ಹೆಚ್ಚುವರಿ ಟಿಕೆಟ್ ಬೇಡಿಕೆಗೆ ಫೈನಲ್ ಶಿಫ್ಟ್: ಬಿಸಿಸಿಐ ಕಾರ್ಯದರ್ಶಿ ದೇವಜಿತ್ ಸೈಕಿಯಾ

ಐಪಿಎಲ್ ಪ್ಲೇಆಫ್ ಹಂತದ ಪಂದ್ಯಗಳ ತಾಣಗಳನ್ನು ಈಗಾಗಲೆ ಘೋಷಿಸಿದ್ದು, ಕ್ವಾಲಿಫೈಯರ್ ಎಲಿಮಿನೇಟರ್ ಮತ್ತು ಫೈನಲ್ ಪಂದ್ಯ ಆತಿಥ್ಯ ನಿರ್ಧರಿಸುವ ಹಕ್ಕು ಬಿಸಿಸಿಐಗೆ ಇದೆ. ಆದ್ದರಿಂದ, ನಾವು ಮೂರು ಸ್ಥಳಗಳನ್ನು ಆಯ್ಕೆ ಮಾಡಿದ್ದೇವೆ. ಬಿಸಿಸಿಐ ಶಿಷ್ಟಾಚಾರ ಪ್ರಕಾರ, ಹಾಲಿ ಚಾಂಪಿಯನ್‌ಗಳು ತನ್ನ ತವರು ಮೈದಾನದಲ್ಲಿ ಫೈನಲ್ ಮತ್ತು ಒಂದು ಪ್ಲೇಆಫ್ ಪಂದ್ಯವನ್ನು ಆಯೋಜಿಸಲು ಅರ್ಹರಾಗಿರುತ್ತಾರೆ. ಆರ್‌ಸಿಬಿ ಕಳೆದ ವರ್ಷ ಹಾಲಿ ಚಾಂಪಿಯನ್ ಆಗಿದ್ದರಿಂದ ಈ ಪಂದ್ಯಗಳನ್ನು ಬೆಂಗಳೂರಿನಲ್ಲಿ ನಡೆಸುವುದು ಸೂಕ್ತ ಎಂದು ನಿರ್ಧರಿಸಲಾಗಿತ್ತು. ಆದರೆ, ಇತ್ತೀಚಿನ ಬೆಳವಣಿಗೆಗಳಿಂದ ಉಂಟಾದ ಕೆಲವು ಸಂದರ್ಭಗಳಿಂದಾಗಿ, ಬಿಸಿಸಿಐ ಮತ್ತು ಐಪಿಎಲ್ ಆಡಳಿತ ಮಂಡಳಿ ಪ್ಲೇಆಫ್ ಸ್ಥಳವನ್ನು ಬೆಂಗಳೂರಿನಿಂದ ಬೇರೆಡೆಗೆ ಸ್ಥಳಾಂತರಿಸುವ ನಿರ್ಧಾರವನ್ನು ತೆಗೆದುಕೊಂಡಿದೆ ಎಂದು ಸೈಕಿಯಾ, ಫೈನಲ್ ಸ್ಥಳಾಂತರಕ್ಕೆ ಕಾರಣ ವಿವರಿಸಿದ್ದಾರೆ.

