ತಿ.ನರಸೀಪುರ ತಾಲೂಕಿನಲ್ಲಿ ಬರದ ಛಾಯೆ

ನಾಡಿನ ಜೀವನದಿ ಕಾವೇರಿ ಹರಿಯುವ ತಾಲೂಕಿನಲ್ಲಿ ತೀವ್ರ ಪ್ರಮಾಣದಲ್ಲಿ ಮಳೆ ಕೊರತೆಯಾಗಿದ್ದರಿಂದ ಕೆರೆಕಟ್ಟೆಗಳೆಲ್ಲ ಬತ್ತಿದ್ದು, ಅಂತರ್ಜಲಮಟ್ಟವೂ ತಗ್ಗಿದೆ. ಮಳೆ ನಂಬಿ ಬಿತ್ತನೆ ಮಾಡಿದ್ದ ಬೆಳೆಗಳೂ ನೆಲ ಕಚ್ಚಿದ್ದು, ಮುಂದಿನ ದಿನಗಳಲ್ಲಿ ಬರದ ತೀವ್ರತೆ ಹೆಚ್ಚಾಗುವ ಸನ್ನಿವೇಶ ದಟ್ಟವಾಗಿದೆ.

ನೀರಾವರಿ ನಾಲೆಗಳ ಅಚ್ಚುಕಟ್ಟು ಹಾಗೂ ಮಳೆಯಾಶ್ರಿತ ಬೆಳೆ ಭೂ ಪ್ರದೇಶವನ್ನು ಹೊಂದಿರುವ ತಾಲೂಕಿನಲ್ಲಿ ಈಗ ಮಳೆಯಿಲ್ಲದೆ ಎರಡೂ ಪ್ರದೇಶಗಳು ಹಸಿರಿಲ್ಲದೆ ಕಳೆಗುಂದಿವೆ. ಕೆಲವೆಡೆ ವಿದ್ಯುತ್ ಪಂಪ್‌ಸೆಟ್ ಅವಲಂಬಿಸಿ ಬೆಳೆದ ಬೆಳೆಗಳನ್ನು ನಿರೀಕ್ಷೆಗೆ ತಕ್ಕಂತೆ ಬೆಳೆಯಲಾಗಿಲ್ಲ. ವಿದ್ಯುತ್ ಮತ್ತು ನೀರಿನ ಅಭಾವ ರೈತರನ್ನು ಕಾಡುತ್ತಿದೆ. ಮಳೆ ಕೊರತೆ ತಾಲೂಕಿನಲ್ಲಿ ಜನ ಜಾನುವಾರುಗಳಿಗೆ ನೀರು ಮತ್ತು ಆಹಾರಕ್ಕೆ ಹಾಹಾಕಾರವನ್ನು ತರಲಿದೆ ಎಂಬ ಭೀತಿ ಎದುರಾಗಿದೆ.

ಕೆಆರ್‌ಎಸ್ ಮತ್ತು ಕಬಿನಿ ಜಲಾಶಯಗಳಲ್ಲಿ ಸಂಗ್ರಹಗೊಳ್ಳುವ ನೀರಿನಮಟ್ಟವೂ ಕ್ಷೀಣಿಸಿರುವುದರಿಂದ ತಾಲೂಕಿನ ವಿಶ್ವೇಶ್ವರಯ್ಯ ತೂರುಗನೂರು ಬ್ರಾಂಚ್, ರಾಮಸ್ವಾಮಿ, ಚಿಕ್ಕದೇವರಾಜ, ರಾಜಪರಮೇಶ್ವರಿ, ಮಾಧವಮನಮಂತ್ರಿ ಹಾಗೂ ಕಬಿನಿ ಬಲದಂಡೆ ನಾಲೆಗಳಿಗೆ ನೀರು ಹರಿಸುವುದನ್ನು ನಿಲ್ಲಿಸಲಾಗಿದೆ. ಅಲ್ಲದೆ ಕಗ್ಗಲೀಪುರ ಸೇರಿದಂತೆ ಉಕ್ಕಲಗೆರೆ, ಚಾಮನಹಳ್ಳಿ, ಮಲಿಯೂರು, ಬಿ.ಬೆಟ್ಟಹಳ್ಳಿ, ಬೂದಹಳ್ಳಿ, ನಾಗಲಗೆರೆ, ನರಗ್ಯಾತನಹಳ್ಳಿ, ಕೊಳತ್ತೂರು, ಚಿದರವಳ್ಳಿ, ರಾಮೇಗೌಡನಪುರ ಹಾಗೂ ಹಲವು ಗ್ರಾಮಗಳ ನೂರಾರು ಕೆರೆಗಳು ಹನಿ ನೀರು ಇಲ್ಲದೆ ಒಣಗುತ್ತಿವೆ.

ಕಾವೇರಿ ನದಿಯ ತೀರದಲ್ಲಿರುವ ಬನ್ನೂರು ಮತ್ತು ನರಸೀಪುರ ಪಟ್ಟಣದಲ್ಲಿ ಕುಡಿಯುವ ನೀರಿನ ಸಮಸ್ಯೆ ಕಂಡು ಬಂದಿಲ್ಲ. ತಾಲೂಕು 7 ಗ್ರಾಮ ಪಂಚಾಯಿತಿಗಳ ವ್ಯಾಪ್ತಿಯ ಹಳ್ಳಿಗಳಲ್ಲಿ ಕುಡಿಯುವ ನೀರಿನ ಅಭಾವ ಎದುರಾಗಿದ್ದು, ಅಧಿಕಾರಿಗಳು ಪರ್ಯಾಯ ಕ್ರಮದ ಮೂಲಕ ಸಮಸ್ಯೆ ಆಗದಂತೆ ನೋಡಿಕೊಂಡಿದ್ದಾರೆ.