ಹಿರಾ ಶುಗರ್ಸ್‌ ಹಂಗಾಮಿಗೆ ಸಜ್ಜು

ಹಿರಣ್ಯಕೇಶಿ ಸಹಕಾರ ಸಕ್ಕರೆ ಕಾರ್ಖಾನೆ (ಹಿರಾಶುಗರ್) 2026-27ನೇ ಸಾಲಿನ 67ನೇ ಕಬ್ಬು ಅರೆಯುವ ಹಂಗಾಮಿಗೆ ಸಜ್ಜಾಗುತ್ತಿದ್ದು, ಬರುವ ಹಂಗಾಮಿನಲ್ಲಿ 10 ಲಕ್ಷ ಮೆ. ಟನ್‌ಗೂ ಅಧಿಕ ಕಬ್ಬು ಅರೆಯುವ ಗುರಿ ಹೊಂದಲಾಗಿದೆ ಎಂದು ಕಾರ್ಖಾನೆ ಅಧ್ಯಕ್ಷ ಬಸವರಾಜ ಕಲ್ಲಟ್ಟಿ ತಿಳಿಸಿದರು.

ಪಟ್ಟಣದ ಹಿರಣ್ಯಕೇಶಿ ಸಹಕಾರ ಸಕ್ಕರೆ ಕಾರ್ಖಾನೆ ಯಾಂತ್ರಿಕ ವಿಭಾಗದಲ್ಲಿ ಹಂಗಾಮು ಪೂರ್ವಸಿದ್ಧತೆ ಅಂಗವಾಗಿ ರೂಲರ್ ಪೂಜೆ ನೆರವೇರಿಸಿ ಮಾತನಾಡಿ, ಈ ವರ್ಷ ಹದಿನೈದು ದಿನಗಳ ಮುಂಚಿತವಾಗಿ ಕಬ್ಬು ಅರೆಯುವ ಹಂಗಾಮು ಆರಂಭಿಸಲು ಆಡಳಿತ ಮಂಡಳಿ ನಿರ್ಧರಿಸಿದೆ. ಇದಕ್ಕಾಗಿ ಕಾರ್ಖಾನೆಯ ಬಾಯ್ಲರ್ ಹಾಗೂ ಇತರ ತಾಂತ್ರಿಕ ಯಂತ್ರೋಪಕರಣಗಳ ದುರಸ್ತಿ ಕಾರ್ಯ ಭರದಿಂದ ಸಾಗುತ್ತಿವೆ.

ಕಾರ್ಖಾನೆ ಆರ್ಥಿಕ ಶಿಸ್ತನ್ನು ಕಾಪಾಡಿಕೊಂಡಿದ್ದು, ಕಳೆದ ಹಂಗಾಮಿನಲ್ಲಿ ಕಬ್ಬು ಪೂರೈಸಿದ ಎಲ್ಲ ರೈತರ ಬಾಕಿ ಹಣವನ್ನು ಮಾರ್ಚ್ ಅಂತ್ಯದೊಳಗೆ ಪಾವತಿಸಲಾಗಿದೆ. ಕಟಾವು ಮತ್ತು ಸಾಗಣೆದಾರರ ಬಿಲ್‌ಗಳನ್ನೂ ವಿಳಂಬವಿಲ್ಲದೆ ಚುಕ್ತಾ ಮಾಡಲಾಗಿದೆ. ವಿಶೇಷವೆಂದರೆ, ಕರ್ನಾಟಕ ಸರ್ಕಾರ ರಾಜ್ಯದ ರೈತರಿಗೆ ನೀಡಿದ್ದ ಪ್ರತಿ ಟನ್‌ಗೆ 50 ರೂ. ಪ್ರೋತ್ಸಾಹಧನವನ್ನು ಕಾರ್ಖಾನೆ ಮಹಾರಾಷ್ಟ್ರದ ರೈತರಿಗೂ ತನ್ನ ಸ್ವಂತ ನಿಧಿಯಿಂದ ವಿಸ್ತರಿಸಿ ಪಾವತಿಸುವ ಮೂಲಕ ಮಾದರಿಯಾಗಿದೆ. ಸಾಗಣೆದಾರರು ಹಂಗಾಮಿನ ಯಶಸ್ಸಿಗೆ ಸಹಕರಿಸಬೇಕು ಎಂದರು.

ಘೋಡಗೇರಿಯ ಗಜಲಿಂಗೇಶ್ವರ ದೇವಸ್ಥಾನದ ಶ್ರೀಕಾಂತ ಪೂಜೇರಿ, ಕಾರ್ಖಾನೆ ಉಪಾಧ್ಯಕ್ಷ ಅಶೋಕ ಪಟ್ಟಣಶೆಟ್ಟಿ, ನಿರ್ದೇಶಕರಾದ ಶಿವನಾಯಿಕ ನಾಯಿಕ, ಶಿವಪುತ್ರಪ್ಪ ಶಿರಕೋಳಿ, ಪ್ರಭುದೇವ ಪಾಟೀಲ, ವ್ಯವಸ್ಥಾಪಕ ನಿರ್ದೇಶಕ ಮಹಾದೇವಸ್ವಾಮಿ ಡಿ.ಎಸ್., ಕಾರ್ಯಾಲಯ ಅಧೀಕ್ಷಕ ಸುಭಾಸ ನಾಶಿಪುಡಿ, ಚಿದಾನಂದ ಮರೇದಿ, ಪಿ.ಎಂ.ಬೋತ್ತಡಿ, ಭರತ ತೇರಣಿ, ಗಿರೀಶ ಪಾಟೀಲ, ಆರ್.ಎ.ರೇವಣ್ಣವರ, ಮಲ್ಲಿಕಾರ್ಜುನ ಇಂಗಳಿ, ಎನ್.ಎಸ್.ಮರಬಸನ್ನವರ, ಡಿ.ಎನ್.ಚೌಗಲಾ, ಉಮೇಶ ಕೆಳಗಿನಮನಿ ಇತರರಿದ್ದರು.