ಜಿಲ್ಲೆಯ 58 ಗ್ರಾಮಗಳಲ್ಲಿ ಕುಡಿವ ನೀರಿನ ಸಮಸ್ಯೆ

ಬರಗಾಲ ಜಿಲ್ಲೆಯನ್ನು ವ್ಯಾಪಕವಾಗಿ ಕಾಡುತ್ತಿದ್ದು ಅದರಲ್ಲಿಯೂ ಕುಡಿವ ನೀರಿನ ಸಮಸ್ಯೆ ಈ ಬಾರಿ ಬೇಸಿಗೆಯಿಂದಲೇ ಶುರುವಾಗಿದೆ. ಪ್ರಸಕ್ತ ಮುಂಗಾರಿನಲ್ಲಿ ತೀವ್ರ ಮಳೆ ಕೊರತೆಯಿಂದಾಗಿ ಜನರು ಕೃಷಿಯ ಜತೆಗೆ ಕುಡಿಯುವ ನೀರಿಗೂ ಮಳೆಗಾಲದಲ್ಲಿಯೇ ಪರದಾಡುವಂತಾಗಿದೆ. ಪ್ರಸ್ತುತ ಜಿಲ್ಲೆಯ 39 ಗ್ರಾಪಂಗಳ ವ್ಯಾಪ್ತಿಯ 58 ಹಳ್ಳಿಗಳಲ್ಲಿ ಕುಡಿವ ನೀರಿನ ಸಮಸ್ಯೆ ಎದುರಾಗಿದೆ. ಜಿಲ್ಲೆಯ ಗಡಿ ಭಾಗದಲ್ಲಿ ಹರಿದಿರುವ ಮಲಪ್ರಭಾ ಮತ್ತು ತುಂಗಭದ್ರಾ ನದಿಯಲ್ಲಿ ನೀರಿನ ಪ್ರಮಾಣ ಕಡಿಮೆಯಾದ ಹಿನ್ನೆಲೆ ಸಮಗ್ರ ಜಿಲ್ಲೆಗೆ ನೀರಿನ ಸಮಸ್ಯೆ ತೀವ್ರವಾಗಲಿದೆ.

ಗದಗ ತಾಲೂಕಿನ 8 ಗ್ರಾಪಂ ವ್ಯಾಪ್ತಿಯ ತಿಮ್ಮಾಪೂರ, ಕೋಟುಮಚಗಿ, ಗಾವರವಾಡ, ಕದಡಿ, ಬಳಗಾನೂರ, ಹುಯಿಲಗೋಳ, ಕಿರಟಗೇರಿ, ಹೊಂಬಳ, ಚಿಂಚಲಿ, ಮಹಾಲಿಂಗಪುರ, ಹಂಗಮನಕಟ್ಟಿ ಮತ್ತು ಸೊರಟೂರ ಗ್ರಾಮಗಳು ಸೇರಿದಂತೆ ಒಟ್ಟು 12 ಗ್ರಾಮಗಳಲ್ಲಿ ನೀರಿನ ಸಮಸ್ಯೆ ತಲೆದೋರಿದೆ. ಮುಂಡರಗಿ ತಾಲೂಕಿನ 6 ಗ್ರಾಪಂ ವ್ಯಾಪ್ತಿಯ ಗುಡ್ಡದಬೂದಿಹಾಳ, ಚಿಕ್ಕವಡ್ಡಟ್ಟಿ, ಹೈತಾಪೂರ, ಹಳ್ಳಿಕೇರಿ, ಬೆಣ್ಣಿಹಳ್ಳಿ, ಯಕ್ಲಾಸಪೂರ, ಬೂದಿಹಾಳ, ಬಿದರಳ್ಳಿ ಸೇರಿದಂತೆ ಒಟ್ಟು 8 ಗ್ರಾಮಗಳಲ್ಲಿ ನೀರಿನ ಸಮಸ್ಯೆ ಇದೆ.

