ರಾಜ್ಯ

ಸಾರ್ವಜನಿಕ ಕಟ್ಟಡಗಳು ಅಂಗವಿಕಲಸ್ನೇಹಿ ಆಗಿರಲಿ| High Court

AI Picture
AI Picture
ಶ್ರವಣ್ ನೀರಬಿದಿರೆ
Published on: 

ಪ್ರಮುಖ ಮುಖ್ಯಾಂಶಗಳು

  • ಪ್ರಮಾಣಿತ ಕಾರ್ಯವಿಧಾನ ಪ್ರಕಟಿಸಿದ ಹೈಕೋರ್ಟ್
  • ಕಡ್ಡಾಯ ಪಾಲನೆಗೆ ನಿರ್ದೇಶನ, ಉಲ್ಲಂನೆಗೆ ದಂಡದ ಎಚ್ಚರಿಕೆ
ಶ್ರವಣ್​ ನೀರಬಿದಿರೆ ಬೆಂಗಳೂರು:
ರಾಜ್ಯದ ಸಾರ್ವಜನಿಕ ಕಟ್ಟಡಗಳು, ಖಾಸಗಿ ವಾಣಿಜ್ಯ ಸಂಕೀರ್ಣಗಳು ಮತ್ತು ಡಿಜಿಟಲ್​ ವೇದಿಕೆಗಳಲ್ಲಿ ಅಂಗವಿಕಲರಿಗೆ ಸಾರ್ವತ್ರಿಕ ಪ್ರವೇಶಾವಕಾಶ ಕಲ್ಪಿಸುವ ನಿಟ್ಟಿನಲ್ಲಿ ಪ್ರಮಾಣಿತ ಕಾರ್ಯವಿಧಾನ (ಎಸ್​ಒಪಿ) ಪ್ರಕಟಿಸಿರುವ ಹೈಕೋರ್ಟ್​, ಸಮಾನ ಅವಕಾಶಗಳನ್ನು ಪಡೆಯುವ ಮೂಲಭೂತ ಹಕ್ಕನ್ನು ಸಂವಿಧಾನವೇ ಖಾತರಿಪಡಿಸಿದೆ ಎಂದು ಮಹತ್ವದ ತೀರ್ಪು ನೀಡಿದೆ.
ಎಸ್​ಒಪಿ ಅನ್ವಯ ಮುಂದಿನ ದಿನಗಳಲ್ಲಿ ಹೊಸ ಕಟ್ಟಡಗಳ ಯೋಜನೆಗೆ ಅನುಮೋದನೆ ನೀಡುವಾಗ ಅಂಗವಿಕಲಸ್ನೇಹಿ ವಿನ್ಯಾಸಗಳನ್ನು ಒಳಗೊಂಡಿರುವುದನ್ನು ಖಚಿಪಡಿಸಿಕೊಳ್ಳುವುದು ಕಡ್ಡಾಯವಾಗಿದೆ. ಅಂಗವಿಕಲಸ್ನೇಹಿಯಾಗಿದೆ ಎಂಬ ಪ್ರಮಾಣಪತ್ರವಿಲ್ಲದೆ ಸಾರ್ವಜನಿಕ ಕಟ್ಟಡಕ್ಕೆ ಸ್ವಾಧಿನಾನುಭವ ಪತ್ರ (ಒಸಿ) ನೀಡಬಾರದು ಮತ್ತು ಹಳೆಯ ವಾಣಿಜ್ಯ ಕಟ್ಟಡಗಳ ಪರವಾನಗಿ ನವೀಕರಿಸಬಾರದು ಎಂದು ನ್ಯಾಯಮೂರ್ತಿ ಸೂರಜ್​ ಗೋವಿಂದರಾಜ್​ ಅವರಿದ್ದ ಏಕಸದಸ್ಯ ಪೀಠ ಆದೇಶಿಸಿದೆ.
