ಹಂಪಿ ನಾಡಿನ ಜನರ ಭೂಕೈಲಾಸ

‘ಅವರವರ ಭಾವಕ್ಕೆ.. ಅವರವರ ಭಕ್ತಿಗೆ’ ಎಂಬ ನಾಣ್ಣುಡಿಯಂತೆ ವಿಶ್ವ ಪಾರಂಪರಿಕ ತಾಣ ಹಂಪಿ ನಾಡಿನ ಜನತೆಗೆ ಅಚ್ಚರಿಗಳ ಗಣಿಯಾಗಿದೆ. ಉತ್ಸವದ ಸಂಭ್ರಮದ ನಡುವೆಯೂ ನಿತ್ಯದ ಪ್ರವಾಸಿಗರೊಂದಿಗೆ ಎಲ್ಲ ವರ್ಗದ ಜನರನ್ನು ತನ್ನತ್ತ ಸೆಳೆಯುತ್ತಿರುವ ಹಂಪಿ, 

ಇಂದು ‘ಭೂ ಕೈಲಾಸ’ದಂತೆ ಕಂಗೊಳಿಸುತ್ತಿದೆ. ವಾರ್ಷಿಕ ಕಾರ್ಯಕ್ರಮವಾದ ಈ ಉತ್ಸವವು ಮೂರು ದಿನಗಳ ಕಾಲ ವಿಜಯನಗರ ಸಾಮ್ರಾಜ್ಯವನ್ನು ಸೂರ್ಯ ಮುಳುಗದ ನಾಡಾಗಿ ಪರಿವರ್ತಿಸಿದೆ. ಇಡೀ ಹಂಪಿ ಪ್ರದೇಶವು ದೀಪಾಲಂಕಾರದಲ್ಲಿ ಮಿಂದೆದ್ದಿದ್ದು, ಸ್ವದೇಶಿ ಮತ್ತು ವಿದೇಶಿ ಪ್ರವಾಸಿಗರು ಎಂದಿನಂತೆ ಇಲ್ಲಿಗೆ ಎಡತಾಕುತ್ತಿದ್ದಾರೆ.

ವಿಶ್ವಕ್ಕೆ ಕೌತುಕದ ವಿಷಯಗಳನ್ನು ಒದಗಿಸುವ ಅಕ್ಷಯ ಪಾತ್ರೆಯಾಗಿರುವ ವಿಜಯನಗರವು ಇಲ್ಲಿಗೆ ಬರುವ ಜನರ ಕುತೂಹಲವನ್ನು ತಣಿಸುತ್ತಿದೆ. ಇದು ಚಿಂತಕರು ಮತ್ತು ವಿಚಾರವಂತರಿಗೆ ಜ್ಞಾನದ ಭಂಡಾರವಾಗಿದ್ದರೆ, ಪಡ್ಡೆ ಹುಡುಗರಿಗೆ ಮನರಂಜನೆಯ ಬೂರಿ ಭೋಜನವಾಗಿದೆ. ಸಾಹಿತ್ಯಾಸಕ್ತರಿಗೆ ಹೊಸ ಪಠ್ಯದಂತಿರುವ ಈ ತಾಣ, ಚಿಣ್ಣರಿಗೆ ಅಚ್ಚರಿಗಳ ಅಕ್ಷಯ ಗಣಿಯಾಗಿದೆ.

ಪ್ರವಾಸಿಗರಿಗೆ ಇದೊಂದು ಮಾಹಿತಿಯ ಕಣಜ. ಶಾಲಾ ವಿದ್ಯಾರ್ಥಿಗಳು, ಸಂಶೋಧನಾರ್ಥಿಗಳು, ಗ್ರಾಮೀಣರು, ಅಧಿಕಾರಿ ವರ್ಗದವರು, ಕಾರ್ಮಿಕರು ಹಾಗೂ ವ್ಯಾಪಾರಿಗಳು ಹೀಗೆ ಒಬ್ಬೊಬ್ಬರಿಗೆ ಒಂದೊಂದು ರೀತಿಯಲ್ಲಿ ಹಂಪಿ ಆಪ್ತವಾಗುತ್ತಿದೆ. ಶನಿವಾರ ರಜಾ ದಿನವಾಗಿದ್ದರಿಂದ ಬೆಳಗಿನಿಂದಲೇ ಜನರು ಹಂಪಿಯತ್ತ ಹೆಜ್ಜೆ ಹಾಕಿ ವಿವಿಧ ವಸ್ತು ಪ್ರದರ್ಶನಗಳನ್ನು ಕಂಡು ಖುಷಿಪಟ್ಟರು.

