ಕಾಲು ಹಿಡಿದು ಬೇಡುವೆ.. ಕುಡಿಯಲು ನೀರು ಕೊಡಿ! ಶಾಸಕ ಧೀರಜ್ ಮುನಿರಾಜು

ರಾಜ್ಯಪಾಲರ ಭಾಷಣದ ವಂದನಾ ನಿರ್ಣಯದ ಮೇಲೆ ಶುಕ್ರವಾರ ವಿಧಾನಸಭೆಯಲ್ಲಿ ನಡೆದ ಚರ್ಚೆಯಲ್ಲಿ ಪಾಲ್ಗೊಂಡು ಮಾತನಾಡಿದ ಅವರು, ಎತ್ತಿನಹೊಳೆ ಯೋಜನೆಗೆ ಇದುವರೆಗೂ 18 ಸಾವಿರ ಕೋಟಿ ರೂ. ಬಳಕೆಯಾಗಿದೆ. ಆದರೆ ನಮ್ಮ ಜಿಲ್ಲೆಗೆ ಒಂದು ಹನಿ ನೀರು ಬಂದಿಲ್ಲ. 2025ರ ಅಂತ್ಯಕ್ಕೆ ನೀರು ಕೊಡುವುದಾಗಿ ಡಿಸಿಎಂ ನೀಡಿದ್ದ ಭರವಸೆ ಹುಸಿಯಾಗಿದೆ. ನಮ್ಮ ರೈತರಿಗೆ ಕೃಷಿಗೆ ನೀರು ಕೊಡದಿದ್ದರೂ ಕುಡಿಯಲು ನೀರು ಕೊಡಿ ಎಂದು ಮನವಿ ಮಾಡಿದರು.

ನೀರಾವರಿ ಯೋಜನೆ ಪ್ರಗತಿ ಕಂಡಿಲ್ಲ. ಕೆ.ಸಿ. ವ್ಯಾಲಿ, ಎಚ್.ಎನ್. ವ್ಯಾಲಿ, ವೃಷಭಾವತಿ ವ್ಯಾಲಿಯ ಕೊಳಚೆ ನೀರು ಸಂಸ್ಕರಿಸಿ 1,081 ಕೋಟಿ ರೂ. ವೆಚ್ಚದಲ್ಲಿ 70 ಕೆರೆಗಳಿಗೆ ಶುದ್ಧೀಕರಿಸಿದ ನೀರು ಹರಿಬಿಡಲಾಗುತ್ತಿದೆ. ಇದು ನೀರಾವರಿ ಯೋಜನೆಯಲ್ಲ, ಇದರಿಂದ ರೈತರಿಗೆ ಅನುಕೂಲವಾಗಿಲ್ಲ. ನಮ್ಮ ಕ್ಷೇತ್ರದ ಜನರ ಪರವಾಗಿ ಮನವಿ ಮಾಡುವೆ, ಈ ಯೋಜನೆಯ ನೀರು ನಮಗೆ ಬೇಡ. ಕೊಡುವುದಾದರೆ ಅತ್ಯುನ್ನತ ಮಟ್ಟದಲ್ಲಿ ಶುದ್ಧೀಕರಿಸಿದ (ಟರ್ಷರಿ ಟ್ರೀಟೆಡ್ ವಾಟರ್) ನೀರನ್ನು ಕೊಡಿ ಎಂದು ಒತ್ತಾಯಿಸಿದರು.

