ವಾಹನ ಅಡ್ಡಗಟ್ಟಿ ರಾಬರಿ ಮಾಡಿದ್ದ ಗ್ಯಾಂಗ್ ಬಂಧನ

ಖಾಸಗಿ ಕಂಪನಿಯೊಂದರ ಡೆಲಿವರಿ ಬಾಯ್ ಆಗಿದ್ದ ಮೋಹನ್ ಕುಮಾರ್ ಎಂಬುವರು ನೀಡಿದ ದೂರು ಆಧರಿಸಿ ಹುಸ್ಕೂರು ಬಳಿಯ ಗುಟ್ಟಹಳ್ಳಿ ನಿವಾಸಿ ಅಜಯ್ ಕುಮಾರ್, ಅಕ್ಷಯ್ ಕುಮಾರ್, ಲೋಹಿತ್, ಆಕಾಶ್ ಗುಪ್ತ ಹಾಗೂ ಮಾರುತಿ ಬಂಧಿತರು. ದರೋಡೆಯಲ್ಲಿ ಭಾಗಿಯಾಗಿದ್ದ ಮತ್ತೊಬ್ಬ ಆರೋಪಿ ಅಪ್ರಾಪ್ತನನ್ನು ವಶಕ್ಕೆ ಪಡೆದಿದ್ದಾರೆ. ಬಂಧಿತರಿಂದ 8 ಮೊಬೈಲ್, ಕೃತ್ಯಕ್ಕೆ ಬಳಸಿದ್ದ 2 ಬೈಕ್ ವಶಕ್ಕೆ ಪಡೆಯಲಾಗಿದೆ ಎಂದು ಪೊಲೀಸರು ತಿಳಿಸಿದ್ದಾರೆ.

ಜುಲೈ 25ರಂದು ಸಂಜೆ ಕೊಡತಿಯಿಂದ ರಾಯಸಂದ್ರ ಬಳಿ ಕೂಲ್‌ಡ್ರಿಂಗ್ಸ್ ವಾಹನ ಬರುವಾಗ ಅಡ್ಡಗಟ್ಟಿದ ರಾಬರಿ ಗ್ಯಾಂಗ್ ಚಾಲಕನ ತಲೆಗೆ ಪಿಸ್ತೂಲ್ ಇಟ್ಟು ಬೆದರಿಸಿದ್ದಾರೆ. ಡೆಲಿವರಿ ಬಾಯ್ ಬಳಿಯಿದ್ದ 50 ಸಾವಿರ ರೂ. ಕಿತ್ತುಕೊಂಡು ಪರಾರಿಯಾಗಿದ್ದರು. ದೂರು ಆಧರಿಸಿ 6 ತಂಡ ರಚನೆ ಮಾಡಿ ಆರೋಪಿಗಳನ್ನು ಬಂಧಿಸಿ ನ್ಯಾಯಾಂಗ ಬಂಧನಕ್ಕೆ ಒಪ್ಪಿಸಲಾಗಿದೆ ಎಂದು ಪೊಲೀಸರು ತಿಳಿಸಿದ್ದಾರೆ.

ಚಾಲಕನೇ ಕಿಂಗ್‌ಪಿನ್:

ಆರೋಪಿಗಳ ಪೈಕಿ ಲೋಹಿತ್‌ಮತ್ತು ಆಕಾಶ್ ಗುಪ್ತ ಬಿಹಾರ ಮೂಲದವರಾಗಿದ್ದು, ಮೋಜಿನ ಜೀವನಕ್ಕಾಗಿ ದರೋಡೆಗೆ ಸಂಚು ರೂಪಿಸಿದ್ದರು. ಬಿಹಾರದಿಂದ ಕಂಟ್ರಿಮೆಡ್ ಪಿಸ್ತೂಲ್ ತೆಗೆದುಕೊಂಡು ಬಂದಿದ್ದರು. ಟೆಂಪೋ ಚಾಲಕ ಅಜಯ್ ತನ್ನ ವಾಹನವನ್ನು ಅಡ್ಡಗಟ್ಟಿ ಹಣ ದರೋಡೆ ಮಾಡುಬಹುದು ಎಂದು ಸ್ನೇಹಿತ ಲೋಹಿತ್‌ಗೆ ಸಲಹೆ ನೀಡಿದ್ದ. ಅದರಂತೆ ಜುಲೈ 25ರ ಸಂಜೆ 7.30ರ ಸುಮಾರಿಗೆ ಕೊಡತಿಯಿಂದ ರಾಯಸಂದ್ರ ಬಳಿ ಗೂಡ್ಸ್ ವಾಹನ ಬರುವಾಗ ಲೋಹಿತ್, ಆಕಾಶ್ ಗುಪ್ತ ಹಾಗೂ ಇತರು ವಾಹನ ಅಡ್ಡಗಟ್ಟಿದ್ದಾರೆ.

ಬಳಿಕ ಆ ವಾಹನದಲ್ಲಿದ್ದ ಡೆಲಿವರಿ ಬಾಯ್ ಬಳಿಯಿದ್ದ 50 ಸಾವಿರ ರೂ. ಸುಲಿಗೆ ಮಾಡಿ ಪರಾರಿಯಾಗಿದ್ದರು. ಆರೋಪಿಗಳ ಪತ್ತೆಗಾಗಿ ಸುಮಾರು 20 ಕಿ.ಮೀಟರ್ 200ಕ್ಕೂ ಹೆಚ್ಚು ಸಿಸಿ ಕ್ಯಾಮರಾ ಪರಿಶೀಲಿಸಿ, ತಾಂತ್ರಿಕ ಕಾರ್ಯಾಚರಣೆ ನಡೆಸಿ ಆರೋಪಿಗಳ ಬಂಧಿಸಲಾಗಿದೆ ಎಂದು ವೈಟ್‌ಫೀಲ್ಡ್ ವಿಭಾಗದ ಡಿಸಿಪಿ ಸೈದುಲು ಅಡಾವತ್ ತಿಳಿಸಿದ್ದಾರೆ.