ಹಂಪಿಯ ಆದಿದೈವ ವಿರೂಪಾಕ್ಷೇಶ್ವರ ದೇವಾಲಯವು ದೈವಿಕ ಭಾವದ ಜತೆಗೆ ‘ಚಿಂತಕರ ಚಾವಡಿ’ಯಾಗಿಯೂ ಮಾರ್ಪಟ್ಟಿದೆ. ಜಗತ್ತಿನಲ್ಲಿ ಅತಿಹೆಚ್ಚು ವಿಮರ್ಶೆ ಹಾಗೂ ಸಂಶೋಧನೆಗೆ ಒಳಗಾದ ವಿಜಯನಗರದ ಆಡಳಿತ ಕುರಿತ ಚಿಂತನೆಗೆ ಇಲ್ಲಿ ದನಿ ಸಿಕ್ಕಿದೆ. 

ರಾಜ್ಯದ ನಾನಾ ಮೂಲೆಗಳಿಂದ ಆಗಮಿಸಿದ ವಿದ್ವಾಂಸರು, ಚಿಂತಕರು, ಕವಿಗಳು, ಸಂಶೋಧನಾರ್ಥಿಗಳು ಹಾಗೂ ಪ್ರಾಧ್ಯಾಪಕರು ತಮ್ಮ ವಿದ್ವತ್ತನ್ನು ಪ್ರದರ್ಶಿಸಿದರು. ಹತ್ತಾರು ಒಳನೋಟಗಳುಳ್ಳ ವಿಷಯಗಳನ್ನು ಪಸರಿಸಿದ ಇವರು, ಸಾಹಿತ್ಯಾಸಕ್ತರು, ಯುವ ಕವಿಗಳು ಮತ್ತು ವಿಚಾರವಂತರಿಗೆ ಜ್ಞಾನ ಭಂಡಾರವನ್ನೇ ತೆರೆದಿಟ್ಟರು. ಇದು ಹಲವರಿಗೆ ಹೊಸ ವಿಚಾರ ಮಂಡನೆಗೆ ದಾರಿಯಾದರೆ, ಕವಿಗಳಿಗೆ ಸಾಹಿತ್ಯ ರಚನೆಗೆ ಪ್ರೇರಣೆಯಾಯಿತು.

ಉತ್ಸವದ ಗುಂಗಿನ ನಡುವೆಯೂ ನಿತ್ಯದ ಪ್ರವಾಸಿಗರು ಸ್ಮಾರಕಗಳ ವೀಕ್ಷಣೆಯಲ್ಲಿ ಮುಳುಗಿದ್ದಾರೆ. ಉತ್ತರ ಮತ್ತು ದಕ್ಷಿಣ ಭಾರತದ ವಿವಿಧ ರಾಜ್ಯಗಳ ಜನರು ಹಾಗೂ ವಿದೇಶಿ ಪ್ರವಾಸಿಗರು ವಿರೂಪಾಕ್ಷೇಶ್ವರ ದೇವಾಲಯ, ಉಗ್ರ ನರಸಿಂಹ, ಸಾಸುವೆಕಾಳು ಗಣಪ ಸೇರಿದಂತೆ ಇನ್ನಿತರ ಸ್ಮಾರಕಗಳ ಬಳಿ ಹೆಚ್ಚಿನ ಸಂಖ್ಯೆಯಲ್ಲಿ ಕಂಡುಬಂದರು. 

ಉತ್ಸವದ ಅಬ್ಬರವಿದ್ದರೂ ಗೈಡ್‌ಗಳಿಗೆ ಪ್ರವಾಸಿಗರ ಕೊರತೆಯಾಗಲಿಲ್ಲ, ಬದಲಾಗಿ ಜನಸಾಗರವೇ ಹರಿದುಬಂದಿದ್ದರಿಂದ ಅವರಿಗೂ ಅನುಕೂಲವಾಯಿತು. ಉತ್ಸವದ ಮನರಂಜನೆಗಿಂತ ಸ್ಮಾರಕಗಳ ದನಿಯನ್ನು ಆಲಿಸುವುದು ಮುಖ್ಯವೆಂದು ಕೆಲ ಪ್ರವಾಸಿಗರು ತಮ್ಮ ಅಭಿಪ್ರಾಯ ಹಂಚಿಕೊಂಡರು.