ಕೃಷಿಭಾಗ್ಯ ಯೋಜನೆ ಘೋಷಿಸಿರುವ ಸರ್ಕಾರ ಕೃಷಿಕರ ಮಕ್ಕಳ ವಿದ್ಯಾಭ್ಯಾಸಕ್ಕೆ ಯೋಜನೆ ರೂಪಿಸಿಲ್ಲ. ರೈತರಿಗೆ ಬೆಳೆ ಕಟಾವಿಗಾಗಿ ಯಂತ್ರ ಒದಿಗಸಿಲ್ಲ. ಇನ್ನು ಸೂಕ್ಷ್ಮ, ಸಣ್ಣ ಮತ್ತು ಮಧ್ಯಮ ಉದ್ಯಮ ವಲಯದಲ್ಲಿ 2025ರ ಡಿಸೆಂಬರ್ ಅಂತ್ಯಕ್ಕೆ 25 ಲಕ್ಷ ನೋಂದಣಿ ಆಗಿದೆ ಎಂದು ಹೇಳುತ್ತಿದೆ. ರಾಜ್ಯದಲ್ಲಿ 2,35,20,000 ಉದ್ಯೋಗ ಸೃಜಿಸಿರುವುದಾಗಿ ರಾಜ್ಯಪಾಲರ ಭಾಷಣದಲ್ಲಿ ಉಲ್ಲೇಖಿಸಿದ್ದಾರೆ. 6 ಕೋಟಿ ಜನರಲ್ಲಿ 2.35 ಕೋಟಿ ಉದ್ಯೋಗ ಕೊಟ್ಟಿದ್ದಾರಾ? ಹಾಗಾದರೆ ಸರ್ಕಾರ ಏನು ಬೇಕಾದರೂ ಹೇಳಬಹುದಾ? ಸರ್ಕಾರ ಇಂತಹ ಸುಳ್ಳು ಮಾಹಿತಿಯನ್ನು ರಾಜ್ಯಪಾಲರ ಮೂಲಕ ಜನರಿಗೆ ತಲುಪಿಸಬೇಕೆಂದಿದ್ದ ಸರ್ಕಾರ ನಡೆಯನ್ನು ಖಂಡಿಸಿದರು.

ಯುವಜನರ ಭವಿಷ್ಯ ಬೆಳಗಿಸಲು ‘ಯುವನಿಧಿ’ ಯೋಜನೆ ಕೊಟ್ಟಿರುವ ಸರ್ಕಾರ, ನಿರುದ್ಯೋಗದ ಜತೆಗೆ ಡ್ರಗ್ ಭಾಗ್ಯವನ್ನೂ ನೀಡಿದೆ. ಕಲಬುರಗಿಯಲ್ಲಿ ಡ್ರಗ್ ಪೆಡ್ಲರ್‌ನನ್ನು ಮಹಾರಾಷ್ಟ್ರ ಪೊಲೀಸರು ಬಂಧಿಸುತ್ತಾರೆ. ಮೈಸೂರು, ಬೆಂಗಳೂರಿನಲ್ಲಿ ಡ್ರಗ್ ಸೀಜ್ ಮಾಡುತ್ತಾರೆ. ಆದರೆ ನಮ್ಮ ರಾಜ್ಯದ ಪೊಲೀಸರಿಗೆ ಇದರ ಮಾಹಿತಿ ಇಲ್ಲ. ಡ್ರಗ್ ಅದರಲ್ಲೂ ಸಿಂಥಿಟಿಕ್ ಡ್ರಗ್ ಇಂದು ಆನ್‌ಲೈನ್ ನಲ್ಲಿ ಮಾರಾಟವಾಗುತ್ತಿದೆ. ನಮ್ಮ ಯುವಜನತೆ ಮದ್ಯಪಾನದಿಂದ ಡ್ರಗ್ ವ್ಯಸನಕ್ಕೆ ಒಳಗಾಗುತ್ತಿದ್ದಾರೆ. ತಲೆ ತಗ್ಗಿಸುವ ಪರಿಸ್ಥಿತಿ ನಿರ್ಮಾಣವಾಗುತ್ತಿದೆ. ಇದು ದೊಡ್ಡ ಅಧಿಕಾರಿಗಳಿಂದ ಆಗುತ್ತಿಲ್ಲ. ಪೊಲೀಸ್ ಇಲಾಖೆಯಲ್ಲಿ ಪಿಸಿಗಳ ಮಟ್ಟದಲ್ಲಿ ಇದಕ್ಕೆ ಪ್ರೋತ್ಸಾಹ ದೊರೆಯುತ್ತಿದೆ. ಹಾಗಾಗಿ ಡ್ರಗ್ ವಿರುದ್ಧ ರಾಜ್ಯದಲ್ಲಿ ಬೃಹತ್ ಆಂದೋಲನ ಆಗಬೇಕು ಎಂದು ಸರ್ಕಾರವನ್ನು ಧೀರಜ್ ಮುನಿರಾಜು ಒತ್ತಾಯಿಸಿದರು.