ಹಂಪಿ ಉತ್ಸವ; ಬಾನಂಗಳದಲ್ಲಿ ಗೊಂಬೆಗಳ ಚಿತ್ತಾರ

ಐತಿಹಾಸಿಕ ಹಂಪಿ ಉತ್ಸವದ ಸಂಭ್ರಮಕ್ಕೆ ಈ ಬಾರಿ ಎರಡನೇ ದಿನವಾದ ಶನಿವಾರ ಗಾಳಿಪಟಗಳ ರಂಗು ಹೊಸ ಕಳೆ ತಂದಿದೆ. ಇಲ್ಲಿನ ಜಿಲ್ಲಾ ಕ್ರೀಡಾಂಗಣದಲ್ಲಿ ಜಿಲ್ಲಾಡಳಿತ, ಪ್ರವಾಸೋದ್ಯಮ ಇಲಾಖೆ ಹಾಗೂ ಕನ್ನಡ ಮತ್ತು ಸಂಸ್ಕೃತಿ ಇಲಾಖೆಯ ಸಹಯೋಗದೊಂದಿಗೆ ಆಯೋಜಿಸಲಾಗಿದ್ದ ಬೃಹತ್ ಗಾಳಿಪಟ ಉತ್ಸವ ಸಾವಿರಾರು ಜನರನ್ನು ಮಂತ್ರಮುಗ್ಧಗೊಳಿಸಿತು.

ಹೊಸಪೇಟೆಯಲ್ಲಿ ವಿಶಾಲವಾದ ಜಿಲ್ಲಾ ಕ್ರೀಡಾಂಗಣದ ಬಾನಂಗಳದಲ್ಲಿ ಬಣ್ಣಬಣ್ಣದ ಲೋಕವೇ ತೆರೆದುಕೊಂಡಿತ್ತು. ಸಾಮಾನ್ಯ ಗಾಳಿಪಟಗಳಿಗಿಂತ ಭಿನ್ನವಾದ, ಬೃಹತ್ ಆಕಾರದ ನೂರಾರು ಗಾಳಿಪಟಗಳು ಮುಗಿಲೆತ್ತರಕ್ಕೆ ಚಿಮ್ಮಿದವು. ಸರಪಟ, ಗಾಯತ್ರಿ ದೇವಿ ಭಾವಚಿತ್ರ, 

ಭಾರತದ ತ್ರಿವರ್ಣ ಧ್ವಜ, ಡ್ರ್ಯಾಗನ್, ಅಂಜನೇಯ, ಕುದುರೆ, ಚಿರತೆ, ಅಕ್ಟೋಪಾಸ್, ಹುಲಿ ಹಾಗೂ ಐ ಲವ್ ಹಂಪಿ ಎಂಬ ಬರಹವಿದ್ದ ಗಾಳಿಪಟಗಳು ಪ್ರೇಕ್ಷಕರ ಗಮನ ಸೆಳೆದವು. ಸುಮಾರು 30 ಅಡಿಯಿಂದ 200 ಅಡಿಯವರೆಗಿನ ಬೃಹತ್ ಗಾಳಿಪಟಗಳು ಆಕಾಶದಲ್ಲಿ ತೇಲಾಡುತ್ತಿದ್ದರೆ, ನೋಡುಗರು ಕತ್ತು ಮೇಲೆತ್ತಿ ಆಶ್ಚರ್ಯದಿಂದ ವೀಕ್ಷಿಸಿದರು.

ಈ ಅದ್ಭುತ ಪ್ರದರ್ಶನಕ್ಕಾಗಿ ಕರ್ನಾಟಕ ಮಾತ್ರವಲ್ಲದೆ, ಒರಿಸ್ಸಾ, ಗುಜರಾತ್ ಮತ್ತು ಕೇರಳ ರಾಜ್ಯಗಳಿಂದ ಒಟ್ಟು ಐದು ತಂಡಗಳ 17 ಪರಿಣಿತ ಕಲಾವಿದರು ಆಗಮಿಸಿದ್ದರು. ಅದರಲ್ಲೂ ಬೆಂಗಳೂರಿನ ಟೈಟ್ ಕ್ಲಿನಿಕ್ ಕ್ಲಬ್ ತಂಡದವರು ಪ್ರದರ್ಶಿಸಿದ ಗಾಳಿಪಟಗಳು ವಿಶೇಷ ಮೆರುಗು ನೀಡಿದವು.  ಜಿಲ್ಲೆಯ ಶಾಸಕ ಎಚ್.ಆರ್. ಗವಿಯಪ್ಪ, ಡಿಸಿ ಕವಿತಾ ಮನ್ನಿಕೇರಿ ಮತ್ತು ಸಂಬಂಧಪಟ್ಟ ಇಲಾಖೆಯ ಹಿರಿಯ ಅಧಿಕಾರಿಗಳು ಗಾಳಿಪಟ ಹಾರಿಸುವ ಮೂಲಕ ಈ ಕಲಾ ವೈಭವಕ್ಕೆ ಅಧಿಕೃತ ಚಾಲನೆ ನೀಡಿದರು. ಹಂಪಿ ಉತ್ಸವಕ್ಕೆ ಕೇವಲ ಸಾಂಸ್ಕೃತಿಕ ವೇದಿಕೆಗಳಷ್ಟೇ ಅಲ್ಲದೆ, ಈ ಗಾಳಿಪಟ ಉತ್ಸವವು ಸಾಹಸ ಮತ್ತು ಕಲೆಯ ಸಂಗಮವಾಗಿ ಪರಿಣಮಿಸಿದೆ.

ಉತ್ಸವವನ್ನು ವೀಕ್ಷಿಸಲು ಹೊಸಪೇಟೆ ನಗರ ಸೇರಿದಂತೆ ಜಿಲ್ಲೆಯ ವಿವಿಧ ಭಾಗಗಳಿಂದ ಸಾವಿರಾರು ಮಕ್ಕಳು, ಹಿರಿಯರು ಕ್ರೀಡಾಂಗಣಕ್ಕೆ ಹರಿದು ಬಂದಿದ್ದರು. ಗುಲಾಬಿ, ಕಂದು ಮತ್ತು ಕಪ್ಪು ಬಣ್ಣಗಳ ವಿಶಿಷ್ಟ ಗಾಳಿಪಟಗಳ ಮುಂದೆ ನಿಂತು ಪ್ರೇಕ್ಷಕರು ಸೆಲ್ಫಿ  ಕ್ಲಿಕ್ಕಿಸಿಕೊಂಡು ಸಂಭ್ರಮಿಸಿದರು. ಹಾರುವ ಪ್ರಾಣಿಗಳು ಮತ್ತು ಕಾರ್ಟೂನ್ ಮಾದರಿಯ ಗಾಳಿಪಟಗಳು ಮಕ್ಕಳನ್ನು ವಿಶೇಷವಾಗಿ ರಂಜಿಸಿದವು. ಹಗಲಿನಲ್ಲಿ ಮಾತ್ರವಲ್ಲದೆ, ಸಂಜೆಯಾಗುತ್ತಿದ್ದಂತೆ ಗಾಳಿಪಟಗಳಿಗೆ ಅಳವಡಿಸಲಾಗಿದ್ದ ಎಲ್ಇಡಿ ಲೈಟಿಂಗ್ಸ್ ಮೂಲಕ ಬಾನಂಗಳದಲ್ಲಿ ಬೆಳಕಿನ ಚಿತ್ತಾರ ಮೂಡಿಸಲಾಯಿತು.

"