ಸೈನಿಕ ಶಾಲೆಯ ವಿದ್ಯಾರ್ಥಿ ನಾಯಕರ ಪದಗ್ರಹಣ

ಕಾರ್ಯಕ್ರಮದಲ್ಲಿ ಶಾಲೆಯ ಪ್ರಭಾರ ಪ್ರಾಂಶುಪಾಲ ವಿಂಗ್ ಕಮಾಂಡರ್ ಮಹಮದ್ ಶಾಜಿ ಮುಖ್ಯ ಅತಿಥಿಗಳಾಗಿ ಆಗಮಿಸಿ, ನೂತನವಾಗಿ ಆಯ್ಕೆಯಾದ ವಿದ್ಯಾರ್ಥಿ ನಾಯಕರಿಗೆ ಬ್ಯಾಡ್ಜ್‌ಗಳನ್ನು ತೊಡಿಸುವ ಮೂಲಕ ಜವಾಬ್ದಾರಿಗಳನ್ನು ನೀಡಿದರು.

ಶಾಲೆಯ ಉಪನಾಯಕನಾಗಿ ಎಸ್.ಎಚ್.ಸಿದ್ಧಾಂತ್, ಶಾಲೆಯ ಶಿಸ್ತಿನ ಉಪನಾಯಕನಾಗಿ ಮಿತ್ರ, ಶೈಕ್ಷಣಿಕ ಉಪನಾಯಕನಾಗಿ ಹಿಮಾಂಕ್, ಭೋಜನಾಲಯದ ಉಪನಾಯಕನಾಗಿ ಎಚ್.ಎ.ಕೃಷ್ಣ, ಸಾಂಸ್ಕೃತಿಕ ವಿಭಾಗದ ಉಪನಾಯಕನಾಗಿ ಎ.ಕೆಡೆಟ್ ಅರ್ಜಾಕ್, ಕ್ರೀಡಾ ವಿಭಾಗದ ಉಪನಾಯಕಿಯಾಗಿ ದೀಪ್ತಿ ದೇವಿ, ಐ ಟಿ ವಿಭಾಗದ ಉಪನಾಯಕನಾಗಿ ಕಡೆಟ್ ರಿದಮ್ ಆಯ್ಕೆಯಾದರು.

ಶಾಲೆಯ ಎಲ್ಲ ನಿಲಯಗಳ ಉಪನಾಯಕರಿಗೆ ನಿಲಯಗಳ ಬ್ಯಾಡ್ಜ್‌ಗಳನ್ನು ನೀಡಿ ಗೌರವಿಸಲಾಯಿತು. ನೂತನವಾಗಿ ಪದಗ್ರಹಣ ಮಾಡಿದ ವಿದ್ಯಾರ್ಥಿ ನಾಯಕರು ತಮ್ಮ ಕರ್ತವ್ಯಗಳನ್ನು ಪ್ರಾಮಾಣಿಕತೆ, ನಿಷ್ಠೆ ಮತ್ತು ಬದ್ಧತೆಯಿಂದ ನಿರ್ವಹಿಸುವುದಾಗಿ ಜಂಟಿಯಾಗಿ ಪ್ರತಿಜ್ಞಾವಿಧಿ ಸ್ವೀಕರಿಸಿದರು.

ಪ್ರಭಾರ ಪ್ರಾಂಶುಪಾಲ ವಿಂಗ್ ಕಮಾಂಡರ್ ಮೊಹಮ್ಮದ್ ಶಾಜಿ ನೂತನವಾಗಿ ಆಯ್ಕೆಯಾದ ಉಪನಾಯಕರನ್ನು ಅಭಿನಂದಿಸಿದರು ಮತ್ತು ಶಾಲೆಯ ಮೌಲ್ಯಗಳು ಹಾಗೂ ಧ್ಯೇಯವಾಕ್ಯವನ್ನು ಎತ್ತಿಹಿಡಿಯುವಂತೆ ಕರೆ ನೀಡಿದರು. ತರಬೇತಿ ಮತ್ತು ದೈನಂದಿನ ಚಟುವಟಿಕೆಗಳ ಅವಧಿಯಲ್ಲಿ ಸಹವರ್ತಿ ವಿದ್ಯಾರ್ಥಿಗಳೊಂದಿಗೆ ವ್ಯವಹರಿಸುವಾಗ ಶಿಸ್ತು, ನಿಷ್ಪಕ್ಷಪಾತ, ಪ್ರಾಮಾಣಿಕತೆ ಮತ್ತು ಆದರ್ಶ ನಾಯಕತ್ವದ ಗುಣಗಳನ್ನು ಪ್ರದರ್ಶಿಸುವುದು ಅತ್ಯಂತ ಮುಖ್ಯ ಎಂದು ಹೇಳಿದರು.

ಹಿರಿಯ ಶಿಕ್ಷಕ ವಿಬಿನ್ ಕುಮಾರ್, ಬೋಧಕ-ಬೋಧಕೇತರ ಸಿಬ್ಬಂದಿ, ಎನ್‌ಸಿಸಿ ಸಿಬ್ಬಂದಿ, ದೈಹಿಕ ಶಿಕ್ಷಕರು ಹಾಗೂ ಶಾಲೆಯ ವಿದ್ಯಾರ್ಥಿಗಳು ಉಪಸ್ಥಿತರಿದ್ದರು.