ಕಾಟಾಚಾರಕ್ಕೆ ಬಾಬೂಜಿ ಜನ್ಮದಿನ?

ಪಟ್ಟಣದ ತಾಲೂಕು ಪಂಚಾಯಿತಿಸಭಾಂಗಣದಲ್ಲಿ ರಾಷ್ಟ್ರೀಯ ಹಬ್ಬಗಳ ಆಚರಣಾ ಸಮಿತಿಯಿಂದ ಆಯೋಜಿಸಿದ್ದ ಜಗಜೀವನರಾಮ್​ ಜಯಂತಿ ಕಾರ್ಯಕ್ರಮವನ್ನು ಕಾಟಾಚಾರಕ್ಕೆ ಮಾಡಿರುವ ತಹಸೀಲ್ದಾರ್​ ಹಾಗೂ ಸಮಾಜ ಕಲ್ಯಾಣ ಇಲಾಖೆ ಅಧಿಕಾರಿಗಳನ್ನು ವರ್ಗಾವಣೆ ಮಾಡಬೇಕೆಂದು ಒತ್ತಾಯಿಸಿ ಜಯಂತಿಯನ್ನು ಬಹಿಷ್ಕರಿಸಿ ಪಟ್ಟು ಹಿಡಿದ ದಲಿತ ಮುಖಂಡರು ತಾಲೂಕು ಕಚೇರಿ ಸಭಾಂಗಣದ ಮುಂಭಾಗದಲ್ಲಿ ಪ್ರತಿಭಟನೆ ನಡೆಸಿದರು.

ಅಧ್ಯಕ್ಷತೆ ವಹಿಸಿದ್ದ ಶಾಸಕ ಎಸ್​.ಎನ್​.ಸುಬ್ಬಾರೆಡ್ಡಿ, ದಲಿತ ಮುಖಂಡರ ಮನವೊಲಿಸುವ ಪ್ರಯತ್ನ ಮಾಡಿದರೂ ಆಕ್ರೋಶ ಕಡಿಮೆಯಾಗಲಿಲ್ಲ.

ಜಯಂತಿ ಆಚರಣೆ ಕುರಿತ ಪೂರ್ವಭಾವಿ ಸಭೆಯಲ್ಲಿ ದಲಿತ ಮುಖಂಡರೊಂದಿಗೆ ಚರ್ಚಿಸಿ ತೆಗೆದುಕೊಂಡಿರುವ ತೀರ್ಮಾನದಂತೆ ಜಯಂತಿಯನ್ನು ಸರಳವಾಗಿ ಆಚರಿಸಲಾಗುತ್ತಿದೆ. ಆದರೆ, ಈಗ ಏಕಾಏಕಿ ಜಯಂತಿ ಬಗ್ಗೆ ಅಪಸ್ವರ ಎತ್ತುವುದು ಸಮಂಜಸ ಅಲ್ಲ ಎಂದು ತಹಸೀಲ್ದಾರ್​ ಮನೀಷಾಪತ್ರಿ ಹಾಗೂ ಸಮಾಜ ಕಲ್ಯಾಣ ಇಲಾಖೆ ಸಹಾಯಕ ನಿರ್ದೇಶಕಿ ಮಂಜುಳಾ ದಲಿತ ಮುಖಂಡರಿಗೆ ಮಾಹಿತಿ ನೀಡಿದರು.

ಅಧಿಕಾರಿಗಳ ವಿರುದ್ಧ ಏರು ಧ್ವನಿಯಲ್ಲಿ ವಾಗ್ವಾದಕ್ಕಿಳಿದ ದಲಿತ ಮುಖಂಡರು ಕಾರ್ಯಕ್ರಮವನ್ನು ಬಹಿಷ್ಕರಿಸಿ ಸಭಾಂಗಣದಿಂದ ಹೊರ ನಡೆದರು, ಆದರೆ, ಎಸ್​.ಎನ್​.ಸುಬ್ಬಾರೆಡ್ಡಿ, ದಲಿತ ಮುಖಂಡರ ಪ್ರತಿಭಟನೆಗೆ ಜಗ್ಗದೆ ಜಯಂತ್ಯುತ್ಸವನ್ನು ಯಶಸ್ವಿಗೊಳಿಸಿ ಕಾರ್ಯಕ್ರಮದಿಂದ ಹೊರ ನಡೆದರು. ಈ ವೇಳೆ ಶಾಸಕರು ಹಾಗೂ ದಲಿತ ಮುಖಂಡರ ನಡುವೆ ವಾಗ್ವಾದ ನಡೆಯಿತು.

ದಲಿತ ಮುಖಂಡರಾದ ಎ.ವಿ.ಪೂಜಪ್ಪ, ಎಂ.ಜಿ.ಕಿರಣ್​ ಕುಮಾರ್​, ಕೋಟಪ್ಪ, ದೇವಿಕುಂಟೆ ಶ್ರೀನಿವಾಸ್​, ಆ.ನ.ಮೂರ್ತಿ, ಶ್ರೀನಿವಾಸ್​, ವೆಂಕಿ, ಜೀವಿಕ ನಾರಾಯಣಸ್ವಾಮಿ, ಬಿ.ನರಸಿಂಹಪ್ಪ, ಚೌಡಯ್ಯ, ರಾಜಪ್ಪ, ನಾರಾಯಣಸ್ವಾಮಿ, ಎಸ್​.ಎನ್​.ನರಸಿಂಹ, ವೆಂಕಟೇಶ್​ ಇತರರು ಇದ್ದರು.