ರಾಜ್ಯ

ದ್ವಿತೀಯ ಪಿಯುಸಿ ಪರೀಕ್ಷೆ-2 ಫಲಿತಾಂಶ ಪ್ರಕಟ: ಪರೀಕ್ಷೆ 1 ಮತ್ತು 2 ಸೇರಿ 92.25 ರಷ್ಟು ವಿದ್ಯಾರ್ಥಿಗಳು ಉತ್ತೀರ್ಣ! Karnataka 2nd PUC Exam 2 Result

ದ್ವಿತೀಯ ಪಿಯುಸಿ ಪರೀಕ್ಷೆ-2 ಫಲಿತಾಂಶ ಪ್ರಕಟ: ಪರೀಕ್ಷೆ 1 ಮತ್ತು 2 ಸೇರಿ 92.25 ರಷ್ಟು ವಿದ್ಯಾರ್ಥಿಗಳು ಉತ್ತೀರ್ಣ! Karnataka 2nd PUC Exam 2 Result
ದ್ವಿತೀಯ ಪಿಯುಸಿ ಪರೀಕ್ಷೆ-2 ಫಲಿತಾಂಶ ಪ್ರಕಟ: ಪರೀಕ್ಷೆ 1 ಮತ್ತು 2 ಸೇರಿ 92.25 ರಷ್ಟು ವಿದ್ಯಾರ್ಥಿಗಳು ಉತ್ತೀರ್ಣ! Karnataka 2nd PUC Exam 2 Result
Published on: 

ಪ್ರಮುಖ ಮುಖ್ಯಾಂಶಗಳು

  • ಶಿಕ್ಷಣ ಇಲಾಖೆಯು 2026ರ ದ್ವಿತೀಯ ಪಿಯುಸಿ ಪರೀಕ್ಷೆ-2ರ ಫಲಿತಾಂಶವನ್ನು ಅಧಿಕೃತವಾಗಿ ಬಿಡುಗಡೆ ಮಾಡಿದೆ
  • ಈ ಬಾರಿಯ ಒಟ್ಟು (ಪರೀಕ್ಷೆ 1 ಮತ್ತು 2 ಸೇರಿ) ಫಲಿತಾಂಶದಲ್ಲಿ ಕರ್ನಾಟಕವು ಸಾರ್ವಕಾಲಿಕ ದಾಖಲೆ ನಿರ್ಮಿಸಿದೆ
  • ಒಟ್ಟಾರೆ 92.25% ವಿದ್ಯಾರ್ಥಿಗಳು ಉತ್ತೀರ್ಣರಾಗಿದ್ದು ಕಳೆದ ವರ್ಷದ ಫಲಿತಾಂಶಕ್ಕೆ ಹೋಲಿಸಿದರೆ 7.06%ರಷ್ಟು ಏರಿಕೆ
  • ವಿದ್ಯಾರ್ಥಿಗಳ ದಾಖಲೆ ಫಲಿತಾಂಶಕ್ಕೆ ಶಿಕ್ಷಣ ಸಚಿವ ಮಧು ಬಂಗಾರಪ್ಪ ಅವರು ಹರ್ಷ ವ್ಯಕ್ತಪಡಿಸಿದ್ದಾರೆ
ಬೆಂಗಳೂರು: ರಾಜ್ಯದ ಶಿಕ್ಷಣ ಇಲಾಖೆಯು 2026ರ ದ್ವಿತೀಯ ಪಿಯುಸಿ ಪರೀಕ್ಷೆ-2ರ ಫಲಿತಾಂಶವನ್ನು ( Karnataka 2nd PUC Exam 2 Result ) ಅಧಿಕೃತವಾಗಿ ಬಿಡುಗಡೆ ಮಾಡಿದೆ. ಈ ಬಾರಿಯ ಒಟ್ಟು (ಪರೀಕ್ಷೆ 1 ಮತ್ತು 2 ಸೇರಿ) ಫಲಿತಾಂಶದಲ್ಲಿ ಕರ್ನಾಟಕವು ಸಾರ್ವಕಾಲಿಕ ದಾಖಲೆ ನಿರ್ಮಿಸಿದ್ದು, ಒಟ್ಟಾರೆ 92.25% ವಿದ್ಯಾರ್ಥಿಗಳು ಉತ್ತೀರ್ಣರಾಗಿದ್ದಾರೆ. ಕಳೆದ ವರ್ಷದ ಫಲಿತಾಂಶಕ್ಕೆ (85.19%) ಹೋಲಿಸಿದರೆ ಈ ಬಾರಿ 7.06%ರಷ್ಟು ಏರಿಕೆ ಕಂಡುಬಂದಿದೆ.
ಭಾರತ ದೇಶದಲ್ಲೇ ಪ್ರಪ್ರಥಮ ಬಾರಿಗೆ ವಿದ್ಯಾರ್ಥಿಗಳ ಹಿತದೃಷ್ಟಿಯಿಂದ ಎರಡು ಪರೀಕ್ಷೆಗಳ ವಿಧಾನವನ್ನು ಜಾರಿಗೆ ತಂದ ಹೆಗ್ಗಳಿಕೆ ಕರ್ನಾಟಕ ಸರ್ಕಾರದ್ದಾಗಿದೆ. ಎರಡು ಪರೀಕ್ಷೆಗಳಲ್ಲಿ ವಿದ್ಯಾರ್ಥಿಗಳು ಗಳಿಸಿದ ಗರಿಷ್ಠ ಅಂಕಗಳನ್ನೇ ಅಂತಿಮವಾಗಿ ಪರಿಗಣಿಸಿರುವುದರಿಂದ, ಕೇವಲ ಉತ್ತೀರ್ಣರಾದವರ ಸಂಖ್ಯೆಯಷ್ಟೇ ಅಲ್ಲದೆ ವಿದ್ಯಾರ್ಥಿಗಳು ಪಡೆದ ಅಂಕಗಳ ಗುಣಮಟ್ಟವೂ ಹೆಚ್ಚಾಗಿದೆ ಎಂದು ಶಿಕ್ಷಣ ಸಚಿವ ಮಧು ಬಂಗಾರಪ್ಪ ಅವರು ಹರ್ಷ ವ್ಯಕ್ತಪಡಿಸಿದ್ದಾರೆ.