ನರಗುಂದ ತಾಲೂಕಿನ 4 ಗ್ರಾಪಂ ವ್ಯಾಪ್ತಿಯಲ್ಲಿನ ಮೂಗನೂರ, ಹದ್ಲಿ, ಕೊಣ್ಣೂರ, ರ್ಕುಲಗೇರಿ, ಬನಹಟ್ಟಿ ಹಾಗೂ ಭೈರನಹಟ್ಟಿ ಗ್ರಾಮಗಳು ಸೇರಿದಂತೆ ಒಟ್ಟು 6 ಗ್ರಾಮಗಳಲ್ಲಿ ಕುಡಿವ ನೀರಿನ ಸಮಸ್ಯೆ, ಗಜೇಂದ್ರಗಡ ತಾಲೂಕಿನ 3 ಗ್ರಾಪಂ ಗಳ ವ್ಯಾಪ್ತಿಯಲ್ಲಿನ 4 ಗ್ರಾಮಗಳಾದ ಮಾಟರಂಗಿ, ಪುರ್ತಗೇರಿ, ಹಿರೇಕೊಪ್ಪ, ನಾಗೇಂದ್ರಗಡ, ರೋಣ ತಾಲೂಕಿನ 5 ಗ್ರಾಪಂ ವ್ಯಾಪ್ತಿಯ 8 ಗ್ರಾಮಗಳಾದ ಹೊಳೆಮಣ್ಣೂರ, ಮೆಣಸಗಿ, ಗಾಡಗೋಳಿ, ಭೋಪಳಾಪೂರ, ಬಿ.ಎಸ್​.ಬೇಲೇರಿ, ಬಸರಕೋಡ, ಮಾಳವಾಡ ಹಾಗೂ ಬಾಸಲಾಪೂರ, ಶಿರಹಟ್ಟಿ ತಾಲೂಕಿನ 6 ಗ್ರಾಪಂ ವ್ಯಾಪ್ತಿಯಲ್ಲಿನ 10 ಗ್ರಾಮಗಳಾದ ಜೆಲ್ಲಿಗೇರಿ, ವರವಿ, ಜಲ್ಲಿಗೇರಿ ತಾಂಡಾ, ಚೌಡಾಳ, ನವೆಭಾವನೂರ, ಮಾಚೇನಹಳ್ಳಿ, ಕುಸಲಾಪೂರ, ಶಿವಾಜಿನಗರ, ಮಾಗಡಿ, ಚನ್ನಪಟ್ಟಣ, ಲೆ$್ಮಶ್ವರ ತಾಲೂಕಿನ 7 ಗ್ರಾಪಂ ವ್ಯಾಪ್ತಿಯಲ್ಲಿನ 10 ಗ್ರಾಮಗಳಾದ ಮಾಡಳ್ಳಿ, ಯತ್ತಿನಹಳ್ಳಿ, ಯಳವತ್ತಿ, ಗೊಜನೂರ, ಅಕ್ಕಿಗುಂದ, ಅಕ್ಕಿಗುಂದ ತಾಂಡಾ, ಪುಟಗಾಂ ಬಡ್ನಿ, ಆದ್ರಳ್ಳಿ, ಯಲ್ಲಾಪೂರ, ಬಾಲೆಹೊಸೂರ ಗ್ರಾಮಗಳ ಜನರು ನೀರನ ಸಮಸ್ಯೆ ಎದುರಿಸುತ್ತಿದ್ದಾರೆ. ಜಿಲ್ಲೆಯಲ್ಲಿರುವ ಒಟ್ಟು 122 ಗ್ರಾಪಂಗಳ ವ್ಯಾಪ್ತಿಯಲ್ಲಿ ಒಟ್ಟು 337 ಗ್ರಾಮಗಳಿವೆ. ಇವುಗಳಲ್ಲಿ 39 ಗ್ರಾಪಂಗಳು ಕುಡಿವ ನೀರಿನ ಸಮಸ್ಯೆಯನ್ನು ಎದುರಿಸುತ್ತಿವೆ.

ಗದಗ ನಗರಕ್ಕೆ ಪ್ರತಿನಿತ್ಯ 36 ಎಂಎಲ್​ಡಿ ನೀರು ಅಗತ್ಯ ಇದ್ದು, ಈ ವರೆಗೆ 12 ರಿಂದ 15 ಎಂಎಲ್​ಡಿ ನೀರು ಮಾತ್ರ ಹರಿಯುತ್ತಿದೆ.

ಕೋಟ್​

ಜಿಲ್ಲಾಡಳಿತ ಕೇವಲ ಸಮಸ್ಯೆ ಸೃಷ್ಟಿಯಾಗುವ ಗ್ರಾಮಗಳ ಪಟ್ಟಿ ತಯಾರಿಸಿ ಕುಳಿತರೆ ಸಾಲದು, ಈಗಿನಿಂದಲೇ ಆಯಾ ಗ್ರಾಮಗಳಿಗೆ ಕುಡಿವ ನೀರಿನ ವ್ಯವಸ್ಥೆಗೆ ವಿಶೇಷ ಗಮನ ನೀಡಬೇಕು. ನಂತರ ನಾವು ಟ್ಯಾಂಕರ್​ ಮೂಲಕ ನೀರು ಕೊಡುತ್ತೇವೆ ಎನ್ನುವ ಮೂಲಕ ಹಣ ಲೂಟಿಗೆ ಇಳಿಯುತ್ತಾರೆ. ಇದನ್ನು ತಪ್ಪಿಸಲು ಜಿಲ್ಲಾಧಿಕಾರಿಗಳು ಕೂಡಲೇ ಗಮನ ಹರಿಸಬೇಕು.

ವಿ. ಆರ್​. ಗೋವಿಂದಗೌಡ್ರ. ಜೆಡಿಎಸ್​ ರಾಜ್ಯ ವಕ್ತಾರ.