ಆದಿಮಾನವ ಕಾಲದ ಇತಿಹಾಸ: ಸಮ್ಮೇಳನ ಸರ್ವಾಧ್ಯಕ್ಷ ಹಿರಿಯ ಸಾಹಿತಿ ಸಣ್ಣ ನಾಗಪ್ಪ ಮಾತನಾಡಿ, ತುಮಕೂರು ಜಿಲ್ಲೆಗೆ ಸೇರಿದ ಪಾವಗಡ ವೀರಭೂಮಿ. ಈ ಹೆಸರು ಕೇಳಿದೊಡನೆ ನೆನಪಾಗುವುದು ಶತಶತಮಾನಗಳ ಇತಿಹಾಸವನ್ನು ತನ್ನ ಗರ್ಭದಲ್ಲಿ ಅಡಗಿಸಿಕೊಂಡಿರುವ ಗಿರಿದುರ್ಗಗಳು, ಕಲ್ಲಿನ ಕಥೆಗಳು ಮತ್ತು ಪಾಳೆಗಾರರ ಶೌರ್ಯದ ಗಾಥೆಗಳು, ಬಿಸಿಲು ನಾಡು ಎಂದೇ ಪ್ರಸಿದ್ಧವಾಗಿದ್ದರೂ ಇತಿಹಾಸದ ಕಾಲ ದೃಷ್ಟಿಯಲ್ಲಿ ಇದು ಒಂದು ಉಜ್ವಲವಾದ ವೈಭವದ ಬೀಡಾಗಿದೆ. ಪಾವಡಗದ ಇತಿಹಾಸ ಕೇವಲ ರಾಜರ ಆಳ್ವಿಕೆಯಿಂದ ಆರಂಭವಾಗುವುದಿಲ್ಲ, ಆದಿಮಾನವನ ಕಾಲದವರೆಗೂ ವ್ಯಾಪಿಸಿದೆ. ತಾಲೂಕಿನ ಹಲವು ನೆಲೆಗಳಲ್ಲಿ ಆದಿ ಹಳೇ ಶಿಲಾಯುಗ, ಮಧ್ಯ ಹಳೇ ಶಿಲಾಯುಗ ಮತ್ತು ನವಶಿಲಾಯುಗದ ಕುರುಹುಗಳು ದೊರಕಿವೆ. ಕನ್ನಮೇಡಿ, ನಿಡುಗಲ್ಲು ಉದ್ದಂಡಪ್ಪನಪಾಳ್ಯ, ಬೊಮ್ಮದೇವರಬೆಟ್ಟದಂತಹ ತಾಣಗಳಲ್ಲಿ ಸಿಕ್ಕಿರುವ ಕೈಕೊಡಲಿಗಳು, ಅಮೃತ್ ಪಾತ್ರೆಗಳು, ಸಮಾಧಿಗಳು ಮತ್ತು ಗೀರು ಚಿತ್ರಗಳು, ಬೂದಿಬೆಟ್ಟ, ನಾಗಲಾಪುರಗಳಲ್ಲಿ ಸಿಕ್ಕಿರುವ ಕುರುಹುಗಳು ಸಾಕ್ಷಿಯಾಗಿವೆ. ಸಹಸ್ರಾರು ವರ್ಷಗಳ ಹಿಂದೆಯೇ ಮಾನವನ ವಸತಿಗೆ ಯೋಗ್ಯವಾಗಿತ್ತು ಎಂಬುದನ್ನು ಸಾರುತ್ತವೆ ಎಂದರು.
