ಪತ್ರಿಕಾ ಭವನದ ಮೊದಲನೇ ಮಹಡಿ ನಿರ್ಮಾಣಕ್ಕೆ 10 ಲಕ್ಷ: ಬೊಮ್ಮಾಯಿ ಘೋಷಣೆ

ಜಿಲ್ಲಾ ಪತ್ರಿಕಾ ಭವನದ ಮೊದಲನೇ ಮಹಡಿ ನಿರ್ಮಾಣಕ್ಕೆ ಸಂಸದರ ಅಭಿವೃದ್ಧಿ ನಿಧಿಯಿಂದ 10 ಲಕ್ಷ ರೂ. ನೀಡುತ್ತೇನೆ ಮತ್ತು ಸಿಎಸ್​ಆರ್​ ಅನುದಾನವನ್ನು ಕೊಡಿಸಲು ಪ್ರಯತ್ನಿಸುತ್ತೇನೆ ಎಂದು ಸಂಸದ ಬಸವರಾಜ ಬೊಮ್ಮಾಯಿ ಹೇಳಿದರು.

ನಗರದ ಪತ್ರಿಕಾ ಭವನದಲ್ಲಿ ಶನಿವಾರ ಏರ್ಪಡಿಸಿದ್ದ ಜಿಲ್ಲಾ ಪತ್ರಿಕಾ ಭವನದ ನವೀಕೃತ ಕಛೇರಿ ಉದ್ಘಾಟನೆ, ಪ್ರವೇಶ ದ್ವಾರದ ನಾಮಫಲಕ ಅನಾವರಣ ಹಾಗೂ ಗದಗ ಜಿಲ್ಲೆಯ ತಾಲೂಕು ಟಕಗಳ ನೂತನ ಪದಾಧಿಕಾರಿಗಳಿಗೆ ಪ್ರಮಾಣ ಪತ್ರ ವಿತರಣೆ ಕಾರ್ಯಕ್ರಮ ಉದ್ಘಾಟಿಸಿ ಮಾತನಾಡಿದ ಅವರು, ನಮ್ಮದು ಪ್ರತಿನಿಧಿತ್ವದ ಪ್ರಜಾಪ್ರಭುತ್ವ. ನಮ್ಮ ಪ್ರತಿನಿಧಿಗಳ ಮೇಲೆ ನಮ್ಮ ಯಶಸ್ಸು ಅಪಯಶಸ್ಸು ನಿಂತಿರುತ್ತದೆ. ಮತದಾರರಿಗೆ ತನ್ನ ಮತ ಗೆಲ್ಲಬೇಕು ಎನ್ನುವ ಆಸೆ ಇರುತ್ತದೆ. ಆದರೆ, ಕೇವಲ ಮತ ಗೆದ್ದರೆ ಸಾಲದು ಅವರ ಮೂಲಕ ದೇಶ ಗೆಲ್ಲಬೇಕು ಅದರಿಂದ ದೇಶದ ನಾಗರಿಕ ಗೆಲ್ಲಬೇಕು ಎಂದರು.  

ಜಿಲ್ಲೆಯಲ್ಲಿ ಆತ್ಮೀಯ ವಾತಾವರಣ ಇದೆ. ಹಲವಾರು ವಿಚಾರದಲ್ಲಿ ನೀವು ನೇರವಾಗಿ ಪ್ರಶ್ನೆ ಕೇಳಬೇಕು, ನಾವು ಉತ್ತರ ಹೇಳಬೇಕು. ಪತ್ರಕರ್ತರು ಎಂದರೆ ವ್ಯವಸ್ಥೆಯ ಬಗ್ಗೆ ಪ್ರಶ್ನೆ ಕೇಳುವುದೇ ಅವರ ಧರ್ಮ. ಪತ್ರಕರ್ತರು ಪ್ರಶ್ನೆ ಎತ್ತಿದಾಗ ವಿಶ್ವಾಸಾರ್ಹತೆ ಇರುತ್ತದೆ ಎಂದರು. 

