ರಾಜ್ಯ

ಎಚ್​ಡಿಡಿ ಪತ್ನಿ ಮೇಲೆ ಆ್ಯಸಿಡ್​ ದಾಳಿ ನಡೆದಿದ್ದೇಕೆ? 2 ಬಾರಿ ಸಾವು ಗೆದ್ದು ಬಂದಿದ್ದ ಚೆನ್ನಮ್ಮರ ಸಾಹಸಮಯ ಬದುಕಿನ ಕಥೆ ಇಲ್ಲಿದೆ... HDD Wife Chennamma

ಎಚ್​ಡಿಡಿ ಪತ್ನಿ ಮೇಲೆ ಆ್ಯಸಿಡ್​ ದಾಳಿ ನಡೆದಿದ್ದೇಕೆ? 2 ಬಾರಿ ಸಾವು ಗೆದ್ದು ಬಂದಿದ್ದ ಚೆನ್ನಮ್ಮರ ಸಾಹಸಮಯ ಬದುಕಿನ ಕಥೆ ಇಲ್ಲಿದೆ... HDD Wife Chennamma
ಎಚ್​ಡಿಡಿ ಪತ್ನಿ ಮೇಲೆ ಆ್ಯಸಿಡ್​ ದಾಳಿ ನಡೆದಿದ್ದೇಕೆ? 2 ಬಾರಿ ಸಾವು ಗೆದ್ದು ಬಂದಿದ್ದ ಚೆನ್ನಮ್ಮರ ಸಾಹಸಮಯ ಬದುಕಿನ ಕಥೆ ಇಲ್ಲಿದೆ... HDD Wife Chennamma
Published on: 

ಪ್ರಮುಖ ಮುಖ್ಯಾಂಶಗಳು

  • ಮಾಜಿ ಪ್ರಧಾನಿ ದೇವೇಗೌಡರ ಪತ್ನಿ ಚೆನ್ನಮ್ಮ ನಿಧನಕ್ಕೆ ಇಡೀ ಕರ್ನಾಟಕ ಕಂಬನಿ ಮಿಡಿದಿದೆ
  • ಆ್ಯಸಿಡ್ ದಾಳಿ ಹಾಗೂ ಕರೊನಾ ಮೆಟ್ಟಿನಿಂತು ಎರಡು ಬಾರಿ ಸಾವು ಗೆದ್ದಿದ್ದ ಚೆನ್ನಮ್ಮ ಇನ್ನಿಲ್ಲ
  • ಚೆನ್ನಮ್ಮ ಅವರ ಪಾರ್ಥಿವ ಶರೀರದ ಅಂತ್ಯಸಂಸ್ಕಾರ ಸೋಮವಾರ ಸ್ವಗ್ರಾಮ ಹರದನಹಳ್ಳಿಯಲ್ಲಿ ನೆರವೇರಲಿದೆ
HDD Wife Chennamma : ಕರ್ನಾಟಕ ರಾಜಕಾರಣದ ಧ್ರುವತಾರೆ, ಮಾಜಿ ಪ್ರಧಾನಿ ಎಚ್.ಡಿ. ದೇವೇಗೌಡ ಅವರ ಯಶಸ್ಸಿನ ಹಿಂದಿನ ದೃಢ ಶಕ್ತಿಯಾಗಿದ್ದ ಅವರ ಧರ್ಮಪತ್ನಿ ಚೆನ್ನಮ್ಮ (85) ಅವರು ಶನಿವಾರ (ಜುಲೈ 18) ಸಂಜೆ ಬೆಂಗಳೂರಿನಲ್ಲಿ ಕೊನೆಯುಸಿರೆಳೆದಿದ್ದಾರೆ. ಕಳೆದ ಕೆಲವು ದಿನಗಳಿಂದ ತೀವ್ರ ಉಸಿರಾಟದ ಸಮಸ್ಯೆಯಿಂದ ಬಳಲುತ್ತಿದ್ದ ಅವರನ್ನು ನಗರದ ಮಣಿಪಾಲ್ ಆಸ್ಪತ್ರೆಗೆ ದಾಖಲಿಸಲಾಗಿತ್ತು. ಆದರೆ, ಚಿಕಿತ್ಸೆ ಫಲಕಾರಿಯಾಗದೆ ಅವರು ನಿಧನರಾಗಿದ್ದು, ದೊಡ್ಡಗೌಡರ ಕುಟುಂಬ ಸೇರಿದಂತೆ ಇಡೀ ರಾಜ್ಯದ ಜನತೆ ಕಂಬನಿ ಮಿಡಿದಿದೆ.

