್ಷಿತ ಸಂಗ್ರಹಕ್ಕೆ ವ್ಯವಸ್ಥೆಯ ಕೊರತೆ- ಮುಂತಾದ ಸಮಸ್ಯೆಗಳನ್ನು ರೈತರು ಎದುರಿಸುತ್ತಿದ್ದಾರೆ. ಇದರ ಜತೆಗೆ ನಗರ ವಲಸೆ ಪ್ರಮಾಣ ಹೆಚ್ಚುತ್ತಲೇ ಇರುವುದು ಕೃಷಿ ಚಟುವಟಿಕೆ ಮೇಲೆ ಪರಿಣಾಮ ಬೀರಿದೆ.
ಕೃಷಿ ಕ್ಷೇತ್ರದ ಸಮಸ್ಯೆಗಳ ಪರಿಹಾರಕ್ಕೆ ಸರ್ಕಾರಗಳು ಏನೂ ಮಾಡುತ್ತಿಲ್ಲ ಎಂದು ಬಿಡುಬೀಸಾಗಿ ಹೇಳಲಾಗದು; ಒಂದಷ್ಟು ಕೆಲಸಗಳು, ನೀತಿನಿರ್ಧಾರಗಳು ಆಗುತ್ತಿವೆ. ಹಾಗೇ, ಆಗಬೇಕಾದ ಕೆಲಸಗಳೂ ಸಾಕಷ್ಟಿವೆ ಎಂಬುದೂ ನಿಜ. ಕೃಷಿಪ್ರೀತಿಯನ್ನು ಪಸರಿಸುವ, ಕೃಷಿಯನ್ನು ಗೌರವಿಸುವ, ಕೃಷಿಯತ್ತ ಹೆಚ್ಚೆಚ್ಚು ಜನರನ್ನು ಸೆಳೆಯುವ ಕೆಲಸ ಆಗುತ್ತಲೇ ಇರಬೇಕು. ಈ ನಿಟ್ಟಿನಲ್ಲಿ ಸಮಾಜ ಮತ್ತು ಸರ್ಕಾರ ಇಬ್ಬರ ಹೊಣೆಗಾರಿಕೆಯೂ ಇದೆ.
ವಿಜಯವಾಣಿ ನಂ.1 ದಿನ ಪತ್ರಿಕೆ | Vijayavani | Kannada News
www.vijayavani.net