ಖ್ಯಾತ ಪತ್ರಕರ್ತ ಪಿ. ಲಂಕೇಶ್ ಪತ್ನಿ, ಲೇಖಕಿ ಇಂದಿರಾ ಲಂಕೇಶ್ ವಯೋಸಹಜ ಕಾಯಿಲೆಯಿಂದ ನಿಧನ: ಗಣ್ಯರ ಸಂತಾಪ! Indira lankesh

Indira lankesh : ಖ್ಯಾತ ಪತ್ರಕರ್ತ, ಸಾಹಿತಿ ಲಂಕೇಶ್ ಅವರ ಮಡದಿ, ಪ್ರಕಾಶಕಿ ಮತ್ತು ಲೇಖಕಿ ಇಂದಿರಾ ಲಂಕೇಶ್ (83) ಅವರು ವಯೋಸಹಜ ಕಾಯಿಲೆಯಿಂದಾಗಿ ಜೂನ್ 15ರ ಸೋಮವಾರ ಬೆಳಗ್ಗೆ ಬೆಂಗಳೂರಿನ ತಮ್ಮ ನಿವಾಸದಲ್ಲಿ ನಿದ್ರೆಯಲ್ಲೇ ಕೊನೆಯುಸಿರೆಳೆದಿದ್ದಾರೆ. 

ಇಂದಿರಾ ಲಂಕೇಶ್​ ಅವರು ಪುತ್ರ ಇಂದ್ರಜಿತ್ ಲಂಕೇಶ್, ಪುತ್ರಿ ಕವಿತಾ ಲಂಕೇಶ್ ಹಾಗೂ ಮೊಮ್ಮಕ್ಕಳನ್ನು ಅಗಲಿದ್ದಾರೆ. ಇವರ ಹಿರಿಯ ಪುತ್ರಿ ಗೌರಿ ಲಂಕೇಶ್ ಅವರು 2017ರ ಸೆಪ್ಟೆಂಬರ್‌ನಲ್ಲಿ ದುಷ್ಕರ್ಮಿಗಳಿಂದ ಹತ್ಯೆಗೀಡಾಗಿದ್ದರು. ಗೌರಿ ಅವರ ನಿಧನದ ಆಘಾತದಿಂದ ಇಂದಿರಾ ಅವರು ಎಂದಿಗೂ ಪೂರ್ತಿಯಾಗಿ ಚೇತರಿಸಿಕೊಳ್ಳದಿದ್ದರೂ, ಧೃತಿಗೆಡದೆ ಧೈರ್ಯದಿಂದ ಕ್ಯಾನ್ಸರ್ ರೋಗವನ್ನು ಗೆದ್ದು ಕೊನೆಯವರೆಗೂ ಸಕ್ರಿಯ ಜೀವನ ನಡೆಸಿದ್ದರು.

ಜೂನ್ 2, 1943 ರಂದು ಶಿವಮೊಗ್ಗದಲ್ಲಿ ಜನಿಸಿದ ಇಂದಿರಾ ಅವರು 1960 ರಲ್ಲಿ ಕನ್ನಡದ ಪ್ರಸಿದ್ಧ ಸಾಹಿತಿ, ಪತ್ರಕರ್ತ ಪಿ. ಲಂಕೇಶ್ ಅವರನ್ನು ವಿವಾಹವಾಗಿ ಬೆಂಗಳೂರಿಗೆ ಬಂದರು. ಲಂಕೇಶ್ ಅವರು ತಮ್ಮ ಪ್ರೊಫೆಸರ್ ವೃತ್ತಿಗೆ ರಾಜೀನಾಮೆ ನೀಡಿ ಸಿನಿಮಾ ಮತ್ತು ನಾಟಕ ರಂಗಕ್ಕೆ ಧುಮುಕಿದಾಗ, ಇಂದಿರಾ ಅವರು ಮನೆಯಿಂದಲೇ ಸೀರೆಗಳನ್ನು ಮಾರಾಟ ಮಾಡುವ ಮೂಲಕ ಆರ್ಥಿಕವಾಗಿ ಬೆಂಬಲವಾಗಿ ನಿಂತರು. 

1979 ರಲ್ಲಿ ಗಾಂಧಿ ಬಜಾರ್‌ನಲ್ಲಿ 'ಮಯೂರ್ ಸಿಲ್ಕ್ಸ್ ಅಂಡ್ ಟೆಕ್ಸ್‌ಟೈಲ್ಸ್' ಎಂಬ ಯಶಸ್ವಿ ಸೀರೆ ಅಂಗಡಿಯನ್ನು ಆರಂಭಿಸುವ ಮೂಲಕ ಸ್ವಾವಲಂಬಿ ಮಹಿಳೆಯಾಗಿ ಗುರುತಿಸಿಕೊಂಡರು. ಇದರ ಬೆನ್ನಲ್ಲೇ 1980 ರಲ್ಲಿ ಲಂಕೇಶ್ ಅವರು ಪ್ರಸಿದ್ಧ 'ಲಂಕೇಶ್ ಪತ್ರಿಕೆ'ಯನ್ನು ಪ್ರಾರಂಭಿಸಿದರು.

