ಕಲ್ಯಾಣದಲ್ಲಿ ಕಾವಡ ಯಾತ್ರೆ ವೈಭವ

ಬಸವಕಲ್ಯಾಣ: ಶ್ರಾವಣ ಮಾಸ ನಿಮಿತ್ತ ಶ್ರೀ ವಟಕೇಶ್ವರ ಮಹಾದೇವ ಗ್ರೂಪ್​ ಹಾಗೂ ಶಿವಭಕ್ತರ ಸಹಯೋಗದಲ್ಲಿ ನಗರದಲ್ಲಿ ಮಂಗಳವಾರ ಜರುಗಿದ ವೈಭವದ ಕಾವಡ ಅಪಾರ ಸಂಖ್ಯೆಯಲ್ಲಿ ಶಿವಭಕ್ತರು ಭಾಗವಹಿಸಿದ್ದರು.

ಸಸ್ತಾಪುರ ಬಂಗ್ಲಾ ಸಮೀಪದ ಐತಿಹಾಸಿಕ ಬಂದವರ ಓಣಿಯಿಂದ ತ್ರಿಪುರಾಂತ, ಹರಳಯ್ಯ ವೃತ್ತ. ಅಂಬೇಡ್ಕರ್​ ವೃತ್ತದ ಮೂಲಕ ಮುಖ್ಯರಸ್ತೆ ಮಾರ್ಗವಾಗಿ ನಗರದ ಶ್ರೀ ಸದ್ಗುರು ಸದಾನಂದ ಸ್ವಾಮಿ ಮಠದವರೆಗೆ ನಡೆದ ಯಾತ್ರೆ ಯುದ್ದಕ್ಕೂ ಭಕ್ತಿಯ ಅಲೆಯಲ್ಲಿ ಶಿವಭಕ್ತಿ ಗೀತೆ, ಶಿವ ನಾಮಸ್ಮರಣೆ ಮೊಳಗಿತು.

ಬಂದವರ ಓಣಿಯಲ್ಲಿ ತಾಮ್ರದ ಸಣ್ಣ ಬಿಂದಿಗೆಗಳಲ್ಲಿ ಪವಿತ್ರ ನೀರು ಸಂಗ್ರಹಿಸಿ ಕಟ್ಟಿಗೆಯ ಎರಡು ಭಾಗಕ್ಕೆ (ತಕ್ಕಡಿ ಮಾದರಿಯಲ್ಲಿ)ಕಟ್ಟಿಕೊಂಡು ಹೆಗಲ ಮೇಲಿಟ್ಟುಕೊಂಡು ಶಿವಭಕ್ತರು ಹೆಜ್ಜೆ ಹಾಕಿದರು. ಇನ್ನು ಅನೇಕರು ಭಜನೆ ಮಾಡುತ್ತ ಮುಂದೆ ಸಾಗಿದರು.

ಕುಂಭ-ಕಳಸ, ತೆರೆದ ವಾಹನದಲ್ಲಿ ಶಿವನ ಮೂರ್ತಿಯೊಂದಿಗೆ ನಡೆದ ಯಾತ್ರೆಯಲ್ಲಿ ಶಿವಭಕ್ತಿ ಗೀತೆಯೊಂದಿಗೆ ಹರ್​ ಹರ್​ ಮಹಾದೇವ ಘೋಷಣೆಗಳು ಮಾರ್ದನಿಸಿದವು. ಬಹುತೇಕ ಜನರು ಕೇಸರಿ ಶಲ್ಯ, ಟೊಪ್ಪಿಗೆ ಧರಿಸಿದ್ದರು. ಏಕ್​ ಲೋಟಾ ಜಲ್​ ಸಾರೆ ಸಮಸ್ಯಾಕಾ ಹಲ್​(ಒಂದು ತಂಬಿಗೆ ನೀರು ಎಲ್ಲ ಸಮಸ್ಯೆಗಳಿಗೆ ಪರಿಹಾರ) ಘೋಷ್ಯ ವಾಕ್ಯ ಯಾತ್ರೆಯಲ್ಲಿ ಗಮನ ಸೆಳೆಯಿತು.

