ಲಕ್ಷಾಂತರ ಭಕ್ತರ ಸಮ್ಮುಖದಲ್ಲಿ ವಿಜೃಂಭಿಸಿದ ಗುರು ಕೊಟ್ಟೂರೇಶ್ವರ ರಥೋತ್ಸವ

ತಡವಾಗಿ ರಥ ಸಾಗಿದರೂ ಲಕ್ಷಾಂತರ ಜನರು ಒಕ್ಕೊರಲಿನಿಂದ ‘ಕೊಟ್ಟೂರೇಶ್ವರ ಮಹಾರಾಜ್ ಕೀ ಜೈ’ ಎಂದು ಕೂಗಿದ ಘೋಷಣೆ ಮುಗಿಲು ಮುಟ್ಟಿತು. ಪಾದಯಾತ್ರೆ ಮೂಲಕ ಬಂದ ಭಕ್ತರು ಶಾಂತತೆಯಿಂದ ಕಾದು ರಥೋತ್ಸವವನ್ನು ಕಣ್ಣುಂಬಿಕೊಂಡರು. ರಥೋತ್ಸವಕ್ಕೂ ಮುನ್ನ ಶ್ರೀ ಸ್ವಾಮಿ ರಥ ಏರುವ ಏಣಿಗೆಯನ್ನು ಶಾಸ್ತ್ರೋಕ್ತವಾಗಿ ಪೂಜಿಸಲಾಯಿತು.

ಮಧ್ಯಾಹ್ನ ದಲಿತ ಸಮುದಾಯದ ನೂರಾರು ಯುವಕರು ಗಚ್ಚಿನಮಠದಿಂದ ಬೃಹತ್ತಾದ ಏಣಿಯನ್ನು ಮೆರವಣಿಗೆ ಮೂಲಕ ವಿಜೃಂಭಣೆಯಿಂದ ಹೊತ್ತು ತಂದು ರಥಕ್ಕೆ ನಿಲ್ಲಿಸಿದರು. ನಂತರ ಮೂರು ಗಂಟೆಯ ವೇಳೆಗೆ ಆಯಗಾರ ಬಳಗದಿಂದ ಬಲಿಬಾನವನ್ನು ಸಮರ್ಪಿಸಲಾಯಿತು. ಗುರು ಕೊಟ್ಟೂರೇಶ್ವರ ಸ್ವಾಮಿಯ ಉತ್ಸವವು 4.15ಕ್ಕೆ ಹಿರೇಮಠದಿಂದ ಕ್ರಿಯಾಮೂರ್ತಿ ಶಿವಪ್ರಕಾಶ ಕೊಟ್ಟೂರು ದೇವರ ನೇತೃತ್ವದಲ್ಲಿ ಪಲ್ಲಕ್ಕಿಯಲ್ಲಿ ಹೊರಟು ಹರಳಯ್ಯನಕೇರಿ ಸಮೀಪ ಆಗಮಿಸಿತು.

ಈ ವೇಳೆ ಶ್ರೀಮಠದ ಧರ್ಮಕರ್ತರಾದ ಶೇಖರಯ್ಯ, ದತ್ತಿ ಇಲಾಖೆಯ ಇಒ ಮಲ್ಲಪ್ಪ ಹಾಗೂ ಅರ್ಚಕರು ಮತ್ತು ಆಯಾಗಾರ ಬಳಗವು ಹರಳಯ್ಯನ ಸಮುದಾಯದ ದುರುಗಮ್ಮ ಹಾಗೂ ಉಡಿಸಲಮ್ಮ ಅವರ ಮನೆಗೆ ಆಗಮಿಸಿ ಸ್ವಾಗತಿಸಿದರು. ಹರಳಯ್ಯನ ಸಮುದಾಯದ ಮಹಿಳೆಯರು ಗುರು ಕೊಟ್ಟೂರೇಶ್ವರ ಸ್ವಾಮಿಗೆ ಕಳಸ ಹಾಗೂ ಧೂಪದಾರತಿ ಬೆಳಗಿದರು. ಅಲ್ಲಿಂದ ಸ್ವಾಮಿಯ ಪಲ್ಲಕ್ಕಿ ಉತ್ಸವವು ವಿವಿಧ ಮೇಳಗಳೊಂದಿಗೆ ರಥದತ್ತ ಸಾಗಿತು.

