ಎಲ್​ಪಿಜಿ ದಾಸ್ತಾನು ಲಭ್ಯತೆ ವಿವರ ಸಲ್ಲಿಸಿ| High court

ಅಸೋಸಿಯೇಷನ್​ ಸಲ್ಲಿಸಿರುವ ಅರ್ಜಿಯನ್ನು ನ್ಯಾಯಮೂರ್ತಿ ಸಚಿನ್​ ಶಂಕರ್​ ಮಗದುಮ್​ ಅವರಿದ್ದ ಏಕಸದಸ್ಯ ನ್ಯಾಯಪೀಠವು ಮಂಗಳವಾರ ವಿಚಾರಣೆ ನಡೆಸಿತು. ವಾಣಿಜ್ಯ ಎಲ್​ಪಿಜಿ ದಾಸ್ತಾನು ಲಭ್ಯತೆ, ಪೂರೈಕೆ ವ್ಯವಸ್ಥೆ ಮತ್ತು ಅನುಸರಿಸುತ್ತಿರುವ ವಿತರಣಾ ಕಾರ್ಯವಿಧಾನ ಮತ್ತು ಪೂರೈಕೆಯಲ್ಲಿನ ವ್ಯತ್ಯಯವನ್ನು ಸರಿಪಡಿಸಲು ಕೈಗೊಂಡಿರುವ ಕ್ರಮಗಳ ಬಗ್ಗೆ ಮುಂದಿನ ವಿಚಾರಣೆಯಲ್ಲಿ ಮಾಹಿತಿ ಸಲ್ಲಿಸುವಂತೆ ಪ್ರತಿವಾದಿಗಳಿಗೆ ಸೂಚಿಸಲಾಗಿದ್ದು, ವಿಚಾರಣೆ ಮಾ. 23ಕ್ಕೆ ನಿಗದಿಯಾಗಿದೆ.

ಅಂತಾರಾಷ್ಟ್ರೀಯ ಉದ್ವಿಗ್ನತೆ ಎಲ್​ಪಿಜಿ ಪೂರೈಕೆ ಮೇಲೆ ಪರಿಣಾಮ ಬೀರಿದೆ ಎಂದು ತೈಲ ಕಂಪನಿಗಳು ಮತ್ತು ಏಜೆನ್ಸಿಗಳು ತಿಳಿಸಿವೆ. ಕೇಂದ್ರ ಸರ್ಕಾರವು ಅಗತ್ಯ ವಸ್ತುಗಳ ನಿಯಂತ್ರಣ ಕಾಯ್ದೆ ಅಡಿಯಲ್ಲಿ ಪೆಟ್ರೋಲಿಯಂ ಉತ್ಪನ್ನಗಳ ನಿಯಂತ್ರಣಕ್ಕೆ ಆದೇಶಿಸಿದೆ. ಅದರ ಬೆನ್ನಲೇ ರಾಜ್ಯ ಸರ್ಕಾರವು ದಿನಕ್ಕೆ ಕೇವಲ 1 ಸಾವಿರ ವಾಣಿಜ್ಯ ಸಿಲಿಂಡರ್​ಗಳನ್ನು ಪೂರೈಸುವ ಮಿತಿ ಹೇರಿದೆ. ಇದು ಬೇಡಿಕೆಯ ಶೇ. 5ಕ್ಕಿಂತಲೂ ಕಡಿಮೆ. ಹೋಟೆಲ್​ ಉದ್ಯಮವನ್ನು ಆದ್ಯತಾ ವಲಯದಲ್ಲಿ ಗುರುತಿಸಿದ್ದರೂ ಪೂರೈಕೆಯಲ್ಲಿ ತಾರತಮ್ಯ ಮಾಡಲಾಗಿದೆ. ಇದರಿಂದಾಗಿ ಬೆಂಗಳೂರಿನ ಸುಮಾರು 40 ಸಾವಿರ ಹೋಟೆಲ್​ಗಳು ಮುಚ್ಚುವ ಬೀತಿಯಲ್ಲಿವೆ ಎಂದು ಅರ್ಜಿಯಲ್ಲಿ ತಿಳಿಸಲಾಗಿದೆ.

ಹೋಟೆಲ್​ ಉದ್ಯಮವು ಬೃಹತ್​ ಪೂರೈಕೆ ಸರಪಳಿ ಹೊಂದಿದೆ. ಪ್ರತಿದಿನ 12 ಲಕ್ಷ ಲೀಟರ್​ ಹಾಲು, ಟನ್​ಗಟ್ಟಲೆ ತರಕಾರಿ ಮತ್ತು ಮಾಂಸವನ್ನು ಖರೀದಿಸುತ್ತವೆ. ಸಿಲಿಂಡರ್​ ಕೊರತೆಯಿಂದ ಹೋಟೆಲ್​ಗಳು ಬಂದ್​ ಆದರೆ ರೈತರು ಮತ್ತು ಇತರ ಕಾರ್ಮಿಕರಿಗೂ ನಷ್ಟ ಉಂಟಾಗಲಿದೆ. ಅಂದಾಜು 6 ಲಕ್ಷ ಕಾರ್ಮಿಕರ ಉದ್ಯೋಗಕ್ಕೆ ಇದು ಸಮಸ್ಯೆ ಉಂಟು ಮಾಡಲಿದೆ ಎಂದು ಅರ್ಜಿಯಲ್ಲಿ ಆತಂಕ ವ್ಯಕ್ತಪಡಿಸಲಾಗಿದೆ.

ಬೆಂಗಳೂರು ನಗರವೊಂದಕ್ಕೆ ದಿನಕ್ಕೆ ಸಾವಿರಾರು ಸಿಲಿಂಡರ್​ಗಳ ಅಗತ್ಯವಿದೆ. ಆದರೆ, ಇಡೀ ರಾಜ್ಯದ ಹೋಟೆಲ್​ಗಳಿಗೆ ಸಾವಿರ ಸಿಲಿಂಡರ್​ ನಿಗದಿ ಮಾಡಲಾಗಿದೆ. ಈ  ಬಿಕ್ಕಟ್ಟು ಬಗೆಹರಿಯದಿದ್ದರೆ ದರ ಏರಿಕೆ ಅಥವಾ ಅರ್ನಿದಿಷ್ಟಾವಧಿಗೆ ಮುಚ್ಚುವಿಕೆ ಅನಿವಾರ್ಯವಾಗಿದೆ ಎಂದು ಅರ್ಜಿಯಲ್ಲಿ ತಿಳಿಸಲಾಗಿದೆ.