ಉತ್ಸವದ ಕಾರ್ಯಕ್ರಮಗಳು ಸ್ಥಳೀಯರಿಗೆ ಕೇವಲ ಮನರಂಜನೆಯನ್ನು ಮಾತ್ರ ನೀಡುತ್ತಿಲ್ಲ, ಬದಲಾಗಿ ಬದುಕಿಗೆ ದಾರಿಯನ್ನೂ ಮಾಡಿಕೊಟ್ಟಿವೆ. ಸಾರ್ವಜನಿಕರಿಗೆ ಈ ಬಾರಿ ಸಾಮೂಹಿಕ ಊಟದ ವ್ಯವಸ್ಥೆ ಇಲ್ಲದ ಕಾರಣ ತಳ್ಳುಬಂಡಿ ವ್ಯಾಪಾರಿಗಳು, ಅಂಗಡಿಕಾರರು, 

ಹೋಟೆಲ್ ಮಾಲೀಕರು ಹಾಗೂ ಪಾನ್ ಬೀಡಾ ವ್ಯಾಪಾರಿಗಳಿಗೆ ಇದು ವರ್ಷದ ದುಡಿಮೆಯನ್ನು ನೀಡುತ್ತಿದೆ. ಮೂರು ದಿನಗಳ ಈ ಉತ್ಸವಕ್ಕೆ ಸರ್ಕಾರವು 25 ಕೋಟಿ ರೂ. ವೆಚ್ಚ ಮಾಡಿದರೆ, ಇಲ್ಲಿ ನಡೆಯುವ ನೂರಾರು ಕೋಟಿ ರೂ. ವಹಿವಾಟು ಬಡ ಮತ್ತು ಮಧ್ಯಮ ವರ್ಗದ ಜನರ ಆರ್ಥಿಕ ಭದ್ರತೆಗೆ ಹಾದಿಯಾಗಿದೆ. ಆಟೋ ಹಾಗೂ ಖಾಸಗಿ ವಾಹನಗಳ ಚಾಲಕರಿಗೂ ಇದು ಬದುಕಿನ ಬುತ್ತಿಯನ್ನು ಭರಿಸುತ್ತಿದೆ.

ಉತ್ಸವಕ್ಕೆ ಆಗಮಿಸಿದ ಜನರಲ್ಲಿ ಬಹುಪಾಲು ಮಂದಿ ವೇದಿಕೆ ಕಾರ್ಯಕ್ರಮಗಳಿಗೆ ಹಾಜರಾಗಿದ್ದು ವಿಶೇಷವಾಗಿತ್ತು. ಅದರಲ್ಲೂ ಯುವಕರು ಮತ್ತು ಪಡ್ಡೆ ಹುಡುಗರು ಸಾಂಸ್ಕೃತಿಕ ಹಾಗೂ ರಸಮಂಜರಿ ಕಾರ್ಯಕ್ರಮಗಳಲ್ಲಿ ಸಂಭ್ರಮಿಸಿದರು. ಚಲನಚಿತ್ರ ನಟ-ನಟಿಯರ ಪಾಲ್ಗೊಳ್ಳುವಿಕೆ ಜನರನ್ನು ಇನ್ನಷ್ಟು ರಂಜಿಸಿತು. 

ಉತ್ಸವಕ್ಕಾಗಿ ಒಟ್ಟು ಐದು ವೇದಿಕೆಗಳನ್ನು ನಿರ್ಮಿಸಲಾಗಿದ್ದು, ಸಾಸುವೆಕಾಳು ಗಣಪ ವೇದಿಕೆ, ಎದುರು ಬಸವಣ್ಣ ವೇದಿಕೆ ಹಾಗೂ ಎಂ.ಪಿ. ಪ್ರಕಾಶ ವೇದಿಕೆಗಳಲ್ಲಿ ತಾರಾ ರಂಗಿನ ಮೆರಗು ಹೆಚ್ಚಾಗಿತ್ತು. ಶನಿವಾರದ ರಜೆಯ ಹಿನ್ನೆಲೆಯಲ್ಲಿ ಹೆಚ್ಚಿನ ಸಂಖ್ಯೆಯಲ್ಲಿ ಬಂದ ಜನರು ಎಲ್ಲಾ ವೇದಿಕೆಗಳತ್ತ ಚದುರಿ ಕಾರ್ಯಕ್ರಮಗಳನ್ನು ಆಸ್ವಾದಿಸಿದರು.