ಐಪಿಎಲ್ ಶಿಷ್ಟಾಚಾರದ ಪ್ರಕಾರ, ಆತಿಥೇಯ ಕ್ರಿಕೆಟ್ ಸಂಸ್ಥೆಗಳಿಗೆ ಕ್ರೀಡಾಂಗಣದ ಒಟ್ಟು ಪ್ರೇಕ್ಷಕರ ಆಸನ ಸಾಮರ್ಥ್ಯದ ಶೇ.15 ಟಿಕೆಟ್‌ಗಳನ್ನು ಉಚಿತವಾಗಿ ನೀಡಲಾಗುತ್ತದೆ. ಎಲ್ಲ ರಾಜ್ಯ ಕ್ರಿಕೆಟ್ ಸಂಸ್ಥೆಗಳಿಗೂ ಇದು ಅನ್ವಯಿಸಲಿದೆ. ಆದರೆ, ಐಪಿಎಲ್ ಲೀಗ್ ಪಂದ್ಯಗಳನ್ನು ಆಯೋಜಿಸುವಾಗ, ಕರ್ನಾಟಕ ರಾಜ್ಯ ಕ್ರಿಕೆಟ್ ಸಂಸ್ಥೆ ಹೆಚ್ಚಿನ ಸಂಖ್ಯೆಯ ಉಚಿತ ಟಿಕೆಟ್‌ಗಳನ್ನು ಪಡೆಯುತ್ತಿದೆ ಎಂದು ವಿವಿಧ ಮೂಲಗಳಿಂದ ಮಾಹಿತಿ ದೊರೆಯಿತು. ಇದು ನಿಗದಿತ ಪ್ರಮಾಣಕ್ಕಿಂತ ಶೇ.15ಕ್ಕಿಂತ ಹೆಚ್ಚು ಎನ್ನಲಾಗಿದೆ. ಇದರಿಂದ ಈ ವಿಷಯದ ಬಗ್ಗೆ ಕೆಎಸ್‌ಸಿಎಯಿಂದ ಮಾಹಿತಿ ಕೋರಿ ಇಮೇಲ್ ಕಳುಹಿಸಲಾಗಿತ್ತು. ಮೇ 2ರಂದು ಕೆಎಸ್‌ಸಿಎ ಇಮೇಲ್ ಮೂಲಕ ನಮಗೆ ಪ್ರತಿಕ್ರಿಯಿಸಿದಾಗ ಅಚ್ಚರಿ ಉಂಟು ಮಾಡಿದ ಅಂಶಗಳಿದ್ದವು. ಕೆಎಸ್‌ಸಿಎಯ ಸದಸ್ಯರು, ಅಂಗಸಂಸ್ಥೆ ಕ್ಲಬ್‌ಗಳು ಮತ್ತು ಇತರ ಹಲವಾರು ಸದಸ್ಯರಿಗೆ ಶೇ.15 ಉಚಿತ ಟಿಕೆಟ್ ಕೋಟಾಕ್ಕಿಂತ ಹೆಚ್ಚುವರಿ ಟಿಕೆಟ್‌ಗಳ ಹಂಚಿಕೆ ಅಗತ್ಯವಿರುತ್ತದೆ ಎಂದು ಕೆಎಸ್‌ಸಿಎ ಇಮೇಲ್‌ನಲ್ಲಿ ತಿಳಿಸಿತ್ತು.

ಇದರ ಜತೆಗೆ ಶಾಸಕರು ಮತ್ತು ವಿಧಾನ ಪರಿಷತ್ತಿನ ಸದಸ್ಯರಿಗೂ ಟಿಕೆಟ್ ಬೇಡಿಕೆಯಿಟ್ಟು, ಕರ್ನಾಟಕ ಸರ್ಕಾರಕ್ಕೂ 700 ಉಚಿತ ಟಿಕೆಟ್ ಅಗತ್ಯ ಎಂದು ಮಾಹಿತಿ ನೀಡಿತ್ತು. ಐಪಿಎಲ್‌ನ ನಿಯಮಗಳು ಮತ್ತು ನಿಬಂಧನೆಗಳ ಅಡಿಯಲ್ಲಿ ನಿಗದಿತ ಕೋಟಾಕ್ಕಿಂತ ಹೆಚ್ಚುವರಿ ಉಚಿತ ಟಿಕೆಟ್ ನೀಡಿ ಶಿಷ್ಟಾಚಾರಗಳನ್ನು ಉಲ್ಲಂಘಿಸಲು ಸಾಧ್ಯವಿಲ್ಲ. ಶೇ.15 ಕೋಟಾಗಿಂತ ಹೆಚ್ಚು, ಅಂದರೆ ಸುಮಾರು 10 ಸಾವಿರ ಹೆಚ್ಚುವರಿ ಉಚಿತ ಟಿಕೆಟ್‌ಗಳು ಕೇಳಿದ್ದರಿಂದ ಪ್ಲೇಆಫ್ ಪಂದ್ಯಗಳನ್ನು ಬೆಂಗಳೂರಿನಿಂದ ಬೇರೆಡೆಗೆ ಸ್ಥಳಾಂತರಿಸುವ ಕಠಿಣ ನಿರ್ಧಾರ ತೆಗೆದುಕೊಳ್ಳಬೇಕಾಯಿತು ಎಂದು ದೇವಜಿತ್ ಸೈಕಿಯಾ ಸ್ಪಷ್ಟನೆ ನೀಡಿದ್ದಾರೆ.