ಆರೋಗ್ಯ ನಿರ್ಲಕ್ಷ್ಯ ಸಲ್ಲದು

ನಗರದ ಡಾ.ರಾಜ್‌ಕುಮಾರ್ ರಂಗಮಂದಿರದಲ್ಲಿ ಜಿಲ್ಲಾ ಬುಡಕಟ್ಟು ಗಿರಿಜನ ಅಭಿವೃದ್ಧಿ ಸಂಘದ ವತಿಯಿಂದ ಸೋಮವಾರ ಆಯೋಜಿಸಿದ್ದ ಜಿಲ್ಲಾ ಆದಿವಾಸಿ ಆರೋಗ್ಯ ಸಂವಾದ ಕಾರ್ಯಾಗಾರದಲ್ಲಿ ಅವರು ಮಾತನಾಡಿ, ಬುಡಕಟ್ಟು ಜನರು ಎಲ್ಲರಂತೆ ನಾಗರೀಕರು. ಸಂವಿಧಾನದ 342ನೇ ಅನುಚ್ಛೇದಡಿ ರಕ್ಷಣೆ, ಹಕ್ಕುಗಳಿವೆ. ಆದಿವಾಸಿಗಳ ಮೇಲೆ ದೌರ್ಜನ್ಯ ಮಾಡುವಂತಿಲ್ಲ ಎಂದು ಹೇಳಿದರು.

ಬುಡಕಟ್ಟು ಸಮುದಾಯದಲ್ಲಿ ಹೆಣ್ಣು ಮಗು ಋತುಮತಿಯಾದಾಗ ಕೂಡಲೇ ಮದುವೆ ಮಾಡಲಾಗುತ್ತದೆ. ಇದು ಕಾನೂನಿನಲ್ಲಿ ಅಪರಾಧವಾಗಿದ್ದು, ಮದುವೆ ಮಾಡಿದ ಮತ್ತು ಮಾಡಿಸಿದವರು ಜೈಲಿಗೆ ಹೋಗಬೇಕಾಗುತ್ತದೆ. ಬಾಲ್ಯ ವಿವಾಹವನ್ನು ಮಾಡಿಸಬಾರದು. ಹೆಣ್ಣು ಮಗು ಜನಿಸಿತು ಎಂದು ಭೇದಭಾವ ಮಾಡಬಾರದು. ಎಲ್ಲರಿಗೂ ಶಿಕ್ಷಣ ಕೊಡಿಸಬೇಕು ಎಂದು ಸಲಹೆ ನೀಡಿದರು.

ಜಿಲ್ಲಾಧಿಕಾರಿ ಶ್ರೀರೂಪಾ ಮಾತನಾಡಿ, ಬುಡಕಟ್ಟು ಸಮುದಾಯ ಮುಖ್ಯವಾಹಿನಿಗೆ ಬರಬೇಕು. ಜಿಲ್ಲೆಯ ಆದಿವಾಸಿಗಳು ಆರೋಗ್ಯ ಚೆನ್ನಾಗಿಟ್ಟುಕೊಂಡು, ಶಿಕ್ಷಣ ಪಡೆದುಕೊಂಡರೆ ದೇಶದ ಗಮನ ಸೆಳೆಯುವಂತಹ ಸಾಧನೆ ಮಾಡಬಹುದು. ಪಿಎಚ್.ಡಿ ಪಡೆದ ಡಾ.ಮಾದೇಗೌಡ ಎಲ್ಲರಿಗೂ ಮಾದರಿ. ಅದೇ ರೀತಿ ಹೆಲ್ತ್ ನ್ಯಾವಿಗೇಟರ್ ಬೇಬಿ ಉತ್ತಮವಾಗಿ ಕೆಲಸ ಮಾಡುತ್ತಿದ್ದಾರೆ. ಜಿಲ್ಲೆಗೆ ಪುರುಷ ಹೆಲ್ತ್ ನ್ಯಾವಿಗೇಟರ್‌ನ ಅವಶ್ಯಕತೆ ಇದೆ. ಈ ನಿಟ್ಟಿನಲ್ಲಿ ಮುಂದಿನ ದಿನಗಳಲ್ಲಿ ಕ್ರಮ ವಹಿಸಲಾಗುವುದು ಎಂದರು.

ವೇದಿಕೆ ಕಾರ್ಯಕ್ರಮದ ಬಳಿ ವಿವಿಧ ವಿಷಯಗಳ ಕುರಿತು ಸಂವಾದ ನಡೆಯಿತು. ಜಿಲ್ಲಾ ಪರಿಶಿಷ್ಟ ವರ್ಗಗಳ ಕಲ್ಯಾಣಾಧಿಕಾರಿ ಬಿಂದ್ಯಾ, ಜಿಲ್ಲಾ ಆರೋಗ್ಯ ಮತ್ತು ಕುಟುಂಬ ಕಲ್ಯಾಣಾಧಿಕಾರಿ ಡಾ.ಚಿದಂಬರ, ಡಾ.ಪ್ರಶಾಂತ್, ಸಂಘದ ಅಧ್ಯಕ್ಷ ರಂಗೇಗೌಡ, ಸಿ.ಮಾದೇಗೌಡ, ಕೇತಮ್ಮ, ಮಾದಮ್ಮ, ಮಾದು, ಶಿವಣ್ಣ, ರಾಜಪ್ಪ ಮತ್ತು ಇತರರು ಹಾಜರಿದ್ದರು.