ನಗರದಲ್ಲಿ "ನೀರು ಸರಬರಾಜು' ಎಂಬುದು ಪ್ರಭಾವಿಗಳಿಗೆ, ನಗರಸಭೆ ಸದಸ್ಯರಿಗೆ ಮತ್ತು ಗುತ್ತಿಗೆದಾರರಿಗೆ ಅಕ್ಷಯ ಪಾತ್ರ ಎಂಬಂತಾಗಿದೆ ಎಂಬ ಆರೋಪಗಳು ಕೇಳಿ ಬರುತ್ತಿವೆ. ಟ್ಯಾಂಕರ್ ನೀರು ಪೂರೈಕೆ ಮತ್ತು ನಿರಂತರ ಕುಡಿಯುವ ನೀರಿನ ಯೋಜನೆಗಳು ಸಮಯಕ್ಕೆ ಸರಿಯಾಗಿ ಜನಸಾಮಾನ್ಯರಿಗೆ ನೀರು ಒದಗಿಸುವುದಕ್ಕಿಂತ ಪ್ರಭಾವಿಗಳಿಗೆ ಸೂಕ್ತ ಸಮಯದಲ್ಲಿ ಬಿಲ್ ರೂಪದಲ್ಲಿ ಕಾಂಚಾಣ ಒದಗಿಸುತ್ತಿವೆ ಎಂಬ ಆರೋಪಗಳು ನಗರಸಭೆ ಆವರಣದಲ್ಲೇ ಕೇಳಿ ಬರುತ್ತಿವೆ. ಬರಗಾಲ ಇರಲಿ, ಇರದೇ ಇರಲಿ ಟ್ಯಾಂಕರ್ ಮೂಲಕ ನೀರು ಸರಬರಾಜು ನಿರಂತರವಾಗಿ ಸಾಗಿರುತ್ತದೆ. ಇದರ ಜತೆಗೆ ಮಹತ್ವದ ಯೋಜನೆಯಾದ ಮುಂಡರಗಿಯಿಂದ ಗದಗ ನಗರಕ್ಕೆ ಸರಬರಾಜು ಆಗುವ ನಿರಂತರ ಕುಡಿಯುವ ನೀರಿನ ಯೋಜನೆಯಲ್ಲಿ ಕೋಟ್ಯಂತರ ರೂ. ನಿರ್ವಹಣಾ ವೆಚ್ಚ ಸುರಿದರೂ ನೀರಿನ ಸಮಸ್ಯೆಗೆ ಶಾಶ್ವತ ಪರಿಹಾರ ಸಿಗುತ್ತಿಲ್ಲ ಎಂಬ ನೋವು ಸಾರ್ವಜನಿಕರರನ್ನು ಕಾಡುತ್ತಿದೆ.