ಸಾವಿನ ದವಡೆಯಿಂದ ಎರಡು ಬಾರಿ ಪಾರಾಗಿದ್ದ ಧೀಮಂತೆ

ಚೆನ್ನಮ್ಮ ಅವರ ಸುದೀರ್ಘ ಜೀವನ ಕೇವಲ ಅಧಿಕಾರ, ಗೌರವಕ್ಕಷ್ಟೇ ಸೀಮಿತವಾಗಿರಲಿಲ್ಲ, ಬದಲಿಗೆ ಸಾವು-ಬದುಕಿನ ನಡುವಿನ ಹೋರಾಟಕ್ಕೂ ಸಾಕ್ಷಿಯಾಗಿತ್ತು. ತಮ್ಮ ಜೀವಿತಾವಧಿಯಲ್ಲಿ ಎರಡು ಬಾರಿ ಅತ್ಯಂತ ಕಠಿಣ ಸಂದರ್ಭಗಳಲ್ಲಿ ಸಾವನ್ನು ಗೆದ್ದು ಬಂದಿದ್ದ ಅವರು, ಅಪ್ರತಿಮ ಮಾನಸಿಕ ದೃಢತೆಯನ್ನು ಹೊಂದಿದ್ದರು. ಇತಿಹಾಸದ ಪುಟಗಳಲ್ಲಿ ದಾಖಲಾಗಿರುವ ಅವರ ಮೇಲಿನ ಆ್ಯಸಿಡ್ ದಾಳಿ ಹಾಗೂ ಇತ್ತೀಚಿನ ವರ್ಷಗಳಲ್ಲಿ ಜಗತ್ತನ್ನು ಕಾಡಿದ ಕರೊನಾ ಸೋಂಕಿನಿಂದ ಪಾರಾಗಿದ್ದೇ ಇದಕ್ಕೆ ಸಾಕ್ಷಿ.

ಕುಟುಂಬವನ್ನು ನಡುಗಿಸಿದ್ದ 2001ರ ಆ್ಯಸಿಡ್ ದಾಳಿಯ ಕರಾಳ ನೆನಪು

ಚೆನ್ನಮ್ಮ ಅವರ ಜೀವನದಲ್ಲಾದ ಅತ್ಯಂತ ಆಘಾತಕಾರಿ ಘಟನೆ ಎಂದರೆ ಅದು 2001ರ ಫೆಬ್ರವರಿ 21ರಂದು ನಡೆದ ಆ್ಯಸಿಡ್ ದಾಳಿ. ಕೌಟುಂಬಿಕ ವೈಷಮ್ಯ ಹಾಗೂ ಆಸ್ತಿ ವಿವಾದದ ಹಿನ್ನೆಲೆಯಲ್ಲಿ, ದೇವೇಗೌಡರ ಸ್ವಂತ ಸಹೋದರ ಬಸವೇಗೌಡರ ಪುತ್ರ ಲೋಕೇಶ್ ಎಂಬಾತನೇ ಈ ಘೋರ ಕೃತ್ಯದ ಸೂತ್ರಧಾರಿಯಾಗಿದ್ದ. ಹೊಳೆನರಸೀಪುರ ತಾಲೂಕಿನ ಹರದನಹಳ್ಳಿಯ ಮನೆದೇವರ ಸನ್ನಿಧಿಯಲ್ಲೇ ಈ ಘಟನೆ ನಡೆದಿದ್ದು ಇಡೀ ರಾಜ್ಯವನ್ನು ಬೆಚ್ಚಿಬೀಳಿಸಿತ್ತು.

