ಬರದ ಬೇಗುದಿಗೆ ಬರಿದಾಯ್ತು ಗಂಗೇನಹಳ್ಳಿ ಕೆರೆ

ಕೆರೆಯಲ್ಲಿನ ಗುಂಡಿಗಳಲ್ಲಿದ್ದ ಅಲ್ಪಸ್ವಲ್ಪ ಗುಟುಕು ನೀರು ಬರಿದಾಗಿದೆ. 30 ಎಕರೆ ವಿಸ್ತಾರದ ಕೆರೆ ಈಗ ಎತ್ತ ನೋಡಿದರೂ ವಿಶಾಲ ಮೈದಾನದಂತೆ ಕಾಣುತ್ತಿದೆ.

ಕೆರೆ ಅವಲಂಬಿಸಿ 490 ಎಕರೆಯಷ್ಟು ಕೃಷಿ ಭೂಮಿ ತಳಭಾಗದಲ್ಲಿದೆ. ಕೆರೆಯ ಆಸುಪಾಸಿನಲ್ಲಿ 300ಕ್ಕೂ ಹೆಚ್ಚು ರೈತರ ಕೃಷಿಪಂಪುಸೆಟ್‌ಗಳಿವೆ. ಕೆರೆಯ ತಳಭಾಗದ ರೈತರು ಬೇಸಿಗೆಯಲ್ಲಿ ತರಕಾರಿ ಬೆಳೆ ಬೆಳೆಯುತ್ತಿದ್ದು, ಪ್ರಸ್ತುತ ನೀರಿಲ್ಲದಿರುವುದರಿಂದ ಬೇಸಾಯವೂ ಈ ಬಾರಿ ಇಲ್ಲವಾಗಿದೆ. ಮುಂಗಾರು, ಪೂರ್ವ ಮುಂಗಾರು ಮಳೆ ಮುನಿಸಿಕೊಂಡಾಗಿದೆ. ಹಿಂಗಾರು ಮಳೆ ಕನಸಿನಂತಿದೆ. ಕೆರೆ ಬಟಬಯಲಾಗಿ, ಕೃಷಿಕರ ಪಂಪುಸೆಟ್‌ಗಳು ಸ್ಥಗಿತವಾಗಿವೆ. ಅಂರ್ತಜಲ ಕುಸಿತದಿಂದ ದಿನಕ್ಕೊಂದೆರೆಡು ಪಂಪುಸೆಟ್‌ಗಳು ಮೌನವಾಗುತ್ತಿದ್ದು ರೈತರು ಆಗಸದತ್ತ ನೋಡುವಂತಾಗಿದೆ.

ಕಬ್ಬು ಬೆಳೆಯುತ್ತಿದ್ದ ರೈತರ ಮೊಗ ಬಾಡಿದಂತಾಗಿದೆ. ಜಾನುವಾರುಗಳಿಗೆ ಮೇವು, ನೀರಿಲ್ಲ ಎಂದು ಹೈನುಗಾರರು ಹಪಹಪಿಸುವಂತಾಗಿದೆ. ಕೆರೆ ಬರಿದಾದ ಪರಿಣಾಮ ಗಂಗೇನಹಳ್ಳಿ, ಸಿದ್ಧಾಪುರದಂತಹ ಹಲವು ಗ್ರಾಮಗಳಲ್ಲಿ ಕುಡಿಯುವ ನೀರಿನ ಕೊಳವೆ ಬಾವಿಯಲ್ಲಿ ನೀರು ಜಿನುಗಲು ಆರಂಭಿಸಿದೆ.

ಕೆರೆಗೆ ಬರುತ್ತಿದ್ದ ನೀರಿನ ಸೆಲೆಗಳಾದ ಹಳ್ಳಗಳನ್ನು ಪ್ರಭಾವಿ ವ್ಯಕ್ತಿಗಳು ನಿರ್ಭಯವಾಗಿ ಮುಚ್ಚಿಕೊಂಡಿರುವುದರಿಂದ ನೀರು ಸಂಗ್ರಹಣೆಗೆ ಪೆಟ್ಟು ಬಿದ್ದಿದೆ. ಹೂಳನ್ನು ಅವೈಜ್ಞಾನಿಕವಾಗಿ ತೆಗೆಯಲಾಗಿದೆ. ಹೇಮಾವತಿ ನಾಲೆಯಿಂದ ನೀರು ಹರಿದರೆ ಮಾತ್ರ ಈಬಾರಿ ರೈತ ಬದುಕು ಕಟ್ಟಿಕೊಳ್ಳಲು ಸಾಧ್ಯ. ಇಲ್ಲವಾದಲ್ಲಿ ರೈತ ಕೂಲಿ ಹರಸಿ ನಗರ ಪ್ರದೇಶಕ್ಕೆ ಗುಳೇ ಹೋಗುವ ಕಾಲ ಸನಿಹವಾಗಲಿದೆ.