ಅಕ್ರಮವಾಗಿ ಸಾಗಿಸುತ್ತಿದ್ದ ಅಕ್ಕಿ ವಶ

ಪ್ರಮುಖ ಮುಖ್ಯಾಂಶಗಳು

• ಖಚಿತ ಮಾಹಿತಿ ಮೇರೆಗೆ ದಾಳಿ
• ಲಕ್ಷಾಂತರ ಮೌಲ್ಯದ ದಾಸ್ತಾನು ವಶ

ಸಿಂದಗಿ ತಹಸೀಲ್ದಾರ್ ನೇತೃತ್ವ ದಾಳಿ

ಸಿಂದಗಿ: ನಗರದ ಸೊಂಪೂರ ರಸ್ತೆಯಲ್ಲಿನ ನ್ಯಾಯಬೆಲೆ ಅಂಗಡಿ ಬಳಿ ಕಾಳಸಂತೆಗೆ ಸಂಗ್ರಹಿಸಲಾಗುತ್ತಿದ್ದ 12.80 ಕ್ವಿಂಟಾಲ್ ಅನ್ನಭಾಗ್ಯ ಪಡಿತರ ಅಕ್ಕಿಯನ್ನು ಮಂಗಳವಾರ ವಶಕ್ಕೆ ಪಡೆಯಲಾಗಿದೆ. ಖಚಿತ ಮಾಹಿತಿ ಮೇರೆಗೆ ತಹಸೀಲ್ದಾರ್ ಕರೆಪ್ಪ ಬೆಳ್ಳಿ ಹಾಗೂ ಆಹಾರ ನಿರೀಕ್ಷಕಿ ವಿದ್ಯಾ ಹಿಪ್ಪರಗಿ ಹಾಗೂ ಪೊಲೀಸ್ ಸಿಬ್ಬಂದಿ ನೇತೃತ್ವದಲ್ಲಿ ದಾಳಿ ನಡೆಸಿ, ಟಾಟಾ ಏಸ್‌ನಲ್ಲಿ ಅಕ್ರಮ ಪಡಿತರ ಅಕ್ಕಿ ಸಾಗಿಸುತ್ತಿದ್ದ 1.80ಲಕ್ಷ ಅಂದಾಜು ಮೌಲ್ಯದ ವಾಹನ ಹಾಗೂ 30,323 ರೂ. ಮೌಲ್ಯದ 50 ಕೆ.ಜಿ ತೂಕದ 26 ಚೀಲ ಅಕ್ಕಿಯನ್ನು ವಶಕ್ಕೆ ಪಡೆಯಲಾಗಿದೆ. ವಾಹನ ಬಳಿ ಅಧಿಕಾರಿಗಳು ತೆರಳುತ್ತಿದ್ದಂತೆ ವಾಹನ ಚಾಲಕ ಪರಾರಿಯಾಗಿದ್ದಾನೆ. ಆಹಾರ ನಿರೀಕ್ಷಕಿ ನೀಡಿದ ದೂರಿನನ್ವಯ ಸಿಂದಗಿ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.