ದೇವರ ಸನ್ನಿಧಿಯಲ್ಲೇ ನಡೆದಿತ್ತು ಘೋರ ಪಿತೂರಿ

ದೈವಭಕ್ತ ಕುಟುಂಬವಾದ ಗೌಡರ ಮನೆತನ ಪ್ರತಿ ವರ್ಷ ಮಹಾಶಿವರಾತ್ರಿಯಂದು ಹರದನಹಳ್ಳಿಯ ದೇವೇಶ್ವರಸ್ವಾಮಿ ದೇವಸ್ಥಾನದಲ್ಲಿ ವಿಶೇಷ ಪೂಜೆ ಸಲ್ಲಿಸುವುದು ವಾಡಿಕೆ. ಅಂದು ದೇವೇಗೌಡರು ಕಾರ್ಯನಿರತರಾಗಿದ್ದ ಕಾರಣ, ಚೆನ್ನಮ್ಮ ಅವರು ಪುತ್ರ ಎಚ್.ಡಿ. ರೇವಣ್ಣ ಹಾಗೂ ಸೊಸೆ ಭವಾನಿ ರೇವಣ್ಣ ಅವರೊಂದಿಗೆ ಪೂಜೆಗೆ ತೆರಳಿದ್ದರು. ಈ ವೇಳೆ ಪೂಜೆಯ ನೆಪದಲ್ಲಿ ಬಂದ ಲೋಕೇಶ್, ಹಠಾತ್ತನೆ ಚೆನ್ನಮ್ಮ ಅವರ ಮೇಲೆ ಆ್ಯಸಿಡ್ ಎರಚಿದ್ದ. ಈ ದಾಳಿಯಲ್ಲಿ ಚೆನ್ನಮ್ಮ ಅವರ ಮುಖ ಮತ್ತು ತಲೆಗೆ ಗಂಭೀರ ಗಾಯಗಳಾಗಿದ್ದರೆ, ಸೊಸೆ ಭವಾನಿ ರೇವಣ್ಣ ಅವರ ಕೈಗೂ ಗಾಯಗಳಾಗಿದ್ದವು.

ಆರೋಗ್ಯದ ಏರುಪೇರು ಹಾಗೂ ಕೊನೆಯ ದಿನಗಳು

ಇಡೀ ಜಗತ್ತನ್ನೇ ಕಾಡಿದ್ದ ಮಹಾಮಾರಿ ಕರೊನಾವನ್ನು ಚೆನ್ನಮ್ಮ ಗೆದ್ದು ಬಂದಿದ್ದರು. ಇದೇ ಕರೊನಾಗೆ ಲಕ್ಷಾಂತರ ಜನರು ಸಾವಿಗೀಡಾಗಿದ್ದನ್ನು ನಾವು ಮರೆಯುವಂತಿಲ್ಲ. ಕರೊನಾವನ್ನು ಗೆದ್ದು ಆರೋಗ್ಯಕರವಾಗಿದ್ದ ಚೆನ್ನಮ್ಮ ಅವರಿಗೆ ಇತ್ತೀಚಿನ ವರ್ಷಗಳಲ್ಲಿ ವಯೋಸಹಜ ಆರೋಗ್ಯ ಸಮಸ್ಯೆಗಳು ಕಾಡತೊಡಗಿದ್ದವು. 2024-2025ರ ಅವಧಿಯಲ್ಲಿ ಎದೆನೋವು ಹಾಗೂ ಶ್ವಾಸಕೋಶದ ತೊಂದರೆ ಕಾಣಿಸಿಕೊಂಡಿದ್ದರಿಂದ ಬೆಂಗಳೂರಿನ ಮಣಿಪಾಲ್ ಆಸ್ಪತ್ರೆಯಲ್ಲಿ ನಿರಂತರ ಚಿಕಿತ್ಸೆ ಪಡೆಯುತ್ತಿದ್ದರು.