ಸರ್ಕಾರವು 2016ರ ಅಂಗವಿಕಲ ವ್ಯಕ್ತಿಗಳ ಹಕ್ಕುಗಳ ಅಧಿನಿಯಮದ ಅಡಿಯಲ್ಲಿ ಸಮಗ್ರ ನೀತಿಯನ್ನು ರೂಪಿಸುವವರೆಗೆ ಈ ಎಸ್​ಒಪಿ ಜಾರಿಯಲ್ಲಿರಲಿದೆ. ಈ ನಿಯಮಗಳು ಸರ್ಕಾರಿ ಮತ್ತು ಖಾಸಗಿ ಸಂಸ್ಥೆಗಳಿಗೆ ಅನ್ವಯಿಸುತ್ತದೆ. ಈ ಮಾರ್ಗಸೂಚಿಗಳ ಜಾರಿಯನ್ನು ಖಚಿತಪಡಿಸಿಕೊಳ್ಳಲು ಮುಖ್ಯ ಕಾರ್ಯದರ್ಶಿ ಅವರ ನೇತೃತ್ವದಲ್ಲಿ ರಾಜ್ಯ ಪ್ರಾಧಿಕಾರವನ್ನು ಮತ್ತು ಜಿಲ್ಲಾಮಟ್ಟದಲ್ಲಿ ಜಿಲ್ಲಾಧಿಕಾರಿ ನೇತೃತ್ವದ ಸಮಿತಿ ರಚಿಸಲು ಕೋರ್ಟ್​ ನಿರ್ದೇಶನ ನೀಡಿದೆ.
ಸರ್ಕಾರಿ ಕಚೇರಿಗಳು, ನ್ಯಾಯಾಲಯಗಳು, ಪೊಲೀಸ್​ ಠಾಣೆಗಳು, ಕಂದಾಯ, ಪಂಚಾಯತ್​ ಮತ್ತು ಮುನ್ಸಿಪಲ್​ ಕಚೇರಿಗಳು, ಶಾಪಿಂಗ್​ ಮಾಲ್​, ಚಿತ್ರಮಂದಿರ, ಹೋಟೆಲ್​, ಬ್ಯಾಂಕ್​ ಮತ್ತಿತರ ವಾಣಿಜ್ಯ ಸಂಕೀರ್ಣಗಳು, ಸರ್ಕಾರಿ ಮತ್ತು ಖಾಸಗಿ ಶಾಲಾ-ಕಾಲೇಜು, ವಿಶ್ವವಿದ್ಯಾಲಯ, ಆಸ್ಪತ್ರೆ, ಗ್ರಂಥಾಲಯ ಮತ್ತಿತರ ಸಾರ್ವಜನಿಕ ಕಟ್ಟಡಗಳು, ಬಸ್​, ಮೆಟ್ರೋ, ರೈಲ್ವೆ ನಿಲ್ದಾಣಗಳು, ಏರ್​ಪೋರ್ಟ್​, ಅಪಾರ್ಟ್​ಮೆಂಟ್​, ಕ್ರೀಡಾಂಗಣ, ಪಾರಂಪರಿಕ ತಾಣ (ರಚನೆಗೆ ಹಾನಿಯಾಗದಂತೆ) ಮತ್ತು ಧಾರ್ಮಿಕ ಸ್ಥಳಗಳಲ್ಲಿ ಅಂಗವಿಕಲಸ್ನೇಹಿ ಸೌಲಭ್ಯಗಳನ್ನು ಖಾತರಿಪಡಿಸುವಂತೆ ನಿರ್ದೇಶನ ನೀಡಲಾಗಿದೆ.