ನಗರವನ್ನು ಹಿಂದಿಕ್ಕಿದ ಗ್ರಾಮೀಣ ಪ್ರತಿಭೆ!

ಈ ಬಾರಿಯ ಫಲಿತಾಂಶದಲ್ಲಿ ಹಳ್ಳಿ ಮಕ್ಕಳ ಸಾಧನೆ ಎದ್ದು ಕಾಣುತ್ತಿದೆ. ಗ್ರಾಮಾಂತರ ಪ್ರದೇಶದ ವಿದ್ಯಾರ್ಥಿಗಳು 92.77% ಉತ್ತೀರ್ಣರಾಗುವ ಮೂಲಕ, 92.01% ಫಲಿತಾಂಶ ಪಡೆದ ನಗರ ಪ್ರದೇಶದ ವಿದ್ಯಾರ್ಥಿಗಳಿಗಿಂತ ಮುನ್ನಡೆ ಸಾಧಿಸಿದ್ದಾರೆ. ಇನ್ನು ಲಿಂಗವಾರು ಫಲಿತಾಂಶದಲ್ಲೂ ಬಾಲಕಿಯರೇ ಮೇಲುಗೈ ಸಾಧಿಸಿದ್ದು, ಬಾಲಕಿಯರು 93.62% ಹಾಗೂ ಬಾಲಕರು 90.52% ಉತ್ತೀರ್ಣರಾಗಿದ್ದಾರೆ.

ಎಲ್ಲ ವಿಭಾಗ ಹಾಗೂ ವರ್ಗಗಳಲ್ಲೂ ಭರ್ಜರಿ ಪ್ರಗತಿ

ವಿಭಾಗವಾರು: ವಿಜ್ಞಾನ ವಿಭಾಗದಲ್ಲಿ ದಾಖಲೆಯ 96.01%, ವಾಣಿಜ್ಯ ವಿಭಾಗದಲ್ಲಿ 92.84% ಮತ್ತು ಕಲಾ ವಿಭಾಗದಲ್ಲಿ 83.31% ವಿದ್ಯಾರ್ಥಿಗಳು ಪಾಸ್ ಆಗಿದ್ದಾರೆ.

ಸರ್ಕಾರಿ ಕಾಲೇಜುಗಳ ಸಾಧನೆ: ಸರ್ಕಾರಿ ಪದವಿ ಪೂರ್ವ ಕಾಲೇಜುಗಳ ಫಲಿತಾಂಶವು ಕಳೆದ ವರ್ಷದ 73.04% ರಿಂದ ಈ ಬಾರಿ 87.03%ಕ್ಕೆ (13.99% ಏರಿಕೆ) ಜಿಗಿದಿದೆ. ವಸತಿ ಕಾಲೇಜುಗಳು 97.08% ರಷ್ಟು ಅತ್ಯುನ್ನತ ಫಲಿತಾಂಶ ದಾಖಲಿಸಿವೆ.