ಇಂದಿರಾ ಲಂಕೇಶ್ ಅವರು ಲಂಕೇಶ್ ಅವರೊಂದಿಗಿನ ತಮ್ಮ ಸಂಸಾರ ಜೀವನದ ನೆನಪುಗಳನ್ನು ಅಕ್ಷರರೂಪಕ್ಕೆ ಇಳಿಸಿದ 'ಹುಲಿಮಾವು ಮತ್ತು ನಾನು' ಎಂಬ ಆತ್ಮಕಥನವು ಕನ್ನಡ ಮಹಿಳಾ ಸಾಹಿತ್ಯ ಲೋಕದಲ್ಲಿ ಅತ್ಯಂತ ಪ್ರಮುಖ ಮೈಲಿಗಲ್ಲಾಗಿದೆ. ಇದು ಲಂಕೇಶ್ ಅವರ 'ಹುಲಿಮಾವಿನ ಮರ' ಆತ್ಮಕಥೆಗೆ ಪ್ರತಿಯಾಗಿ ಮೂಡಿಬಂದ ಅಪರೂಪದ ಕೃತಿಯಾಗಿದ್ದು, ಗೌರಿ ಲಂಕೇಶ್ ಪತ್ರಿಕೆಯಲ್ಲಿ ಧಾರಾವಾಹಿಯಾಗಿ ಪ್ರಕಟವಾಗಿತ್ತು. ಈ ಕೃತಿಯು ಮಹಿಳೆಯರ ಆರ್ಥಿಕ ಸ್ವಾತಂತ್ರ್ಯದ ಮಹತ್ವವನ್ನು ಸಾರುತ್ತದೆ. ಲಂಕೇಶ್ ಅವರಿಗೆ ತಿಳಿಸದೆಯೇ ಇಂದಿರಾ ಅವರು ಸ್ವಂತ ಸೈಟ್ ಖರೀದಿಸಿ ಮನೆ ಕಟ್ಟಿಸುವ ಮಟ್ಟಿಗೆ ಆರ್ಥಿಕ ಸ್ವಾವಲಂಬನೆ ಸಾಧಿಸಿದ್ದರು ಎಂಬುದನ್ನು ಈ ಪುಸ್ತಕದಲ್ಲಿ ಕಾಣಬಹುದು.

ಖ್ಯಾತ ವಿಮರ್ಶಕಿ ಎಂ.ಎಸ್. ಆಶಾದೇವಿ ಅವರ ಪ್ರಕಾರ, ಇಂದಿರಾ ಲಂಕೇಶ್ ಅವರು ಒಬ್ಬ ಸೃಜನಶೀಲ ಹಾಗೂ ಮುನಿಸುಗಳ ವ್ಯಕ್ತಿತ್ವದ ಲಂಕೇಶ್ ಅವರ ಪತ್ನಿಯಾಗಿ ಸವಾಲುಗಳನ್ನು ಎದುರಿಸುತ್ತಲೇ ತಮ್ಮದೇ ಸ್ವಂತ ಶಕ್ತಿಯಿಂದ ಬೆಳೆದ ಧೀಮಂತ ಮಹಿಳೆಯಾಗಿದ್ದರು. ಇಬ್ಬರ ನಡುವೆ ಸುದೀರ್ಘ ಮೌನವಿದ್ದರೂ ಅವರ ಸಂಬಂಧ ಪ್ರೀತಿ ಮತ್ತು ಗೌರವದ ಮೇಲೆ ನಿಂತಿತ್ತು. ಇಂದಿರಾ ಅವರ ಚಾರಿತ್ರ್ಯದ ದೃಢತೆಯು ಮಹಿಳೆಯರ ಬಗೆಗಿನ ಲಂಕೇಶ್ ಅವರ ದೃಷ್ಟಿಕೋನವನ್ನೇ ಬದಲಾಯಿಸಿತು; ಇದರ ಪ್ರಭಾವವನ್ನು ಲಂಕೇಶ್ ಅವರ ಕಥೆಗಳ ಪ್ರಮುಖ ಮಹಿಳಾ ಪಾತ್ರಗಳಾದ 'ದೇವಿ' ಮತ್ತು 'ಕಲ್ಲು ಕರಗುವ ಸಮಯ'ದಲ್ಲಿ ಸ್ಪಷ್ಟವಾಗಿ ಗುರುತಿಸಬಹುದಾಗಿದೆ.

ಇಂದಿರಾ ಲಂಕೇಶ್​ ಅವರ ನಿಧನಕ್ಕೆ ಸಿಎಂ ಡಿಕೆ ಶಿವಕುಮಾರ್​ ಹಾಗೂ ಮಾಜಿ ಸಿಎಂ ಸಿದ್ದರಾಮಯ್ಯ ಸೇರಿದಂತೆ ಅನೇಕ ಗಣ್ಯರು ಸಂತಾಪ ಸೂಚಿಸಿದ್ದಾರೆ.