ಅಗಲಿದ ಒಡನಾಡಿಗಾಗಿ ಕಂಬನಿ ಮಿಡಿದ ದೊಡ್ಡಗೌಡರು

ಅಂತಿಮವಾಗಿ ಶನಿವಾರದಂದು ತೀವ್ರಗೊಂಡ ಅನಾರೋಗ್ಯಕ್ಕೆ ಚೆನ್ನಮ್ಮ ಅವರು ಕೊನೆಯುಸಿರೆಳೆದಿದ್ದಾರೆ. ಹರದನಹಳ್ಳಿಯ ಸಾಮಾನ್ಯ ಕುಟುಂಬದಿಂದ ಬಂದು, ದೇಶದ ಅತ್ಯುನ್ನತ ಪ್ರಧಾನಿ ಹುದ್ದೆಯವರೆಗಿನ ದೇವೇಗೌಡರ ರಾಜಕೀಯ ಏಳುಬೀಳುಗಳ ಸುದೀರ್ಘ ಪಯಣದಲ್ಲಿ ಹೆಗಲಿಗೆ ಹೆಗಲು ಕೊಟ್ಟು ನಿಂತಿದ್ದ ಒಡನಾಡಿಯ ಅಗಲಿಕೆ ಎಚ್.ಡಿ. ದೇವೇಗೌಡರನ್ನು ತೀವ್ರ ಭಾವುಕರನ್ನಾಗಿಸಿದೆ. ತಾಯಿಯನ್ನು ಕಳೆದುಕೊಂಡ ಎಚ್.ಡಿ. ಕುಮಾರಸ್ವಾಮಿ, ರೇವಣ್ಣ ಸೇರಿದಂತೆ ಇಡೀ ಕುಟುಂಬ ಸಾರ್ವಜನಿಕರ ಸಂತಾಪದಲ್ಲಿ ಭಾಗಿಯಾಗಿದೆ.

ಹಾಸನದ ಹರದನಹಳ್ಳಿಯಲ್ಲಿ ಅಂತ್ಯಸಂಸ್ಕಾರ!

ಮೊದಲು ಚೆನ್ನಮ್ಮ ಅವರ ಪಾರ್ಥೀವ ಶರೀರವನ್ನು ಪದ್ಮನಾಭನಗರದ ಮನೆಗೆ ತೆಗೆದುಕೊಂಡು ಹೋಗಿ, ಅಲ್ಲಿ ಕುಟುಂಬದವರಿಗೆ ಹಾಗೂ ರಾಜಕಾರಣಿಗಳಿಗೆ ಅಂತಿಮ ದರ್ಶನಕ್ಕೆ ವ್ಯವಸ್ಥೆ ಮಾಡಲಾಗಿದೆ. ಇಂದು ಪಾರ್ಥಿವ ಶರೀರವನ್ನು ಹರದನಹಳ್ಳಿಗೆ ಕೊಂಡೊಯ್ಯಲಾಗುತ್ತದೆ. ನಂತರ ಸೋಮವಾರ (ಜು.20) ಸ್ವಗ್ರಾಮ ಹರದನಹಳ್ಳಿಯಲ್ಲಿ ಸಾರ್ವಜನಿಕ ದರ್ಶನಕ್ಕೆ ಅವಕಾಶ ನೀಡಿ, ಆಮೇಲೆ ಒಕ್ಕಲಿಗ ಸಂಪ್ರದಾಯದಂತೆ ಚೆನ್ನಮ್ಮ ಅವರ ಅಂತ್ಯಸಂಸ್ಕಾರ ನೆರವೇರಲಿದೆ.
ವಿಜಯವಾಣಿ ನಂ.1 ದಿನ ಪತ್ರಿಕೆ | Vijayavani | Kannada News
www.vijayavani.net