ಭೌತಿಕ ಸೌಲಭ್ಯಗಳು ಏನಿರಬೇಕು?:

ಸಾರ್ವಜನಿಕ ಕಟ್ಟಡಗಳಲ್ಲಿ ಕನಿಷ್ಠ ಒಂದು ಮೆಟ್ಟಿಲುರಹಿತ ಪ್ರವೇಶ ಮಾರ್ಗವಿರಬೇಕು. ಇಳಿಜಾರಿನ ರ್ಯಾಂಪ್​ಗಳು, ಎರಡೂ ಬದಿಗಳಲ್ಲಿ ಹ್ಯಾಂಡ್​ರೈಲ್​, ಜಾರದ ಮೇಲ್ಮೆ ಇರಬೇಕು. ಪ್ರವೇಶದ್ವಾರ ಮತ್ತು ಕಾರಿಡಾರ್​ಗಳು ಸಾಕಷ್ಟು ಅಗಲವಾಗಿರಬೇಕು. ಪ್ರತಿ ಮಹಡಿಯಲ್ಲೂ ಕನಿಷ್ಠ ಒಂದು ಅಂಗವಿಕಲಸ್ನೇಹಿ ಶೌಚಗೃಹ, ಲಿಫ್ಟ್​ಗಳಲ್ಲಿ ಅಂಗವಿಕಲಸ್ನೇಹಿ ವ್ಯವಸ್ಥೆ (ಬೆಲ್​ ಲಿಪಿ, ಧ್ವನಿ ಪ್ರಕಟಣೆ, ಕನ್ನಡಿ), ಕಟ್ಟಡದ ಪ್ರವೇಶ ದ್ವಾರದ ಸಮೀಪದಲ್ಲೇ ಅಂಗವಿಕಲರ ವಾಹನ ಪಾರ್ಕಿಂಗ್​ಗೆ ವ್ಯವಸ್ಥೆ ಒದಗಿಸಬೇಕು. ಏರ್​ಪೋರ್ಟ್​, ಮೆಟ್ರೋ ನಿಲ್ದಾಣ ಮತ್ತು ಮಾಲ್​ಗಳಿಗೆ ಈ ಸೌಲಭ್ಯ ಕಲ್ಪಿಸಲು ಒಂದು ವರ್ಷದ ಕಾಲಾವಧಿ ನೀಡಲಾಗಿದೆ.‘
ℹ️

ಡಿಜಿಟಲ್​ ವೇದಿಕೆಗಳಿಗೂ ಅನ್ವಯ

ಸರ್ಕಾರಿ ವೆಬ್​ಸೈಟ್​ಗಳು, ಆ್ಯಪ್​ಗಳು ಮತ್ತು ಪೋರ್ಟಲ್​ಗಳು ಅಂಗವಿಕಲರಿಗೆ ಸಂಬಂಧಿಸಿದ ಅಂತಾರಾಷ್ಟ್ರೀಯ ಮಾನದಂಡಕ್ಕೆ ಅನುಗುಣವಾಗಿರಬೇಕು. ಡಿಜಿಟಲ್​ ಆಡಿಟ್​ ಪ್ರಮಾಣಪತ್ರವಿಲ್ಲದೆ ಯಾವುದೇ ಸರ್ಕಾರಿ ತಂತ್ರಾಂಶಗಳನ್ನು ಬಿಡುಗಡೆ ಮಾಡಬಾರದು.

ಉದ್ಯೋಗ ಭದ್ರತೆ ಖಾತರಿ:
ಉದ್ಯೋಗಿಯು ಸೇವಾವಧಿಯಲ್ಲಿ ಅಪಘಾತ ಅಥವಾ ಕಾಯಿಲೆಯಿಂದ ಅಂಗವಿಕಲರಾದರೆ ಅವರ ವೇತನಕಡಿತ ಅಥವಾ ಹುದ್ದೆಯಿಂದ ವಜಾ ಮಾಡುವಂತಿಲ್ಲ. ಕೆಲಸದ ಸ್ಥಳದಲ್ಲಿ ಅಥವಾ ಕೆಲಸದ ಕಾರಣಗಳಿಂದ ಅಂಗವಿಕಲತೆ ಉಂಟಾದರೆ ಚಿಕಿತ್ಸೆಯ ವೆಚ್ಚವನ್ನು ಉದ್ಯೋಗದಾತರೇ ಭರಿಸಬೇಕು. 20ಕ್ಕಿಂತ ಅಧಿಕ ಉದ್ಯೋಗಿಗಳನ್ನು ಹೊಂದಿರುವ ಸಂಸ್ಥೆಗಳು 6 ತಿಂಗಳೊಳಗೆ ಸಮಾನ ಉದ್ಯೋಗಾವಕಾಶ ನೀತಿ (ಇಒಪಿ) ಪ್ರಕಟಿಸಿ ಅಂಗವಿಕಲರ ಕಲ್ಯಾಣ ಇಲಾಖೆಯಲ್ಲಿ ನೋಂದಾಯಿಸಬೇಕು.
ದಂಡ ಮತ್ತು ಪ್ರೋತ್ಸಾಹಕ ಕ್ರಮ: ಗಡುವಿನೊಳಗೆ ನಿಯಮ ಪಾಲಿಸದ ಸಂಸ್ಥೆಗಳಿಗೆ ದಿನಗಳ ಲೆಕ್ಕದಲ್ಲಿ ದಂಡ ವಿಧಿಸಿ ಕ್ರಿಮಿನಲ್​ ಪ್ರಕರಣ ದಾಖಲಿಸಬೇಕು. ನಿಯಮ ಪಾಲಿಸುವ ಕಟ್ಟಡಗಳಿಗೆ ನೆ ಅನುಮೋದನೆಯಲ್ಲಿ ಆದ್ಯತೆ, ಹೆಚ್ಚುವರಿ ಎ್​ಎಆರ್​ ವಿನಾಯಿತಿ ಮತ್ತು ಆಸ್ತಿ ತೆರಿಗೆಯಲ್ಲಿ ವಿನಾಯಿತಿ ನೀಡಲು ಸರ್ಕಾರಕ್ಕೆ ಹೈಕೋರ್ಟ್​ ಸೂಚಿಸಿದೆ.
✅