ಶ್ರೀ ಸದ್ಗುರು ಸದಾನಂದ ಸ್ವಾಮಿ ಮಠಕ್ಕೆ ಯಾತ್ರೆ ತಲುಪಿದ ನಂತರ ಮಠದ ಪರಿಸರದಲ್ಲಿರುವ ಶ್ರೀ ಮಹಾದೇವನಿಗೆ ಪವಿತ್ರ ಜಲದಿಂದ ಅಭಿಷೇಕ ಮಾಡಲಾಯಿತು. ಯಾತ್ರೆಯಲ್ಲಿ ಮಹಿಳೆಯರು, ಯುವಕರು ಹಿರಿಯ ನಾಗರಿಕರು ಹೆಚ್ಚಿನ ಸಂಖ್ಯೆಯಲ್ಲಿ ಭಾಗವಹಿಸಿ, ಶಿವಭಕ್ತಿಗೆ ಮೆರೆದರು.

ಯಾತ್ರಾ ಸಮಿತಿ ಅಧ್ಯಕ್ಷ ಸುಮಿತ ಶಿವಣಗೆ, ಉಪಾಧ್ಯಕ್ಷ ಹುಲೆಪ್ಪ ದೇಗಲೂರೆ, ಪ್ರಮುಖರಾದ ಸತೀಶ ಸ್ವಾಮಿ, ಹರ್ಷ ವೀರಶೆಟ್ಟಿ, ಅರವಿಂದರಡ್ಡಿ ಭೋಗಲೆ, ಹುಲೆಪ್ಪ ಪಾಟೀಲ್​, ವೈಭವ ಗೋಸ್ವಾಮಿ, ಕೃಷ್ಣಾರಡ್ಡಿ, ಸಂಜು ಜಾಧವ, ವಿಜಯಕುಮಾರ ಸ್ವಾಮಿ, ಮಲ್ಲಿಕಾರ್ಜುನ ಸೆಂಡೆ, ಚನ್ನವಿರ ಸ್ವಾಮಿ, ನಾಗರಾಜ ಪಂಚಾಳ, ನಾಗರಾಜ, ಬಸ್ಸು ಸ್ವಾಮಿ, ವಿಜಯಕುಮಾರ ಪಾಟೀಲ್​, ಮೋಹನ್​ ತಾಟೆ, ಹಣಮಂತ ಪಂಚಾಳ, ಮಹೇಶ ಚಂದನಕೆರೆ, ರಾಹುಲ, ಲಕ್ಷ್ಮೀ ಪುತ್ರ ನಿಂಬಾಳಕರ್​ ಸಮಿತಿ ಸದಸ್ಯರು, ಹಾಗೂ ವಿವಿಧೆಡೆಯಿಂದ ಆಗಮಿಸಿದ ಶಿವಭಕ್ತರು ಭಾಗವಹಿಸಿದ್ದರು.

ಸ್ವಾಗತ: ತ್ರಿಪುರಾಂತನಲ್ಲಿಯ ಯಾತ್ರೆ ಆಗಮಿಸುತ್ತಿದ್ದಾಗ ಮಾಜಿ ಶಾಸಕ ಮಲ್ಲಿಕಾರ್ಜುನ ಖೂಬಾ ಯಾತ್ರೆಗೆ ಸ್ವಾಗತಿಸಿ, ಪೂಜೆ ಸಲ್ಲಿಸಿದರು. ಶೀತಲ್​ ಖೂಬಾ, ಜೆಡಿಎಸ್​ ತಾಲೂಕು ಅಧ್ಯಕ್ಷ ವಾಲ್ಮೀಕ ಖನಕೂರೆ ಇತರರಿದ್ದರು.