ನವಿಲು ಗರಿ ಉಡುಪು ಧರಿಸಿ ರೀಲ್ಸ್; ಬಿಗ್ ಬಾಸ್ ಮಾಜಿ ಸ್ಪರ್ಧಿ ನಿವೇದಿತ ಗೌಡ, ಕಿಶನ್ ವಿರುದ್ಧ ದೂರು..Bengaluru

ಬೆಂಗಳೂರು: ಕನ್ನಡದ 'ಹೇ ನವಿಲೇ' ಹಾಡಿಗೆ, ನವಿಲು ಗರಿಯ ಉಡುಪು ತೊಟ್ಟು ರೀಲ್ಸ್​ ಮಾಡಿದ್ದ ನಿವೇದಿತಾ ಗೌಡ ಹಾಗೂ ಕಿಶನ್​ ಬಿಳಗಲಿಗೆ ಸದ್ಯ ಕಾನೂನು ಸಂಕಷ್ಟ ಎದುರಾಗಿದೆ. ಈ ಸಂಬಂಧ ಅರಣ್ಯ ಇಲಾಖೆಗೆ ಸಾಮಾಜಿಕ ಕಾರ್ಯಕರ್ತ ದಿನೇಶ್​ ಕಲ್ಲಹಳ್ಳಿ ದೂರು ನೀಡಿದ್ದಾರೆ.

ಕಿಶನ್​ ಅವರು ತಮ್ಮ ನೃತ್ಯ ಕೌಶಲ್ಯವನ್ನೇ ಮುಂದಿಟ್ಟುಕೊಂಡು ನಾನಾ ರೀತಿಯ ಪ್ರಯೋಗಗಳನ್ನು ಮಾಡುತ್ತಾರೆ. ನೃತ್ಯದಲ್ಲೇ ರೋಮಾಂಚನಕಾರಿ ಪರಿಕಲ್ಪನೆಗಳನ್ನು ತಂದು ಹೊಸದಾದ ಲೋಕಕ್ಕೆ ಎಳೆದೊಯ್ಯುತ್ತಾರೆ. ಇಂತದ್ದೇ ಒಂದು ಸೋಜಿಗಕ್ಕೆ ಕೈ ಹಾಕಿ ಸಂಕಷ್ಟಕ್ಕೆ ಸಿಲುಕಿಕೊಂಡಿದ್ದಾರೆ. ಕಳೆದ ಎರಡು ವಾರಗಳ ಹಿಂದೆ ನವಿಲಿನ ಗರಿಗಳುಳ್ಳ ಡ್ರೆಸ್​​ ಧರಿಸಿ, ಹೆಣ್​​ ನವಿಲೇ ಹಾಡಿಗೆ ಬಿಗ್​ಬಾಸ್​​ ಮಾಜಿ ಸ್ಪರ್ಧಿ ನಿವೇದಿತಾ ಗೌಡರೊಂದಿಗೆ ನೃತ್ಯ ಮಾಡಿದ್ದರು. ಸದ್ಯ ಇದರ ವಿರುದ್ಧ ಅರಣ್ಯ ಇಲಾಖೆಯಲ್ಲಿ ದೂರು ದಾಖಲಾಗಿದೆ.

ಹಂಸಲೇಖ ಸಂಗೀತ ಹಾಗೂ ಸಾಹಿತ್ಯದ ಹಾಡಾದ ಹೆಣ್​ ನವಿಲೇ ಹಾಡಿಗೆ ತಕ್ಕಂತೆ ಕಿಶನ್​ ಅವರು ಪ್ರದೇಶವನ್ನು ಕ್ರಿಯೇಟ್​ ಮಾಡಿದ್ದರು. ನಿವೇದಿತಾ ಗೌಡ ಅವರು ಸಹ ನವಿಲಿನ ಪುಕ್ಕವಿರುವ ಉಡುಪು ಧರಿಸಿದ್ದರು. ಈ ರೀಲ್ಸ್​ ಭಾರಿ ವೈರಲ್​ ಆಗಿತ್ತು. ಆದರೆ, ಇಂತಹ ನೈಜ ನವಿಲು ಗರಿ ಬಳಕೆ ಮಾಡಿಕೊಂಡು ಉಡುಪು ತಯಾರಿಸಿ, ಸಾರ್ವಜನಿಕವಾಗಿ ಹಂಚಿಕೊಳ್ಳುವುದು ವನ್ಯಜೀವಿ(ಸಂರಕ್ಷಣೆ)ಕಾಯ್ದೆ, 1972 ಸ್ಪಷ್ಟ ಉಲ್ಲಂಘನೆ ಎಂದು ಸಾಮಾಜಿಕ ಕಾರ್ಯಕರ್ತ ದಿನೇಶ್​ ಕಲ್ಲಹಳ್ಳಿ ತಮ್ಮ ದೂರಿನಲ್ಲಿ ಉಲ್ಲೇಖಿಸಿದ್ದಾರೆ.

ಪ್ರಕರಣ ದಾಖಲಾಗಿರುವ ಸುದ್ದಿ ವೈರಲ್​ ಆಗುತ್ತಲೇ ಇನ್​ಸ್ಟಾಗ್ರಾಮ್​ ಸೇರಿದಂತೆ ಯಾವುದೇ ಆನ್​ಲೈನ್​ ಪ್ಲಾಟ್​ಫಾರ್ಮ್​ನಲ್ಲಿ ನವಿಲಿನ ಡ್ಯಾನ್ಸ್​​ ರೀಲ್ಸ್​ ಕಾಣಿಸುತ್ತಿಲ್ಲ. ಅಂದಹಾಗೆ ಇದನ್ನು ತಕ್ಷಣವೇ ಡಿಲೀಟ್ ಮಾಡಿರಬಹುದು ಎನ್ನಲಾಗುತ್ತಿದೆ.