ಕಂಟ್ರೋಲ್ಡ್​ ಡೆಲಿವರಿ ಕಾರ್ಯಾಚರಣೆಗೆ ಅನುಮತಿ ಅಗತ್ಯ| High court

ಮಾದಕ ದ್ರವ್ಯ ಸಾಗಾಣಿಕೆ ಆರೋಪದಲ್ಲಿ ತಮ್ಮ ವಿರುದ್ಧ ದಾಖಲಾಗಿದ್ದ ಪ್ರಕರಣ ರದ್ದುಗೊಳಿಸುವಂತೆ ಕೋರಿ ಹುಬ್ಬಳ್ಳಿಯ ಜುನೈದ್​ ಹುಸೈನ್​ ಎಂಬವರು ಸಲ್ಲಿಸಿದ್ದ ಅರ್ಜಿಯನ್ನು ಪುರಸ್ಕರಿಸಿರುವ ನ್ಯಾಯಮೂರ್ತಿ ಎಂ. ನಾಗಪ್ರಸನ್ನ ಅವರಿದ್ದ ಏಕಸದಸ್ಯ ನ್ಯಾಯಪೀಠ, ಈ ಆದೇಶ ನೀಡಿದೆ. ಎನ್​ಸಿಬಿ ತನಿಖೆಯಲ್ಲಿ ಗಂಭೀರ ಲೋಪದೋಷಗಳಿದ್ದು, ಅರ್ಜಿದಾರರ ವಿರುದ್ಧ ಸೂಕ್ತ ಸಾಾಧಾರಗಳಿಲ್ಲ ಎಂದು ಹೇಳಿದೆ. 

2023ರ ಜೂ.20ರಂದು ಕೊಯಮತ್ತೂರಿನಿಂದ ಬಂದ ಸ್ಪೀಡ್​ ಪೋಸ್ಟ್​ ಪಾರ್ಸೆಲ್​ನಲ್ಲಿ ಮಾದಕ ದ್ರವ್ಯ ಇರುವ ಬಗ್ಗೆ ಎನ್​ಸಿಬಿಗೆ ಗುಪ್ತಚರ ಮಾಹಿತಿ ಲಭಿಸಿತ್ತು. ಬೆಂಗಳೂರಿನ ಮಾರತಹಳ್ಳಿಯ ವಿಳಾಸಕ್ಕೆ ಬಂದಿದ್ದ ಪಾರ್ಸೆಲ್​ನಲ್ಲಿ ಜುನೈದ್​ ಹೆಸರಿತ್ತು. ಅದರಲ್ಲಿ 560 ಗ್ರಾಂ ತೂಕದ 50 ಎಲ್​ಎಸ್​ಡಿ ಬ್ಲಾಟ್​ಗಳು ಪತ್ತೆಯಾಗಿದ್ದವು. ಇದನ್ನು ವಶಪಡಿಸಿಕೊಂಡಿದ್ದ ಎನ್​ಸಿಬಿ ಅಧಿಕಾರಿಗಳು ಡಮ್ಮಿ ಪಾರ್ಸೆಲ್​ ಬಳಸಿ ಕಂಟ್ರೋಲ್ಡ್​ ಡೆಲಿವರಿ ಕಾರ್ಯಾಚರಣೆ ನಡೆಸಿದ್ದರು. 

ಪಾರ್ಸೆಲ್​ ಸ್ವೀಕರಿಸಿದ ಜುನೈದ್​ನನ್ನು ಜೂ.22ರಂದು ವಶಕ್ಕೆ ಪಡೆಯಲಾಗಿತ್ತು. ತನ್ನ ಹಿಂದಿನ ರೂಮ್​ಮೇಟ್​ ಒಬ್ಬನ ಕೋರಿಕೆಯ ಮೇರೆಗೆ ತಾನು ಪಾರ್ಸೆಲ್​ ಸ್ವೀಕರಿಸಿದ್ದಾಗಿ, ಅದರಲ್ಲಿ ಮಾದಕ ವಸ್ತುಗಳು ಇತ್ತು ಎಂಬ ಬಗ್ಗೆ ತನಗೆ ತಿಳಿದಿರಲಿಲ್ಲ ಎಂದು ಜುನೈದ್​ ಅಧಿಕಾರಿಗಳಿಗೆ ತಿಳಿಸಿದ್ದನು. ಆದರೆ, ತನಿಖೆ ನಡೆಸಿದ ಅಧಿಕಾರಿಗಳು ತಪ್ಪೊಪ್ಪಿಗೆ ಹೇಳಿಕೆಗಳನ್ನು ಪಡೆದುಕೋಡಿದ್ದರು. ನ್ಯಾಯಾಲಯಕ್ಕೆ ಚಾರ್ಜ್​ಶೀಟ್​ ಸಲ್ಲಿಕೆಯಾಗಿತ್ತು. 

ಅರ್ಜಿ ವಿಚಾರಣೆ ನಡೆಸಿದ ನ್ಯಾಯಪೀಠ, ಎನ್​ಸಿಬಿ ಅಧಿಕಾರಿಗಳು ಕಾರ್ಯಾಚರಣೆ ವೇಳೆ ನಿಯಮಗಳನ್ನು ಪಾಲಿಸಿಲ್ಲ. ಅಲ್ಲದೆ, ಸ್ವಯಂ ಪ್ರೇರಿತ ಹೇಳಿಕೆಗಳ ಆಧಾರದಲ್ಲಿ ಪ್ರಕರಣದಲ್ಲಿ ಚಾರ್ಜ್​ಶೀಟ್​ ಸಲ್ಲಿಸಲಾಗಿದೆ. ಆದರೆ, ಎನ್​ಡಿಪಿಎಸ್​ ಕಾಯ್ದೆಯ ಪ್ರಕಾರ ಅಧಿಕಾರಿಗಳ ಮುಂದೆ ದಾಖಲಾದ ಹೇಳಿಕೆಗಳನ್ನು ಸಾಕ್ಷ್ಯವಾಗಿ ಪರಿಗಣಿಸಲು ಸಾಧ್ಯವಿಲ್ಲ ಎಂದು ಹೇಳಿ ಅರ್ಜಿದಾರರ ವಿರುದ್ಧದ ಪ್ರಕರಣವನ್ನು ರದ್ದುಗೊಳಿಸಿದೆ.