ವರ್ಗವಾರು: ಪರಿಶಿಷ್ಟ ಜಾತಿ (SC) ವಿದ್ಯಾರ್ಥಿಗಳು 88.11% ಹಾಗೂ ಪರಿಶಿಷ್ಟ ಪಂಗಡದ (ST) ವಿದ್ಯಾರ್ಥಿಗಳು 88.26% ರಷ್ಟು ಸಾಧನೆ ಮಾಡಿದ್ದಾರೆ. ಇನ್ನುಳಿದ ಹಿಂದುಳಿದ ವರ್ಗಗಳಲ್ಲೂ ಉತ್ತಮ ಪ್ರಗತಿ ಕಂಡುಬಂದಿದೆ.

ಉನ್ನತ ಶ್ರೇಣಿ: ಈ ಬಾರಿ ಬರೋಬ್ಬರಿ 1,73,507 ವಿದ್ಯಾರ್ಥಿಗಳು ಉನ್ನತ ಶ್ರೇಣಿಯಲ್ಲಿ ಉತ್ತೀರ್ಣರಾಗುವ ಮೂಲಕ ಶೈಕ್ಷಣಿಕ ಗುಣಮಟ್ಟವನ್ನು ಸಾಬೀತುಪಡಿಸಿದ್ದಾರೆ.

ಫಲಿತಾಂಶ ವೀಕ್ಷಣೆ ಹೇಗೆ?

ವಿದ್ಯಾರ್ಥಿಗಳು ಮೇ 21ರ ಮಧ್ಯಾಹ್ನ 1.00 ಗಂಟೆಯಿಂದಲೇ ಮಂಡಳಿಯ ಅಧಿಕೃತ ವೆಬ್‌ಸೈಟ್‌ಗಳಾದ https://karresults.nic.in https://dpue-exam.karnataka.gov.in ನಲ್ಲಿ ತಮ್ಮ ನೋಂದಣಿ ಸಂಖ್ಯೆಯನ್ನು ನಮೂದಿಸಿ ಫಲಿತಾಂಶ ವೀಕ್ಷಿಸಬಹುದಾಗಿದೆ. ವಿಷಯವಾರು ಅತ್ಯಧಿಕ ಅಂಕಗಳನ್ನು ಹೋಲಿಸಿ ಸಿದ್ಧಪಡಿಸಲಾದ ಅಂತಿಮ ಫಲಿತಾಂಶದ ಪಟ್ಟಿಯು ಮೇ 22, 2026 ರಂದು KSEAB ವೆಬ್‌ಸೈಟ್‌ನಲ್ಲಿ ಪ್ರಕಟಗೊಳ್ಳಲಿದೆ.

ಉತ್ತರ ಪ್ರತಿಕೆ ಮತ್ತು ಮರುಮೌಲ್ಯಮಾಪನಕ್ಕೆ ಅವಕಾಶ

ಫಲಿತಾಂಶದಿಂದ ತೃಪ್ತರಾಗದ ವಿದ್ಯಾರ್ಥಿಗಳಿಗೆ ಉತ್ತರ ಪತ್ರಿಕೆಯ ಸ್ಕ್ಯಾನ್​ ಕಾಪಿ ಹಾಗೂ ಮರುಮೌಲ್ಯಮಾಪನಕ್ಕೆ ಆನ್‌ಲೈನ್ ಮೂಲಕ ಅರ್ಜಿ ಸಲ್ಲಿಸಲು ಅವಕಾಶ ಕಲ್ಪಿಸಲಾಗಿದೆ.
ಗಮನಿಸಿ: ಮರುಮೌಲ್ಯಮಾಪನಕ್ಕೆ ಅರ್ಜಿ ಸಲ್ಲಿಸುವವರು ಕಡ್ಡಾಯವಾಗಿ ಮೊದಲು ಛಾಯಾಪ್ರತಿ ಪಡೆದಿರಬೇಕು. ಮರುಮೌಲ್ಯಮಾಪನದಲ್ಲಿ ಬರುವ ಅಂಕಗಳೇ ಅಂತಿಮವಾಗಿದ್ದು, ಹಳೆಯ ಅಂಕಗಳನ್ನು ಮರುಸ್ಥಾಪಿಸಲು ಅವಕಾಶವಿರುವುದಿಲ್ಲ.
ವಿಜಯವಾಣಿ ನಂ.1 ದಿನ ಪತ್ರಿಕೆ | Vijayavani | Kannada News
www.vijayavani.net