ಒಬ್ಬ ರಾಜಕಾರಣಿ ಎಷ್ಟೇ ಕೆಲಸ ಮಾಡಿದರೂ ಅದಕ್ಕೆ ಪ್ರಚಾರ ಸಿಗಲಿಲ್ಲ ಅಂದರೆ ಏನೂ ಪ್ರಯೋಜನವಿಲ್ಲ. ಅದೇ ರೀತಿ ಪತ್ರಿಕೆಗಳು ರಾಜಕಾರಣ ಬಿಟ್ಟು ಬೇರೆ ಸುದ್ದಿ ಹಾಕಿದರೆ ಪತ್ರಿಕೆಗಳ ಪರಿಸ್ಥಿತಿ ಏನಾಗುತ್ತದೆ ಯೋಚನೆ ಮಾಡಿ. ನಾವು ಸಣ್ಣ ಸಣ್ಣ ವಿಚಾರಗಳ ಬಗ್ಗೆ ವಿನಿಮಯ ಮಾಡಿಕೊಳ್ಳಬೇಕು. ರಾಜಕಾರಣದಲ್ಲಿ ಏನು ನಡೆಯುತ್ತಿದೆ ಎಂದು ತಿಳಿದುಕೊಳ್ಳಲು ಪತ್ರಕರ್ತರಿಗೆ ರಾಜಕಾರಣಿಗಳು ಬೇಕು. ಜನರ ಸಮಸ್ಯೆ ಏನಿದೆ ಅಂತ ತಿಳಿಯಲು ರಾಜಕಾರಣಿಗಳಿಗೆ ಪತ್ರಕರ್ತರು ಬೇಕು ಎಂದು ಹೇಳಿದರು.

ಗದಗಿನ ಪತ್ರಕರ್ತರು ಕ್ರಿಯಾಶೀಲರಾಗಿದ್ದಾರೆ. ಗದಗ ಜಿಲ್ಲಾ ಸೃಷ್ಟಿಗೆ ಅವತ್ತಿನ ಹೋರಾಟದಲ್ಲಿ ಪತ್ರಕರ್ತರ ಪಾತ್ರ ಬಹಳ ದೊಡ್ಡದಿದೆ. ಜಿಲ್ಲಾ ವಿಂಗಡಣೆ ಮಾಡುವ ಸಂದರ್ಭದಲ್ಲಿ ಧಾರವಾಡ ಹಾವೇರಿ ಎರಡೇ ಜಿಲ್ಲೆಯಾಗಿದ್ದವು. ಎಲ್ಲ ಪಕ್ಷಗಳ ಮುಖಂಡರು ಧ್ವನಿ ಎತ್ತಿದ್ದರೂ ಸರ್ಕಾರಕ್ಕೆ ಮುಟ್ಟಿರಲಿಲ್ಲ. ಅದನ್ನು ಪತ್ರಕರ್ತರು ಸರ್ಕಾರಕ್ಕೆ ಮುಟ್ಟಿಸಿದರು. ಆಗ ಜೆ ಎಚ್​. ಪಟೇಲರ ಸರ್ಕಾರ ಇತ್ತು. ಅವರ ಮೂತಿರ್ಯನ್ನು ಜಿಲ್ಲಾಧಿಕಾರಿ ಭವನದ ಬಳಿ ನಿಮಿರ್ಸಬೇಕು ಎಂದರು. 

ಕಳಸಾ ಬಂಡೂರಿ ಹೋರಾಟ ಯಶಸ್ವಿಗೆ ಪತ್ರಕರ್ತರ ಸಹಕಾರ ಕಾರಣ. ಧಾರವಾಡದಿಂದ ಪ್ರಾರಂಭವಾಗಿ ನರಗುಂದವರೆಗೂ ಪಾದಯಾತ್ರೆಯಲ್ಲಿ ಪ್ರತಿ ದಿನ ಏನು ಚರ್ಚೆಯಾಯಿತು, ಬರಗಾಲದ ಬಗ್ಗೆ ಏನು ಚರ್ಚೆ ಆಯಿತು ಎನ್ನುವುದನ್ನು ಗದಗ, ರೋಣ, ನಗರಗುಂದ ಪತ್ರಕರ್ತರು ಬಹಳ ಮನಮುಟ್ಟುವಂತೆ ಬರೆದು ನಮ್ಮ ಜೊತೆಗೆ ಹೆಜ್ಜೆಗೆ ಹೆಜ್ಜೆ  ಹಾಕಿದ್ದರು ಎಂದರು. 

