ಹೆಚ್ಚಬೇಕಿದೆ ಅಂತರಂಗದ ಶ್ರೀಮಂತಿಕೆ

ಬಸವಕಲ್ಯಾಣ: ಅಂತರಂಗ ಹಾಗೂ ಬಹಿರಂಗ ಶುದ್ಧಿಗೆ ಬಸವಾದಿ ಶರಣರು ಆದ್ಯತೆ ನೀಡಿದ್ದರು ಎಂದು ಭಾಲ್ಕಿ ಹಿರೇಮಠ ಸಂಸ್ಥಾನದ ಶ್ರೀ ಗುರುಬಸವ ಪಟ್ಟದ್ದೇವರು ನುಡಿದರು.

ನಗರದ ಅನುಭವ ಮಂಟಪದಲ್ಲಿ ಇತ್ತೀಚೆಗೆ ಹಮ್ಮಿಕೊಂಡಿದ್ದ ತಿಂಗಳ ಅನುಭವ ಮಂಟಪ- 19 ಕಾರ್ಯಕ್ರಮ ಹಾಗೂ ತಾನೇ ದೇವ ಗ್ರಂಥ ಲೋಕಾರ್ಪಣೆ ಸಮಾರಂಭದಲ್ಲಿ ಸಾನ್ನಿಧ್ಯ ವಹಿಸಿ ಮಾತನಾಡಿದ ಅವರು, ಇಂದು ಭೌತಿಕ ಶ್ರೀಮಂತಿಕೆ ಹೆಚ್ಚಿದೆ. ಆದರೆ ಅಂತರಂಗದ ಶ್ರೀಮಂತಿಕೆ ಹೆಚ್ಚಬೇಕಿದೆ. ಅಂತರಂಗ ಶುದ್ದಿಗೆ ಬಸವಾದಿ ಶರಣರ ಆದರ್ಶ ಬದುಕೆ ದಾರಿ ದೀಪವಾಗಿದೆ ಎಂದರು.

ಕಬ್ಬೂರ-&ಬೆಳಗಾವಿಯ ಶಿವಯೋಗ ಸಾಧಕ ಶ್ರೀಧರ ಮುರಾಳೆ ವಿಶೇಷ ಅನುಭಾವ ನೀಡಿ, ಚನ್ನಬಸವಣ್ಣನವರ ಸ್ವರವಚನಗಳು ಆಧ್ಯಾತ್ಮಿಕ ಆಳ, ವಿಶಿಷ್ಟ ಅನುಭಾವ ಹಾಗೂ ಕಠಿಣ ಶೈಲಿಗೆ ಹೆಸರು ವಾಸಿಯಾಗಿದ್ದು, ಇವು ಶರಣ ಸಾಹಿತ್ಯದಲ್ಲಿ ಜ್ಞಾನದೀವಿಗೆಯಂತಿವೆ ಎಂದು ಹೇಳಿದರು.

ಬಸವಣ್ಣನವರ ಸೋದರಳಿಯನಾದ ಚನ್ನಬಸವಣ್ಣನವರು ತಮ್ಮ ಕಿರಿಯ ವಯಸ್ಸಿನಲ್ಲಿಯೇ ಲಿಂಗಾಯತ ಧರ್ಮದ ತತ್ವಗಳನ್ನು ಆಳವಾಗಿ ಪ್ರತಿವಾದಿಸಿದ್ದು ಕೇವಲ ಭಕ್ತಿಗೆ ಸೀಮಿತವಾಗದೆ ಅರಿವು ಮತ್ತು ಆಚಾರಗಳ ಸಮ್ಮಿಲನವನ್ನು ಇವರ ಸ್ವರ ವಚನಗಳು ಎತ್ತಿ ತೋರಿಸುತ್ತವೆ. ಇವರ ವಚನಗಳಲ್ಲಿ ಬರುವ ತಾಂತ್ರಿಕ ಹಾಗೂ ಆಧ್ಯಾತ್ಮಿಕ ಪರಿಭಾಷೆಗಳು ಓದುಗರಿಗೆ ಒಂದು ವಿಶಿಷ್ಟ ಅನುಭಾವವನ್ನು ನೀಡುತ್ತವೆ. ಮಾನವೀಯ ಮೌಲ್ಯ ಹಾಗೂ ಲಿಂಗದ ನಿಜವಾದ ಸ್ವರೂಪವನ್ನು ತಿಳಿಸಿಕೊಡುವಲ್ಲಿ ಇವರ ವಚನಗಳು ಸಫಲವಾಗಿದೆ ಎಂದರು.

ಅನುಭವ ಮಂಟಪದ ಸಂಚಾಲಕ ಶ್ರೀ ಶಿವಾನಂದ ಸ್ವಾಮೀಜಿ, ಪೂಜ್ಯ ಮಾತೆ ಸುಗುಣಾದೇವಿತಾಯಿ, ಶ್ರೀ ಶಂಕರಲಿಂಗ ಸ್ವಾಮೀಜಿ, ಶ್ರೀ ಅನೀಲ ಮಹಾರಾಜರು ಸಮ್ಮುಖ ವಹಿಸಿದ್ದರು. ಜೆಸ್ಕಾಂ ಎಇಇ ರಾಹುಲ್​ ಇಜಾರೆ, ಶರಣ ಸೋಮನಾಥ ಯಾಳವಾರ, ಕರುಣಾ ಸಲಗರ, ಬಸವರಾಜ ರುದ್ರವಾಡಿ, ಸಿದ್ದಣ್ಣ ಬುಮಾ, ಶೋಭಾ ಔರಾದೆ, ಸುನೀತಾ ಪಾಟೀಲ. ಸಹನಾ ಮೂಲಗೆ, ಚನ್ನಬಸಪ್ಪ ವಡ್ಡನಕೇರಿ, ಮಲ್ಲಿಕಾರ್ಜುನ ಸಂಗಮಕರ್​, ಶರಣಬಸಪ್ಪ ಪಾರಾ, ಮಲ್ಲಿಕಾರ್ಜುನ ರಟಕಲ್​ ಇದ್ದರು. ಆಶೋಕ ಕುಂಬಾರ ಸ್ವಾಗತಿಸಿದರು. ಶರಣ ವಿಶ್ವನಾಥ ಮುಕ್ತಾ ನಿರೂಪಣೆ ಮಾಡಿದರು. ಶೋಭಾ ಔರಾದೆ ರಚಿಸಿದ ತಾನೇ ದೇವ ಗ್ರಂಥವನ್ನು ಶ್ರೀಧರ ಮುರಾಳ ಲೋಕಾರ್ಪಣೆ ಮಾಡಿದರು.