ಶಿಕ್ಷಕಿ ಮರುನೇಮಕಕ್ಕೆ ಆದೇಶ

ನಗರದ ಖಾಸಗಿ ಶಾಲೆಯೊಂದರ ಶಿಕ್ಷಕಿಯೊಬ್ಬರು 2013ರ ಆ.22ರಂದು ಶಾಲೆಯ ಕಿಟಕಿಯಿಂದ ಜಿಗಿಯಲು ಮುಂದಾಗಿದ್ದ ವಿದ್ಯಾರ್ಥಿನಿಯನ್ನು ರಸಲು ಪ್ರಯತ್ನಿಸಿದ ವೇಳೆ ಕಟ್ಟಡದಿಂದ ಕೆಳಗೆ ಬಿದ್ದು ಶಾಶ್ವತ ಅಂಗವೈಕಲ್ಯಕ್ಕೆ ಒಳಗಾಗಿದ್ದರು. ಅವರ ವೈದ್ಯಕಿಯ ಚಿಕಿತ್ಸೆಗೆ ಲಾಂತರ ರೂಪಾಯಿ ರ್ಖಚಾಗಿತ್ತು. ಶಾಲೆಯೂ ಆರಂಭಿಕ ಹಂತದಲ್ಲಿ ಶಿಕ್ಷಕಿಗೆ ನೆರವು ನೀಡಿದ್ದರೂ, 2015ರ ಮೇ 31ರಂದು ಅವರನ್ನು ಸೇವೆಯಿಂದ ವಜಾಗೊಳಿಸಿತ್ತು. ಇದನ್ನು ಪ್ರಶ್ನಿಸಿ ಅವರು ರಾಜ್ಯ ಅಂಗವಿಕಲರ ಹಕ್ಕುಗಳ ಆಯುಕ್ತರಿಗೆ ಅರ್ಜಿ ಸಲ್ಲಿಸಿದ್ದರು. ವಿಚಾರಣೆ ನಡೆಸಿದ ಆಯುಕ್ತರು ಶಿಕ್ಷಕಿಗೆ 10 ಲಕ್ಷ ರೂ. ಪರಿಹಾರ ನೀಡುವಂತೆ ಆದೇಶಿಸಿದ್ದರು. ಈ ಆದೇಶ ಪ್ರಶ್ನಿಸಿದ್ದ ಶಾಲೆಯ ಮೇಲ್ಮನವಿ ವಜಾಗೊಳಿಸಿದ ಹೈಕೋರ್ಟ್​ ಸೂಕ್ತ ಸೌಲಭ್ಯಗಳೊಂದಿಗೆ ಮರುನೇಮಕಕ್ಕೆ ಅವಕಾಶ ಕಲ್ಪಿಸುವಂತೆ ಆದೇಶಿಸಿದೆ.

ವಿಜಯವಾಣಿ ನಂ.1 ದಿನ ಪತ್ರಿಕೆ | Vijayavani | Kannada News
www.vijayavani.net