ಮಿಡಿಯಾ ಕಿಟ್​ ವಿತರಣೆ: 

ನಾನು ಸಿಎಂ ಆಗಿದ್ದಾಗ ಹಿಂದುಳಿದ ವರ್ಗದ ಪತ್ರಕರ್ತರಿಗೆ ಮಿಡಿಯಾ ಕಿಟ್​, ಸ್ಥಳಿಯ ಪತ್ರಿಕೆಗಳಿಗೆ ಒಂದು ಪುಟಕ್ಕೂ ಹೆಚ್ಚು ಜಾಹಿರಾತು ನೀಡಲು ತೀರ್ಮಾನ ಮಾಡದೆ. ಪ್ರಾದೇಶಿಕ ಪತ್ರಿಕೆಗಳು ಬೆಳೆಯಬೇಕು ಎಂಬುದು ನನ್ನ ಆಶಯ ಆಗಿತ್ತು. ಹೊಸದಾಗಿ ಆಯ್ಕೆಯಾದ ಜಿಲ್ಲಾ ಮತ್ತು ತಾಲೂಕು ಮಟ್ಟದ ಪತ್ರಕರ್ತರಿಗೆ ಅವರ ಕಾರ್ಯ ಯಶಸ್ವಿಯಾಗಲಿ ಎಂದರು.  

ಗ್ಯಾರಂಟಿ ಅನುಷ್ಠಾನ ಪ್ರಾಧಿಕಾರದ ಜಿಲ್ಲಾಧ್ಯಕ್ಷ ಬಿ.ಬಿ. ಅಸೂಟಿ ಮಾತನಾಡಿ, ಕಾನೂನು ಸಚಿವ ಎಚ್​.ಕೆ. ಪಾಟೀಲ ಅವರು ಪತ್ರಕರ್ತರ ಭವನಕ್ಕೆ ಹೆಚ್ಚಿನ ಅನುದಾನ ನೀಡಿದ್ದಾರೆ. ಜಿಲ್ಲೆಯಲ್ಲಿ ಉತ್ತಮ ಭವನ ನಿರ್ಮಾಣ ಮಾಡಲಾಗಿದೆ. ಭವಿಷ್ಯದಲ್ಲೂ ಸಹಕಾರ ನೀಡಲಾಗುವುದು ಎಂದು ತಿಳಿಸಿದರು. ಜಿಲ್ಲಾಧ್ಯಕ್ಷ ರಾಜು ಹೆಬ್ಬಳ್ಳಿ ಮಾತನಾಡಿ, ಕೋವಿಡ್​ ಸಂದರ್ಭದಲ್ಲಿ ಸಿಎಂ ಆಗಿದ್ದ ಬೊಮ್ಮಾಯಿ ಅವರು ಪತ್ರಕರ್ತರಿಗೆ ಅನೇಕ ಸಹಾಯ ಧನ ನೀಡಿದ್ದಾರೆ. ಮೃತರಿಗೆ 5 ಲಕ್ಷ ನೀಡಿ ಕಲ್ಪವೃಕ್ಷ ಆಗಿದ್ದಾರೆ ಎಂದರು.

ಕಾರ್ಯಕ್ರಮದಲ್ಲಿ ಬಸವರಾಜ ಬೊಮ್ಮಾಯಿ ಅವರನ್ನು  ಸನ್ಮಾನಿಸಲಾಯಿತು. ಕಾರ್ಯಕ್ರಮಕ್ಕೂ ಮುನ್ನ ಸಚಿವ ಎಚ್​.ಕೆ. ಪಾಟೀಲರು ಅಧ್ಯಕ್ಷ ಮತ್ತು ಪದಾಧಿಕಾರಿಗಳ ನವೀಕೃತ ಕಚೇರಿ ಉದ್ಘಾಟಿಸಿರು.

ವಾರ್ತಾ ಇಲಾಖೆ ಅಧಿಕಾರಿ ವಸಂತ ಮಡ್ಲೂರು, ನಿಂಗಪ್ಪ ಚವಡಿ, ಶರಣು ದೊಡ್ಡೂರು, ಅರುಣ ಹಿರೇಮಠ, ಪ್ರಭುಸ್ವಾಮಿ ಅರವಠಗಿಮಠ ಇತರರು ಇದ್ದರು.