ಯುವಕನ ಮೇಲೆ ತಲ್ವಾರ್​ ಚಾಕುವಿನಿಂದ ಹಲ್ಲೆ! ಮೂವರ ಬಂಧನ

ನಗರದ ಮುಳಗುಂದ ನಾಕಾ ಬಳಿ ಬುಧವಾರ ತಡರಾತ್ರಿ ಯುವಕನೋರ್ವನ ಮೇಲೆ ಮೂವರು ತಲ್ವಾರ್​, ಚಾಕು ಮತ್ತು ಬೀಯರ್​ ಬಾಟಲಿಯಿಂದ ಮಾರಣಾಂತಿಕ ಹಲ್ಲೆ ನಡೆಸಿದ್ದಾರೆ. ಸ್ಥಳದಲ್ಲೇ ಅಸ್ವಸ್ಥನಾದ ಯುವಕ ಅರುಣಕುಮಾರ್​ ಕೋಟೇಗಲ್ಲ ಎಂಬಾತನನ್ನು ಚಿಕಿತ್ಸೆಗಾಗಿ ಜಿಲ್ಲಾಸ್ಪತ್ರೆಗೆ ದಾಖಲಿಸಲಾಗಿದೆ. ಈ ಕುರಿತು ಮೂವರನ್ನು ಬಂಧಿಸಿದ್ದು, ನಗರ ಪೊಲೀಸ್​ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ. ಹಲ್ಲೆ ಮಾಡುತ್ತಿರುವ ವಿಡಿಯೋ ವಾಟ್ಸಪ್​ ನಲ್ಲಿ ಹರಿದಾಡುತ್ತಿವೆ. ಜನನಿಬೀಡ ಪ್ರದೇಶದಲ್ಲೇ ನೂರಾರು ಜನರ ಎದುರಿನಲ್ಲಿ ಮೂವರು ಯುವಕರು ಯಾವುದೇ ಭಯವಿಲ್ಲದೆ ಹಲ್ಲೆ ನಡೆಸಿದ್ದು ವಿಡಿಯೋಗಳಲ್ಲಿ ಸ್ಪಷ್ಟವಾಗಿವೆ. ವಿಡಿಯೋಗಳು ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್​ ಆಗುತ್ತಿದ್ದು, ಅವಳಿ ನಗರಗಳನ್ನು ಬೆಚ್ಚೀಬಿಳುವಂತೆ ಮಾಡಿದೆ.

ನಗರದ ಕಿಲ್ಲಾ ಓಣಿ ಹಾಗೂ ಒಕ್ಕಲಿಗರ ಓಣಿ ಯುವಕರ ನಡುವಿನ ಹಳೆಯ ಗಲಾಟೆಯೇ ಈ ಹಲ್ಲೆಗೆ ಕಾರಣ ಎನ್ನಲಾಗುತ್ತಿದೆ. ಹಲ್ಲೆಯ ವೇಳೆ ಕತ್ತು, ಮುಖ, ತಲೆ, ಹೊಟ್ಟೆ, ಎದೆ, ಕೈ ಸೇರಿ ದೇಹದ ಹಲವು ಭಾಗಗಳಿಗೆ ಚಾಕುವಿನಿಂದ ಇರಿಯಲಾಗಿದೆ. ಟನೆಯಲ್ಲಿ ಹಲ್ಲೆಗೊಳಗಾದ ಅರುಣಕುಮಾರ್​ ಬುಧವಾರ ರಾತ್ರಿ ಹೋಟೆಲ್​ನಲ್ಲಿ ಆಹಾರ ಸೇವಿಸುತ್ತಿದ್ದಾಗ ಅಭಿಷೇಖ, ಸಾಯಿಲ್​ ಮತ್ತು ಮುಸ್ತಾಕ್​ ಎಂಬ ಮೂವರು ಏಕಾಏಕಿ ಒಳನುಗ್ಗಿ ಅರುಣಕುಮಾರ ಮೇಲೆ ತಲ್ವಾರ್​ ಹಾಗೂ ಚಾಕುವಿನಿಂದ ಹಲ್ಲೆ ನಡೆಸಿದ್ದಾರೆ. ಅರುಣಕುಮಾರ್​ ಹೊಟೆಲ್​ ನಿಂದ ಹೊರಗೆ ಓಡಿದ ಬಳಿಕ ಹತ್ತಿರದಲ್ಲೇ ಇದ್ದ ಬಾರ್​ ಮುಂಭಾಗದಲ್ಲಿ ಮತ್ತೊಮ್ಮೆ ಬೀಯರ್​ ಬಾಟಲಿನಿಂದ ತಲೆಗೆ ಬಲವಾಗಿ ಹೊಡೆದಿದ್ದಾರೆ. ರಕ್ತದ ಮಡುವಿನಲ್ಲಿ ಬಿದ್ದ ಅರುಣಕುಮಾರ್​ ನನ್ನು ಸ್ಥಳಿಯ ಜನರು ತಕ್ಷಣವೇ ಜಿಲ್ಲಾ ಆಸ್ಪತ್ರೆಗೆ ಸಾಗಿಸಿದ್ದಾರೆ. ಪ್ರಸ್ತುತ ಜಿಲ್ಲಾ ಆಸ್ಪತ್ರೆಯಲ್ಲಿ ಅರುಣಕುಮಾರ ಚಿಕಿತ್ಸೆ ಪಡೆಯುತ್ತಿದ್ದಾರೆ.

ಟನೆಯ ಬಳಿಕ ಪರಾರಿಯಾಗಿದ್ದ ಆರೋಪಿಗಳನ್ನು ಸಾಮಾಜಿಕ ಜಾಲತಾಣದ ವಿಡಿಯೋ ಆಧರಿಸಿ ಮೂವರು ಆರೋಪಿಗಳನ್ನು ಶಹರ ಪೊಲೀಸರು ಬಂಧಿಸಿ ತನಿಖೆ ಕೈಗೊಂಡಿದ್ದಾರೆ. ಆಟೋ ಚಾಲಕ ಮುಸ್ತಾಕ ಮೂಲಿಮನಿ, ಅಭಿಷೇಕ್​ ಹರ್ಲಾಪೂರ ಹಾಗೂ ದಾಸರ ಓಣಿಯ ಟೈಲ್ಸ್​ ಕೆಲಸಗಾರ ಸಾಯಿಲ್​ ಬಂಧಿತ ಆರೋಪಿಗಳು. ಪ್ರಾಥಮಿಕ ವಿಚಾರಣೆಯಲ್ಲಿ ಹಲ್ಲೆಗೆ ಹಳೆಯ ವೈಷಮ್ಯ ಎಂದು ತಿಳಿದು ಬಂದಿದೆ. ತನಿಖೆ ಮುಂದು ವರೆದಿದೆ.