ಪ್ರತಿ ವರ್ಷಕ್ಕಿಂತ ಈ ವರ್ಷ ಮೂಲಾ ನಕ್ಷತ್ರ ತಡವಾಗಿ ಕೂಡಿ ರಥ ಸಾಗಿದರೂ ಭಕ್ತರ ಉತ್ಸಾಹ ಕಡಿಮೆಯಾಗದೆ ಸ್ವಾಮಿಯ ಜೈಕಾರ ಮೊಳಗುತ್ತಿತ್ತು. ಬಾಳೆಹಣ್ಣು, ಉತ್ತುತ್ತಿ ಹಾಗೂ ದವನ ಎಸೆದು ಸಂಭ್ರಮಿಸಿದ ಭಕ್ತರು ದೈವಕ್ಕೆ ನಮಿಸಿದರು. ರಥೋತ್ಸವದಲ್ಲಿ ಅಸಂಖ್ಯಾತ ಭಕ್ತರು ಪಾಲ್ಗೊಂಡಿದ್ದರು. ರಥೋತ್ಸವವು ರಾಜಗಾಂಭೀರ್ಯದಿಂದ ಪಾದಗಟ್ಟೆವರೆಗೆ ಸಾಗಿ ಮರಳಿ 7.30ಕ್ಕೆ ರಥವು ಮೂಲ ಸ್ಥಾನಕ್ಕೆ ಬಂದು ವಿರಾಮಿಸಿತು.

ರಥ ನಿಂತ ನಂತರ ಸ್ವಾಮಿಯ ಮೂರ್ತಿಯನ್ನು ಮಂಗಳವಾದ್ಯಗಳೊಂದಿಗೆ ಆಯಗಾರರು, ಭಕ್ತರು ಹಾಗೂ ಅರ್ಚಕರು ಕೊಂಡೊಯ್ದು ಮಠದಲ್ಲಿ ಪ್ರತಿಷ್ಠಾಪಿಸಿದರು. ಪ್ರತಿವರ್ಷದ ಪದ್ಧತಿಯಂತೆ ಮಹಾಮಂಗಳಾರತಿ ಸೇರಿದಂತೆ ವಿವಿಧ ಧಾರ್ಮಿಕ ಕೈಂಕರ್ಯಗಳನ್ನು ನೆರವೇರಿಸಲಾಯಿತು. ಈ ವೇಳೆ ರಥೋತ್ಸವದ ವೇಳೆ ಜಿಲ್ಲಾಧಿಕಾರಿ ಕವಿತಾ ಎಸ್. ಮನ್ನಿಕೇರಿ ಉಪಸ್ಥಿತರಿದ್ದರು.

ಜಿಲ್ಲಾ ಪೊಲೀಸ್ ವರಿಷ್ಠಾಧಿಕಾರಿ ಎಸ್. ಜಾಹ್ನವಿ ಯಾವುದೇ ಅವಘಡ ಸಂಭವಿಸದಂತೆ ಸೂಕ್ತ ಬಂದೋಬಸ್ತ್ ಏರ್ಪಡಿಸಿದ್ದರು. ಕೊಟ್ಟೂರೇಶ್ವರ ಸ್ವಾಮಿ ರಥೋತ್ಸವ ಕಾರ್ಯಕ್ರಮಕ್ಕೆ ಸುಮಾರು ಆರು ಲಕ್ಷಕ್ಕೂ ಅಧಿಕ ಜನರು ಸೇರಿದ್ದರು. ರಥೋತ್ಸವ ನಡೆಯುವ ಮುಂಚೆ ಹರಳಯ್ಯನ ಸಮುದಾಯದ ದುರುಗಮ್ಮ ಕಳಸ ಹಾಗೂ ಉಡಸಲಮ್ಮ ಧೂಪದಾರತಿ ಬೆಳಗಿದರು.