34 ವಾರಗಳ ಭ್ರೂಣದ ಗರ್ಭಪಾತಕ್ಕೆ ನಿರಾಕರಣೆ| High court

ಭ್ರೂಣವು ಈಗಾಗಲೇ 34 ವಾರ ಪೂರೈಸಿದೆ. ಈ ಹಂತದಲ್ಲಿ ಗರ್ಭಪಾತ ನಡೆಸುವುದು ವೈದ್ಯಕಿಯವಾಗಿ ಸುರಕ್ಷಿತವಲ್ಲ. 34 ವಾರಗಳ ನಂತರ ಗರ್ಭಪಾತ ಮಾಡುವುದು ಅಕಾಲಿಕ ಹೆರಿಗೆಗೆ ಸಮವಾಗಿದ್ದು, ತಾಯಿ ಮತ್ತು ಮಗು ಇಬ್ಬರಿಗೂ ಮಾರಕವಾಗಬಹುದು ಎಂದು ವೈದ್ಯರು ವರದಿ ನೀಡಿದ್ದರು. ಇದನ್ನು ಪರಿಗಣಿಸಿರುವ ನ್ಯಾಯಪೀಠ, ಕಾನೂನು ಪ್ರಕಾರ 24 ವಾರಗಳ ನಂತರದ ಗರ್ಭಪಾತಕ್ಕೆ ತಾಯಿಯ ಜೀವ ಉಳಿಸುವ ಅನಿವಾರ್ಯತೆ ಇದ್ದರೆ ಮಾತ್ರ ಅವಕಾಶವಿದೆ. ಈ ಪ್ರಕರಣದಲ್ಲಿ ಸಂತ್ರಸ್ತೆಯು ಲೈಂಗಿಕ ದೌರ್ಜನ್ಯದ ಕಾರಣ ಮಾನಸಿಕ ಆಘಾತಕ್ಕೆ ಒಳಗಾಗಿದ್ದರೂ ಆಕೆಯ ದೈಹಿಕ ಸುರಕ್ಷತೆ ಮುಖ್ಯವಾಗಿದೆ. ಗರ್ಭಪಾತಕ್ಕೆ ವ್ಯತಿರಿಕ್ತವಾದ ವರದಿಯನ್ನು ವೈದ್ಯರು ನೀಡಿರುವ ಕಾರಣ ಅನುಮತಿ ನಿರಾಕರಿಸಲಾಗಿದೆ ಎಂದು ಹೇಳಿದೆ.

ಸಂತ್ರಸ್ತೆಗೆ ಹೆರಿಗೆಯಾಗುವ ತನಕ ನಿರಂತರ ವೈದ್ಯಕಿಯ ಮೇಲ್ವಿಚಾರಣೆ ಮತ್ತು ಪ್ರಸವಪೂರ್ವ ಆರೈಕೆಯನ್ನು ಒದಗಿಸಬೇಕು. ಸುರಕ್ಷಿತ ಹೆರಿಗೆ ಮತ್ತು ನವಜಾತ ಶಿಶುವಿನ ಆರೈಕೆಗಾಗಿ ಅಗತ್ಯ ಕ್ರಮ ಕೈಗೊಳ್ಳಬೇಕು. ಸಂತ್ರಸ್ತೆಗೆ ಕೌನ್ಸೆಲಿಂಗ್​ ಮತ್ತು ಪುನರ್ವಸತಿ, ಸೂಕ್ತ ಪರಿಹಾರ ಒದಗಿಸಬೇಕು. ಒಂದು ವೇಳೆ ಸಂತ್ರಸ್ತೆ ಅಥವಾ ಆಕೆಯ ಪಾಲಕರು ಮಗುವನ್ನು ಸಾಕಲು ಇಚ್ಛಿಸದಿದ್ದರೆ, ಕಾನೂನುಬದ್ಧವಾಗಿ ಮಗುವಿನ ದತ್ತು ಪ್ರಕ್ರಿಯೆಗೆ ಕ್ರಮ ಕೈಗೊಳ್ಳಬೇಕು ಎಂದು ರಾಜ್ಯ ಸರ್ಕಾರಕ್ಕೆ ನ್ಯಾಯಪೀಠ ನಿರ್ದೇಶನ ನೀಡಿದೆ.