17 ವರ್ಷದ ಯುವತಿಗೆ ಲೋಕಜ್ಞಾನವಿರುತ್ತದೆ ಎಂದ ಹೈಕೋರ್ಟ್​| ಆರೋಪಿಗೆ ಜಾಮೀನು

ಜಾಮೀನು ನಿರಾಕರಿಸಿದ್ದ ಕೋಲಾರದ ವಿಶೇಷ ಪೋಕ್ಸೋ ನ್ಯಾಯಾಲಯದ ಆದೇಶ ಪ್ರಶ್ನಿಸಿ ಚಿಕ್ಕಬಳ್ಳಾಪುರ ಜಿಲ್ಲೆಯ ಶಿಡ್ಲಟ್ಟದ ಮಂಜುನಾಥ ಎಂಬಾತ ಸಲ್ಲಿಸಿದ್ದ ಅರ್ಜಿ ಪುರಸ್ಕರಿಸಿರುವ ನ್ಯಾಯಮೂರ್ತಿ ಎಸ್​. ವಿಶ್ವಜಿತ್​ ಶೆಟ್ಟಿ ಅವರಿದ್ದ ಏಕಸದಸ್ಯ ನ್ಯಾಯಪೀಠ ಈ ಆದೇಶ ನೀಡಿದೆ.

ಇಬ್ಬರೂ ಪ್ರೀತಿಸಿ ಮದುವೆಯಾಗಿದ್ದಾರೆ. ನಂತರ ಬಾಡಿಗೆ ಮನೆಯಲ್ಲಿ ಪತಿ, ಪತ್ನಿಯಾಗಿ ಜೀವನ ಆರಂಭಿಸಿದ್ದಾರೆ. ತನ್ನ ಕೃತ್ಯಗಳ ಪರಿಣಾಮಗಳ ಬಗ್ಗೆ ಯುವತಿಗೆ ಅರಿವಿತ್ತು. ಈ ಪ್ರಕರಣದಲ್ಲಿ ಆರೋಪಿಯ ಮೇಲಿರುವ ಆರೋಪಗಳು ವಿಚಾರಣಾ ನ್ಯಾಯಾಲಯದಲ್ಲಿ ಸಾಬೀತಾಗಬೇಕಿದೆ. ಆದ್ದರಿಂದ ಆರೋಪಿಗೆ ಷರತ್ತುಬದ್ಧ ಜಾಮೀನು ನೀಡುವುದಾಗಿ ನ್ಯಾಯಪೀಠ ಹೇಳಿದೆ.

ಕಾಲೇಜಿಗೆ ಹೋಗುತ್ತೇನೆಂದು 2025ರ ಏ. 28ರಂದು ಮನೆಯಲ್ಲಿ ಹೇಳಿ ಹೋಗಿದ್ದ ಯುವತಿಯು ಮರಳಿ ಮನೆಗೆ ಬಂದಿರಲಿಲ್ಲ. ಈ ಹಿನ್ನಲೆಯಲ್ಲಿ ಆಕೆಯ ತಾಯಿ ಮೇ. 16ರಂದು ಶ್ರೀನಿವಾಸಪುರ ಪೊಲೀಸ್​ ಠಾಣೆಯಲ್ಲಿ ಅಪಹರಣ ದೂರು ದಾಖಲಿಸಿದ್ದರು. ತನಿಖೆ ಕೈಗೊಂಡ ಪೊಲೀಸರು ಆರೋಪಿ ಮತ್ತು ಯುವತಿಯನ್ನು ಪತ್ತೆಹಚ್ಚಿ ವಿಜಯಪುರದಲ್ಲಿ ಪತ್ತೆಹಚ್ಚಿದ್ದರು. ಆರೋಪಿ ವಿರುದ್ಧ ಪೋಕ್ಸೋ ಮತ್ತು ಬಾಲ್ಯವಿವಾಹ ನಿಷೇಧ ಕಾಯ್ದೆ ಅಡಿಯಲ್ಲಿ ಚಾರ್ಜ್​ಶಿಟ್​ ಸಲ್ಲಿಸಲಾಗಿದೆ. 

ಮ್ಯಾಜಿಸ್ಟ್ರೆಟ್​ ಎದುರು ದಾಖಲಿಸಲಾದ ಸಂತ್ರಸ್ತೆಯ ಹೇಳಿಕೆ ಪ್ರಕಾರ, ತಾನು ಮಂಜುನಾಥನನ್ನು ಪ್ರೀತಿಸುತ್ತಿದ್ದು, 2025ರ ಏಪ್ರಿಲ್​ನಲ್ಲಿ ದೇವಸ್ಥಾನವೊಂದರಲ್ಲಿ ಮದುವೆಯಾಗಿದ್ದಾಗಿ ತಿಳಿಸಿದ್ದಳು. ನಂತರ ವಿಜಯಪುರದಲ್ಲಿ ಬಾಡಿಗೆ ಮನೆಯೊಂದರಲ್ಲಿ ದಂಪತಿಗಳಾಗಿ ವಾಸಿಸುತ್ತಿದ್ದರು. ಆದರೆ, ನಂತರದ ದಿನಗಳಲ್ಲಿ ಆರೋಪಿಯು ತನ್ನನ್ನು ಸಂಶಯಿಸಿ, ಕೆಲಸಕ್ಕೆ ಹೋಗುವಾಗ ಮನೆಯೊಳಗೆ ಲಾಕ್​ ಮಾಡುತ್ತಿದ್ದನೆಂದು, ಈ ಬಗ್ಗೆ ತಾನು ಮನೆ ಮಾಲೀಕನಿಗೆ ತಿಳಿಸಿದ ನಂತರ ಪೋಷಕರು ಬಂದು ತನ್ನನ್ನು ಕರೆದೊಯ್ದರು ಎಂದು ಆರೋಪಿಸಿದ್ದಳು. ಆದರೆ, ಈ ಹೇಳಿಕೆಯನ್ನು ಮನೆ ಮಾಲೀಕ ಕೋರ್ಟ್​ನಲ್ಲಿ ನಿರಾಕರಿಸಿದ್ದಾನೆ. ಈ ಅಂಶಗಳನ್ನು ಜಾಮೀನು ನೀಡುವ ವೇಳೆ ನ್ಯಾಯಪೀಠ ಪರಿಗಣಿಸಿದೆ.